جەكسەنبى, 8 جەلتوقسان 2019
ەل ءىشى... 2359 13 پىكىر 26 تامىز, 2019 ساعات 10:41

مەملەكەت باسشىسى «ۇلىتاۋ 2019» حالىقارالىق تۋريستىك فورۋمىنا قاتىستى

مەملەكەت باسشىسى «ۇلىتاۋ 2019» حالىقارالىق تۋريستىك فورۋمىنىڭ جۇمىسىنا قاتىستى.

قاسىم-جومارت توقاەۆ فورۋمدا سويلەگەن سوزىندە قازاق حالقى ءۇشىن ۇلىتاۋدىڭ تاريحي ءمانى مەن كيەلىلىگىن، سونداي-اق، بۇل قاسيەتتى مەكەننىڭ ەتنوگرافيالىق، زياراتتىق جانە ەكولوگيالىق ءتۋريزمدى دامىتۋ ءۇشىن زور الەۋەتى بار ەكەنىن اتاپ ءوتتى.

– تاريحى تەرەڭ ۇلىتاۋدىڭ قادىر-قاسيەتىن باعالاي ءبىلۋ – بارشامىزعا ورتاق پارىز. ەلىمىزدىڭ وسىنداي باعا جەتپەس باي مۇراسىن وزگە جۇرتقا تانىتۋدىڭ جاڭاشا جولدارىن ويلاستىرۋىمىز كەرەك. مىسالى، مونعوليا شىڭعىس حان تۇلعاسىن حالىقارالىق ءتۋريزمدى دامىتۋ ءۇشىن وتە ءتيىمدى پايدالانىپ وتىر. ال، شىڭعىس حاننىڭ ۇلكەن ۇلى – جوشىنىڭ مازارى قازاق جەرىندە تۇرعانىن بۇگىندە ەلىمىزدەگى جانە شەتەلدەگى جۇرتشىلىقتىڭ كوبى بىلە بەرمەيدى. ونىڭ تاريحي تۇلعاسىنا الەمنىڭ نازارىن اۋدارىپ، كەسەنەسىن مادەني تۋرنىسانىنا اينالدىرۋ – وتە ماڭىزدى مىندەت. ۇلىتاۋ – حالىقارالىق دەڭگەيدەگى ەتنوگرافيالىق ءتۋريزمنىڭ ورتالىعى بولۋى ءتيىس، – دەپ اتاپ ءوتتى مەملەكەت باسشىسى.

وسىعان بايلانىستى قاسىم-جومارت توقاەۆ شەتەلدىك جانە وتاندىق تۋريستەر ءۇشىن قازاقستاندا تارتىمدى جەرلەردى قالىپتاستىرۋ، سونداي-اق ەتنوتۋريزمدى دامىتۋ جونىندە ءوزىنىڭ پىكىرىمەن ءبولىستى.

– كوپتەگەن شەتەلدىك تۋريستەردى بەس جۇلدىزدى قوناقۇيلەر، كۋرورتتار سياقتى امبەباپ دۇنيەلەر جالىقتىردى. ولاردى ءارتۇرلى حالىقتاردىڭ مادەنيەتىن، ادەت-عۇرپى مەن سالت-ءداستۇرىن زەرتتەۋ، بارعان ەلدىڭ تاريحىمەن تانىسۋ قىزىقتىرادى. سوندىقتان، الەمدە وزىندىك ەرەكشەلىگى بار جەرلەرگە بارۋعا، تاريحي فەستيۆالدارعا جانە كونە ءارى قايتا قالپىنا كەلتىرىلگەن ماڭىزدى وقيعالارعا قاتىسۋعا دەگەن سۇرانىس ارتىپ وتىر. ءبىز وسىنداي ۇردىستەردى پايدالانۋىمىز قاجەت. قازاقستاننىڭ الەمگە ۇسىناتىن بىرەگەي ورىندارى بار، – دەدى پرەزيدەنت.

مەملەكەت باسشىسى قازاقستاننىڭ تۋريستىك الەۋەتى مەن ونى دامىتۋدىڭ مىندەتتەرى تۋرالى ايتا كەلىپ، كاسىبي كادرلاردى دايارلاۋدىڭ ماڭىزدىلىعىنا توقتالدى.

– تۋريزم – وتە كۇردەلى سالا. ءتيىستى مامانداردى دايىنداۋىمىز كەرەك. سوندىقتان تۋريزم ۋنيۆەرسيتەتىن اشۋ جونىندە شەشىم قابىلدادىق. ءدال وسى سالادا جۇمىس ىستەي الاتىن بىلىكتى كادرلاردى دايىنداۋىمىز قاجەت، – دەدى قاسىم-جومارت توقاەۆ.

پرەزيدەنت ءتۋريزمدى دامىتۋ اياسىندا وڭىردە كولىك-لوگيستيكالىق ينفراقۇرىلىمدى قالىپتاستىرۋ جانە قازاقستاننىڭ بارلىق رەكرەاتسيالىق ايماعىندا قوناقۇيلەردىڭ، تاماقتاناتىن جانە دەمالاتىن ورىنداردىڭ قۇرىلىسىنا كاسىپكەرلەردى تارتۋ قاجەتتىگىنە توقتالدى. سونىمەن قاتار، مەملەكەت باسشىسى كرەاتيۆتى جانە يننوۆاتسيالىق شەشىمدەردىڭ كومەگىمەن قازاقستاننىڭ تۋريستىك الەۋەتىنىڭ اقپاراتتىق قول جەتىمدىلىگىن قامتاماسىز ەتۋ قاجەت ەكەنىن اتاپ ءوتتى.

– مادەنيەت جانە سپورت مينيسترلىگى، سونداي-اق تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تۋريستەردى قازاقستان تۋرالى، ەڭ الدىمەن، ۇلىتاۋ جانە ونىڭ باسقا دا تاريحي ورىندارى جونىندە قاجەتتى اقپاراتپەن قامتاماسىز ەتەتىن ينتەگراتسيالانعان قولدانبالى باعدارلاما نەمەسە پلاتفورما ازىرلەۋى قاجەت، – دەدى قاسىم-جومارت توقاەۆ.

مەملەكەت باسشىسى ۇلىتاۋدىڭ كيەلى نىساندارى وتاندىق جانە شەتەلدىك تۋريستەردى تارتاتىن ورىندارعا اينالاتىنىنا سەنىم ءبىلدىردى.

ۇلىتاۋ تۋريستىك مەكەنگە، دەمالىس ايماعىنا ءارى ۇلى بابالارعا تاعزىم ەتۋ ورتالىعىنا اينالۋى ءتيىس. بۇل وڭىرگە قازاق تاريحىنىڭ سيمۆولى بولاتىن ەسكەرتكىش-انسامبل ورناتۋ قاجەت. ۇلىتاۋدىڭ تاريحى مەن تاعىلىمىن جاستار تاربيەسى مەن وتانشىلدىق رۋحتى دامىتۋعا پايدالانۋ كەرەك، – دەدى مەملەكەت باسشىسى.

فورۋم سوڭىندا قازاقستان پرەزيدەنتى «Jezkiik» حالىقارالىق مۋزىكالىق فەستيۆالدىڭ كونتسەرتتىك باعدارلاماسىن كوردى، سونداي-اق، قالپىنا كەلتىرىلگەن ۇلتتىق كيىمدەر توپتاماسى قويىلعان جانە اتتى-شاباندوزداردىڭ شوۋى كورسەتىلىپ جاتقان ەتنواۋىلعا باردى.

Abai.kz

13 پىكىر