سەنبى, 19 قازان 2019
ساڭلاق 3185 3 پىكىر 4 قىركۇيەك, 2019 ساعات 12:21

#Abai175: گولوۆكين ەستافەتانى ەلەۋسىز قالدىرا ما؟

2020 جىلى ۇلى ابايدىڭ تۋعانىنا 175 جىل تولادى. وسىعان وراي، مەملەكەت باسشىسى قاسىم-جومارت توقاەۆ اباي قۇنانبايۇلىنىڭ 175 جىلدىق مەرەيتويىن رەسپۋبليكالىق دەڭگەيدە تويلاۋ تۋرالى جارلىق شىعارعان بولاتىن.

ەل پرەزيدەنتىنىڭ باستاماسىنان كەيىن ۇلى اقىننىڭ مەرەيتويىن اۋقىمدى تۇردە اتاپ وتۋگە جان-جاقتى دايىندىق جۇمىستارى ءجۇرىپ جاتىر.

شىلدە ايىنىڭ باسىندا 9 جاستاعى مەكتەپ وقۋشىسى ءلايلىم-شىراق ەرلانقىزى «اباي ولەڭدەرىن جاتقا وقۋ» ەستافەتاسىن باستاپ، ونى پرەزيدەنت قاسىم-جومارت توقاەۆقا جولداعان ەدى. مەملەكەت باسشىسى بۇل ەستافەتانى قۋانىشپەن قابىل الىپ، ۇلى اقىننىڭ ولەڭىن وقىدى. ءارى ەستافەتانى ودان ءارى ءبىلىم جانە عىلىم ءمينيسترى اسحات ايماعامبەتوۆكە، مادەنيەت جانە سپورت ءمينيسترى اقتوتى رايىمقۇلوۆاعا جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولدادى.

الەمگە ايگىلى ءانشى ديماش قۇدايبەرگەننىڭ تۇرتكى بولۋىمەن بۇل challenge قازاقستان شەكاراسىنان شىعىپ، الەمدىك ماسشتابقا كوتەرىلدى. ءار ەلدىڭ ساياساتكەرلەرى، ونەرپازدارى، سپورتشىلارى اباي ولەڭىن جاتقا وقىپ، جارىسقا ءتۇستى دەۋگە بولادى.

الەم تانىعان ادامداردىڭ كەيبىرى ۇلى اقىننىڭ ولەڭىن وقىپ، ەستافەتانى ءوز ەلىمىزدەن شىققان تانىمال تۇلعالارعا ۇسىنعان. الايدا، كەيبىر ءوز ۇلاندارىمىز بۇعان قىزىعۋشىلىق تانىتپايتىن سەكىلدى.

جاقىندا اتاقتى "تاكسي" ءفيلمىنىڭ اكتەرى سامي ناسەري اباي ولەڭدەرىن وقۋ ەستافەتاسىنا قاتىستى. فرانتسۋز اكتەرى اباي قۇنانبايۇلىنىڭ "ساعاتتىڭ شىقىلداعى ەمەس ەرمەك" اتتى ولەڭىن فرانتسۋز تىلىندە وقىعان ەكەن.

ول ەستافەتانى مۇراگەر ساۋرانباەۆتان الىپ، قازاقستاندىق بوكسشى گەننادي گولوۆكينگە جولدادى.

- مەنىڭ اتىم سامي ناسەري. مەن فرانتسۋز اكتەرىمىن. دوسىم مۇراگەردەن جولداۋىن الدىم. سونداي-اق، جولداۋىمدى ارى قاراي تانىمال بوكسشى گەننادي گولوۆكينگە تاپسىرامىن", – دەدى اكتەر.

سامي ناسەري 25 تامىز كۇنى گولوۆكينگە ەستافەتانى جولداعان. ودان بەرى ون كۇن وتسە دە، قازاقستاندىق اتاقتى بوكسشى بۇعان ەلەڭ ەتە قويعان جوق.

گولوۆكيندى challenge-گە شاقىرعان جالعىز فرانتسۋز اكتەرى عانا ەمەس. 2 قىركۇيەك كۇنى قىتايلىق ميللياردەر، Alibaba ينتەرنەت-كورپوراتسياسىنىڭ نەگىزىن قالاۋشى دجەك ما دا ابايدىڭ ولەڭىن وقىپ، ەستافەتانى گەننادي گولوۆكينگە ۇسىندى.

دجەك ما قر-نىڭ قىتايداعى ەلشىسى شاحرات نۇرىشەۆتىڭ ەستافەتاسىن قابىل الىپ، قىتاي تىلىندە ابايدىڭ «قۇلاقتان كىرىپ، بويدى الار» ولەڭىن وقىدى.

- قۇرمەتتى دوستار، مەن دجەك مامىن. كەلەسى جىلى قازاقستاندا قازاقتىڭ ۇلى اقىنى جانە ويشىلى ابايدىڭ 175 جىلدىعى تويلانادى. بۇگىن مەن قازاقستاننىڭ قىتايداعى ەلشىسى نۇرىشەۆ مىرزادان ەستافەتانى قابىل الىپ، سىزدەرگە ابايدىڭ ولەڭىن وقىپ بەرەمىن,- دەدى ميللياردەر.

ودان بەرى دە ەكى-ءۇش كۇن ءوتتى. GGG تاعى ءۇنسىز. ءبىر ەمەس، ەكى بىردەي الەمگە ايگىلى شەتەلدىك اتىن اتاسا دا گولوۆكين ءۇن قاتپايتىن سەكىلدى. ءبىز بۇل جەردە گولوۆكين ەستافەتانى قابىلداپ، ولەڭ وقۋعا مىندەتتى دەمەيمىز. وعان بولا ەشتەڭە وزگەرمەيدى دە. بىراق، ءوز ەلىنىڭ پاتريوتى رەتىندە ءبىر مينۋتتىق ۆيدەو جاريالاۋ داڭقتى بوكسشى ءۇشىن اسا قيىن بولماس ەدى...

ايتا كەتەيىك، گولوۆكين 5 قازان كۇنى نيۋ-يورك قالاسىنداعى Madison Square Garden كەشەنىندە ۋكراينالىق بوكسشى سەرگەي دەرەۆيانچەنكومەن جەكپە-جەك وتكىزەدى. بۇل كەزدەسۋدە ورتا سالماقتاعى IBF تۇجىرىمىنىڭ بەلدىگى ساراپقا سالىنادى. 

قۋانىش قاپپاس

Abai.kz

3 پىكىر