سارسەنبى, 26 اقپان 2020
46 - ءسوز 3383 0 پىكىر 27 مامىر, 2016 ساعات 16:12

اقش بالانى عىلىمعا قالاي باۋليدى؟

اللاعا شۇكىر، ءبىزدىڭ ديمەكەڭ دە Elementary School-داعى العاشقى جىلىن ويداعىداي اياقتادى. ءبىتىرۋ سالتاناتىنا قاتىسىپ قايتتىق.

وسى رەتتە، ءوزىم بايقاعان ءبىر-ەكى ماسەلەنى سىزدەرمەن بولىسە وتىرعاندى ءجون كوردىم.

اقش مەكتەپتەرىندە (ناقتىراق ايتسام، سان فرانتسيسكوداعى قازاق ورتا مەكتەبىندە، قالجىڭ، Hillcrest Elementary School-ىندا) ساباقتان تىس شارالارعا وتە سۇلەسوق قارايدى ەكەن. ساباققا نۇقسان كەلمەسىن دەي مە، الدە، وزدەرى سوعان دا ريزا ما، ايتەۋىر، مەرەكەلىك شارالارى، اشىق ساباق، قويىلىم، كەش دەگەن سياقتى جيىن-تويلار دايىندىقسىز، شاشىراڭقى، ءجۇردىم باردىم وتە سالادى. بىراق، ۇستازدار دا، اتا-انالار دا ءماز سوعان. ءبىر عانا مىسال، ولاردىڭ اكت زالىندا تۇرعان اپپاراتتى قازىر بىزدەگى شالعاي اۋىلدىڭ مەكتەبى دە ۇستامايدى.

بىزدە قالاي؟ بىزدە، كەرىسىنشە، بار كۇش-جىگەر، ۋاقىت، قارجى سوندايعا سارپ بولماي ما؟ بالاباقشادان باستاپ تاقىلداپ تاقپاق ايتۋعا، ساxنانى ءولتىرىپ بەزەندىرىپ، جارقىراپ كيىنىپ شىعۋعا داعدىلانامىز عوي. مەنىڭشە، ەكى جاقتىكى ەكى ەكستريم سياقتى. ورتاسىن تابۋ كەرەك-اۋ.

ەكىنشى ماسەلە. بۇلاردىڭ ءبىر ۇستانىمى - ەشقاشان بالانىڭ مۇمكىندىگىن شەكتەمە (نەدووتسەنيۆات، underestimate). مىسالى، kindergarten (نۋلەۆوي) ءبىتىرىپ جاتسا دا، ديماشتار non-fictional writing بويىنشا عىلىمي جوبا دايىندادى. قالاي دەيسىز عوي. 
ءار بالاعا ءبىر-ءبىر جانۋاردان تاڭداتىپ، سولاردى زەرتتەۋگە ۋاقىت بەردى. سول ۋاقىت ىشىندە اركىم ءوز جانۋارى تۋرالى كىتاپتار وقىدى، ۆيدەولار كوردى. سىنىپ بولىپ زووپارككە بارىپ، كوزبەن كورىپ، تانىستى. سول جيعان ماتەريالدارى بويىنشا، ءار بالا ارنايى تاقتا مەن كىتاپ دايىنداپ شىقتى. مەكتەپتىڭ سوڭعى كۇنى ارنايى كورمە ۇيىمداستىرىلىپ، جوبا يەلەرى باسقا سىنىپ وقۋشىلارىنا وزدەرى زەرتتەگەن جانۋارلار تۋرالى اڭگىمەلەپ، جوبالارىن قورعادى.

ءبىزدىڭ ديماش ورمەكشىنىڭ black widow (چيورنايا ۆدوۆا) دەگەن اسا ۋلى ءتۇرىن تاڭداپ الىپتى. (قازاقشاسى، نە قاراقۇرت، نە ءبۇيى بولار دەپ جوبالادىم.)
جاساعان تاقتاسى مەن كىتابىندا مىنانداي مالىمەتتەر قامتىلعان ەكەن: ءبۇيىنىڭ دەنە قۇرىلىسى; قورەگى; جاۋلارى; مەكەندەيتىن اۋماعى; ول تۋرالى قىزىقتى فاكتىلەر; تۋىستاس تۇرلەرى; اۆتوردىڭ ول تۋرالى جەكە پىكىرى; اۆتور تۋرالى مالىمەتتەر.

ايتىپ جۇرگەندە ءمان بەرمەگەم، ءبىتىرىپ، قورعاپ، كەيىن ۇيگە اكەلگەندە، تاڭ-تاماشا بولدىم. بالانى عىلىمعا يكەمدەۋدى ولار ءبىر جىلعا دا كەشىكتىرمەي باستاپ كەتەتىنىن ءتۇسىندىم.

مۇرات ەسجان

Facebook-تەگى پاراقشاسىنان

0 پىكىر