قۇرىلتايدىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىندە «قازاقستان رەسپۋبليكاسى پرەزيدەنتىنىڭ 2026 جىلعى 28 قازانداعى قازاقستان حالقىنا جولداۋى: تسيفرلىق ەكونوميكا تۇرعىسىنان ازاماتتىق زاڭنامانى جەتىلدىرۋ جانە قايتا قاراۋ ماسەلەلەرى» تاقىرىبىندا دوڭگەلەك ۇستەل ءوتتى. «ادىلەت» پارتياسى مەن Maqsut Narikbayev University بىرلەسىپ ۇيىمداستىرعان القالى جيىنعا قۇرىلتاي توراعاسىنىڭ ورىنباسارى نۇرلان بەكنازاروۆ قاتىستى.

وتىرىستا كوميتەت توراعاسى ءۇنزيلا شاپاق بۇل ءىس-شارا مەملەكەت باسشىسىنىڭ جولداۋىندا ايتىلعان جاڭا ازاماتتىق كودەكستى قابىلداۋ قاجەتتىگى تۋرالى باستاماسىن ىسكە اسىرۋعا باعىتتالعانىن اتاپ ءوتتى. ول قولدانىستاعى ازاماتتىق كودەكسكە قابىلدانعان ساتتەن بەرى 150-دەن استام وزگەرىس پەن تولىقتىرۋ ەنگىزىلگەنىن ايتتى. قۇجاتتا زاماناۋي شارتتىق ينستيتۋتتاردىڭ جوقتىعى قازاقستاننىڭ شەتەلدىك ارىپتەستەر ءۇشىن ينۆەستيتسيالىق تارتىمدىلىعىن تومەندەتەدى. ال تسيفرلىق اكتيۆتەر مەن سمارت-كەلىسىمشارتتاردى رەتتەيتىن نورمالاردىڭ بولماۋى IT-سەكتور مەن يننوۆاتسيالىق ەكونوميكانىڭ دامۋىن تەجەيدى.

– جاڭا ازاماتتىق كودەكستى قابىلداۋ – ەلدىڭ قۇقىقتىق ەگەمەندىگىن نىعايتۋ، قازاقستان رەسپۋبليكاسىنىڭ تۇراقتى ەكونوميكالىق ءوسۋىن جانە قۇقىقتىق جاڭعىرتىلۋىن قامتاماسىز ەتۋ جونىندەگى ستراتەگيالىق قادام. پرەزيدەنت قۇرىلتاي دەپۋتاتتارىنىڭ الدىنا ۇكىمەتپەن بىرلەسىپ قۇجاتتى ازىرلەۋگە كىرىسۋ جانە ونى كەلەسى جىلدىڭ سوڭىنا دەيىن قابىلداۋ تۋرالى ناقتى مىندەت قويدى. بۇل جۇمىس زاڭناما بويىنشا ساراپشىلار قاۋىمداستىعىمەن بىرگە بارلىق تاراپتاردىڭ بىرلەسىپ ارەكەت ەتۋىن تالاپ ەتەدى، – دەدى ءۇنزيلا شاپاق.

ۆيتسە-سپيكەر نۇرلان بەكنازاروۆ ءوز سوزىندە دوڭگەلەك ۇستەل قۇرىلتاي توراعاسى ايبەك دادەبايدىڭ تاپسىرماسى بويىنشا ۇيىمداستىرىلعانىن اتاپ ءوتتى. ول 1995 جىلى قولدانىسقا ەنگىزىلگەن ازاماتتىق كودەكس قازاقستاننىڭ ازاماتتىق زاڭناماسىنىڭ بەرىك نەگىزىنە اينالعانىن ەسكە سالدى. الايدا ۋاقىت تالابىنا وراي، ونى جەتىلدىرۋ قاجەتتىلىگى الدەقاشان جەتكەن بولاتىن

