ءسىا مەن «موسساد» حامەنەيدى ىزدەپ تابۋ ءۇشىن قۇپيا وپەراتسيا جۇرگىزىپ جاتىر

بولجام بويىنشا، ول تاسا جەردە تىعىلىپ، ءتورت ايدان استام ۋاقىت بويى تەلەفون مەن كومپيۋتەردى مۇلدە پايدالانباعان.

ءيزرايلدىڭ «موسساد» بارلاۋ قىزمەتى مەن امەريكانىڭ ءسىا (تسرۋ) ۇيىمى يراننىڭ جوعارعى ليدەرى اياتوللا مودجتابا حامەنەيدىڭ ىزىنە تۇسۋگە بىرلەسە كۇش سالۋدا. «راحباردى» تابۋ وپەراتسياسى بۇل ەكى ەلدىڭ ارنايى قىزمەتتەرىنىڭ باستى نازارىندا تۇر. بۇل تۋرالى The Times باسىلىمى بارلاۋ ۇيىمدارىنىڭ بۇرىنعى قىزمەتكەرلەرىنە سىلتەمە جاساپ حابارلايدى.

باسىلىمنىڭ جازۋىنشا، مودجتابا حامەنەي ءوزى كورىنبەي كەتسە دە، سوعىسقا قاتىستى شەشىمدەر قابىلداۋدا باستى ءرول اتقارىپ وتىر، سەبەبى يسلام رەۆوليۋتسياسى ساقشىلار كورپۋسىنا (يرسك) اسكەري ارەكەتتەردى زاڭداستىرۋ ءۇشىن ونىڭ ءسوزى اۋاداي قاجەت. سونىمەن بىرگە بارلاۋ قوعامداستىعىنىڭ كەيبىر وكىلدەرى ول قايتىس بولعان، ال يرسك ونىڭ اماندىعىن جاي عانا ەلەستەتىپ وتىر دەپ ەسەپتەيدى. «موسساد» حامەنەيدىڭ ءتىرى-ءولىسىن جانە قايدا تىعىلىپ جۇرگەنىن انىقتاۋعا تىرىسۋدا.

باسىلىمنىڭ مالىمەتىنشە، حامەنەي تەرەڭ تاسا جەردە جاسىرىنىپ، 150 كۇنگە جۋىق ۋاقىت بويى قولىنا تەلەفون الماعان جانە كومپيۋتەردى قولدانباعان.

«موسسادتىڭ» بولىمشەسىن باسقارعان بۇرىنعى شەنەۋنىك رامي يگرا: «مودجتابا تەلەفوندى پايدالانباۋى مۇمكىن، بىراق ەگەر ول امان بولسا، ونىڭ بايلانىسۋدىڭ باسقا جولدارى بار، ماسەلەن، كىشكەنتاي قاعاز قيىندىلارى سياقتى»، — دەيدى.

ونىڭ ايتۋىنشا، يران بيلىگى جوعارعى ليدەرگە حابارلاما جەتكىزۋ ءۇشىن كوپدەڭگەيلى كۋرەرلىك جەلىنى پايدالانادى. الايدا بۇل شابارماندار حاتتاردىڭ مازمۇنىن بىلمەي، تەك قولدان-قولعا بەرىپ وتىرادى.

يگرا حامەنەيگە جەتۋدىڭ جالعىز شىنايى جولى — ونىمەن تىكەلەي بايلانىستا جۇرگەن اگەنتتى وزىنە قاراتىپ الۋ (ۆەربوۆكا جاساۋ) ەكەنىن اتاپ ءوتتى.

«بۇل وتە قيىن، سەبەبى يراندا وعان جاقىن جۇرگەن ادامداردىڭ ءبارى قاتاڭ تەكسەرىستەن وتەدى. مۇمكىن يرسك-ءنىڭ ەكى نەمەسە ءۇش مۇشەسى عانا ونىمەن قالاي بايلانىسۋ كەرەگىن بىلەدى»، — دەپ قوستى «موسسادتىڭ» وتستاۆكاداعى قىزمەتكەرى.

