سارسەنبى, 29 قاڭتار 2020
وزەكتى 2146 11 پىكىر 28 قاراشا, 2019 ساعات 13:23

ەلشى ەلدىڭ ءبارىن وتىرىكشى كورە مە؟

قىتايدىڭ قازاقستانداعى ەلشىسى چجان سياو شىڭجاڭداعى قازاقتاردىڭ ۇستالۋى جايلى اقپارات جالعان دەپ سانايدى. بۇل تۋرالى ازاتتىق حابارلادى.

ناقتىراق ايتساق، قىتاي ەلشىسى قر تۇڭعىش پرەزيدەنتى كۇنىنە وراي نۇر-سۇلتاندا وتكەن كونفەرەنتسياعا قاتىسقان. جيىن بارىسىندا، قىتايدا قىسىم كورىپ جاتقان مۇسىلمان حالىقتارىنا قاتىستى ساۋالعا چجان سياو "بۇل دۇرىس ەمەس اقپارات" دەپ جاۋاپ بەردى.

-بۇل اقپارات قايدان الىنعان؟ مۇنىڭ ءبارى وتىرىك جانە دۇرىس ەمەس اقپارات. ءسىز تۇسىنەسىز بە؟

قىتايلىق ديپلومات قحر-داعى مۇسىلمان حالىقتارىنىڭ جاعدايى تۋرالى باسقا سۇراقتارعا جاۋاپ بەرگەن جوق.

سونداي-اق چجان سياو ازاتتىق جۋرناليسىنەن اقش دەپارتامەنتىندە جۇمىس ىستەيسىز بە دەپ سۇراعان.

-ازاتتىق - امەريكالىق باسىلىم، امەريكالىق باق. مۇندا امەريكا ەلشىسى جوق. امەريكانىڭ ەلشىسى جوق. بارلىق سۇراقتار بويىنشا اقش مەملەكەتتىك دەپارتامەنتىمەن بايلانىسۋىڭىزدى وتىنەم. ءسىز اقش مەملەكەتتىك دەپارتامەنتىندە جۇمىس ىستەيسىز بە؟-دەدى.

ايتا كەتەيىك، 16 قاراشادا امەريكالىق New York Times گازەتىندە قىتاي ۇكىمەتىنىڭ جۇزدەگەن ىشكى قۇجاتتارى جاريالانعان. وندا «ساياسي قايتا تاربيەلەۋ لاگەرلەرىنە» قاتىستى نۇسقاۋلار، قحر توراعاسى سي ءتسزينپيدىڭ سويلەگەن سوزدەرى مەن باسقا دا قۇپيا قۇجاتتار تارالعان بولاتىن.

وسىدان سوڭ، پەكيننىڭ ساياساتىن سىنعا الۋ كۇشەيە تۇسكەن.

Abai.kz

11 پىكىر