– مەملەكەت باسشىسى ءوز جولداۋىندا بولاشاقتىڭ ەكونوميكاسىنا بايىپپەن كوشۋدىڭ قۇقىقتىق نەگىزىنە اينالاتىن جاڭا ازاماتتىق كودەكس قابىلداۋ قاجەتتىگىن اتاپ ءوتتى. ەلەكتروندىق مامىلەلەر، تسيفرلىق اكتيۆتەر، پلاتفورمالىق ەكونوميكا، جاساندى ينتەللەكت تەحنولوگيالارى جانە دەرەكتەر اينالىمى ءداستۇرلى ازاماتتىق قۇقىق ينستيتۋتتارىنا جاڭا تالاپتار قويىپ وتىر. بۇل رەتتە جاڭا قۇقىقتىق رەتتەۋ ەكونوميكانىڭ دامۋىنا كەدەرگى كەلتىرمەۋگە، كەرىسىنشە، يننوۆاتسيالار مەن كاسىپكەرلىك باستامالار ءۇشىن قولايلى جاعداي جاساۋعا، ازاماتتىق اينالىمنىڭ قۇقىقتىق سەنىمدىلىگى مەن تۇراقتىلىعىن قامتاماسىز ەتۋگە ءتيىس، – دەدى نۇرلان بەكنازاروۆ.

ۆيتسە-سپيكەردىڭ ايتۋىنشا، دوڭگەلەك ۇستەل مەملەكەتتىك ورگانداردىڭ، عىلىمي جانە ساراپتامالىق قوعامداستىقتىڭ پىكىرلەرىن توعىستىراتىن ماڭىزدى كاسىبي الاڭ بولىپ وتىر.

«ادىلەت» پارتياسى توراعاسىنىڭ ورىنباسارى نۇرسۇلتان بايتىلەسوۆ جاڭا ازاماتتىق كودەكس پەن قولدانىستاعى زاڭداردىڭ كەلىسىلۋىن قامتاماسىز ەتۋ قاجەتتىگىنە توقتالدى. ونىڭ پىكىرىنشە، ازىرلەۋشىلەر نورمالاردىڭ ەكىۇشتى بولماۋى ءۇشىن زاڭدى تۇلعالار، كورپوراتيۆتىك قاتىناستار، مۇراگەرلىك جانە زياتكەرلىك مەنشىك ماسەلەلەرىن رەتتەۋدىڭ بىرىڭعاي تەرمينولوگياسى مەن قۇقىقتىق تاسىلدەرىن قالىپتاستىرۋى قاجەت.

– بۇل رەتتە «زاڭ جانە ءتارتىپ» قاعيداتىن دا ەسكەرۋ كەرەك. تسيفرلىق ەكونوميكانىڭ دامۋى زاڭدىلىقتى نىعايتۋمەن، ازاماتتاردىڭ قۇقىقتارىن قورعاۋمەن جانە تسيفرلىق ورتاداعى بۇزۋشىلىقتار ءۇشىن جاۋاپكەرشىلىكتى قامتاماسىز ەتۋمەن قاتار جۇرۋگە ءتيىس. ءبىز جاڭا تەحنولوگيالاردىڭ ۇيىمدار، تسيفرلىق پلاتفورمالار نەمەسە اۆتوماتتاندىرىلعان جۇيەلەر الدىندا زاڭدى تۇردە وسال بولىپ قالۋىنا جول بەرمەۋىمىز كەرەك، – دەدى نۇرسۇلتان بايتىلەسوۆ.

سونداي-اق، Maqsut Narikbayev University باسقارما توراعاسى تالعات نارىكباەۆ، ادىلەت ۆيتسە-ءمينيسترى بوتاگوز جاقسەلەكوۆا، «ادىلەت» پارتياسىنىڭ «ادىلەتتى ورتا» ۇيلەستىرۋ-تالداۋ ورتالىعىنىڭ جەتەكشىسى ابزال قۇسپان بايانداما جاسادى.

دوڭگەلەك ۇستەل بارىسىندا دەپۋتاتتاردىڭ، شاقىرىلعان زاڭگەرلەر مەن ساراپشىلاردىڭ قاتىسۋىمەن تاقىرىپتىق پىكىرتالاس ءوتتى.

كوميتەت توراعاسى ءۇنزيلا شاپاق جيىندى قورىتىندىلاي كەلە، بارلىق قاتىسۋشىلارعا مازمۇندى باياندامالارى مەن جان-جاقتى سىندارلى تالقىلاۋى ءۇشىن العىسىن ءبىلدىردى. ول ايتىلعان بارلىق ەسكەرتۋلەر مەن ۇسىنىستار ازاماتتىق كودەكس جوباسىن ازىرلەۋ كەزىندە ەسكەرىلەتىنىن اتاپ ءوتتى.

Abai.kz