«موسسادتىڭ» بۇرىنعى پودپولكوۆنيگى اۆنەر اۆراامنىڭ ايتۋىنشا:

«ول ءوز ءجۇزىن كورسەتپەسە دە، يران حالقىنا داۋىستىق حابارلاما ارقىلى ۇندەۋ جاساي الار ەدى. بىراق بۇل ونى قورعانسىز ەتەدى. سەبەبى داۋىستىق فايلدان دىبىس جازاتىن قۇرىلعىنىڭ ءتۇرىن نەمەسە جازبا جاسالعان ورىندى انىقتاپ الۋعا بولادى».

پەنتاگوننىڭ بۇرىنعى جوعارى لاۋازىمدى شەنەۋنىگى اقپان ايىنىڭ باسىنداعى اۋە سوققىسىنان كەيىن يراننىڭ قازىرگى جوعارعى ليدەرى ءوز قاۋىپسىزدىگىنە قاتتى كوڭىل بولە باستاعانىنا سەنىمدى. ايتا كەتەيىك، سولاقاي سوققىدان ونىڭ اكەسى الي حامەنەي قازا تاپقان بولاتىن.

سونىمەن قاتار امەريكا شەنەۋنىگى اقش بارلاۋىنىڭ مۇمكىندىكتەرىنە كۇمان كەلتىرىپ، يراننىڭ ءتورت ونجىلدىق بويى جابىق اۋماق بولىپ كەلگەنىن ەسكە سالدى. ول يزرايل بارلاۋىنىڭ الدەقايدا ءتيىمدى جۇمىس ىستەيتىنىن مويىنداعانىمەن، ولاردىڭ دا رەسۋرستارى شەكتەۋلى ەكەنىن ايتتى. ەگەر ارنايى قىزمەتتەر جوعارعى ليدەردىڭ ورنىن انىقتاي السا، ۋاشينگتون مەن يەرۋساليمگە ارى قاراي نە ىستەۋ كەرەكتىگى جونىندە وڭاي ەمەس شەشىم قابىلداۋعا تۋرا كەلەدى.

مودجتابا حامەنەيدىڭ بەينەجازبالارى مەن داۋىستىق حابارلامالارى جوقتىعىنا قاراماستان، سوڭعى ايلاردا ح الەۋمەتتىك جەلىسىندە ونىڭ اتىنان حابارلامالار جاريالانىپ تۇردى. راحباردىڭ ۇندەۋلەرىن يراننىڭ مەملەكەتتىك اگەنتتىكتەرى دە ءبولىستى. مىسالى، شىلدە ايىندا ونىڭ ح پاراقشاسىندا سوققىلار قايتا باستالعان سوڭ اقش پرەزيدەنتى دونالد ترامپتىڭ ءوزارا تۇسىنىستىك مەموراندۋمىنداعى قولى «ەشتەڭەگە تاتىمايدى» دەگەن جازبا شىقتى. سول حابارلامادا ول اقش-تى «ۇلى شايتان» دەپ اتادى. ونىڭ الدىندا، ماۋسىم ايىندا، سول الەۋمەتتىك جەلىدە حامەنەي يران پرەزيدەنتى ماسۋد پەزەشكياننىڭ كەپىلدىك بەرگەنىنىڭ ارقاسىندا مەموراندۋمعا قول قويۋدى ماقۇلداعانىن مالىمدەگەن بولاتىن.

مودجتابا حامەنەي اكەسى الي حامەنەي ناۋرىز ايىنىڭ باسىندا اقش پەن ءيزرايلدىڭ اسكەري وپەراتسياسىنىڭ العاشقى كۇندەرىندەگى سوققىسىنان قازا تاپقاننان كەيىن يراننىڭ جوعارعى ليدەرى بولدى. الي حامەنەي ەلدى 36 جىل بويى باسقارعان ەدى. رەزيدەنتسياعا جاسالعان اۋە سوققىسى سالدارىنان مودجتابا حامەنەيدىڭ ءوزى دە جارالانىپ، سودان بەرى حالىق الدىنا شىققان جوق.

Abai.kz