«قۋىرداقتىڭ كوكەسىن تۇيە سويعاندا كورەسىڭ» دەمەكشى، «يسلام ابىشەۆ ىسىندەگى» بىلىقتىڭ شىڭىن بۇگىن، سوت قۇرامى ءىس ماتەريالدارىن زەرتتەگەندە كوردىك.

«ابىشەۆ «قازبايلىقتان» پارا الۋعا وقتالدى، وعان تۇكيەۆ كومەكتەستى» دەپ «سىبايلاس جەمقورلىقپەن كۇرەس» ۇلتتىق بيۋروسى «شەدەۆر» ستسەناري جازدى. ول ستسەناريىنىڭ باستى رولىنە ازامات شايمەردەنوۆتى الدى... الايدا، باستى رولدەگى ازامات تا، قوسىمشا رولدەردەگى تەرگەۋشىلەر دە، پروكۋرور دا ءوز رولدەرىن «ءمىنسىز» ويناۋ ءۇشىن ساۋاتتارى دا، تالانتتارى دا جەتپەدى...
ولاردىڭ «ويىندارىنا» ستانيسلاۆسكي ايتقان «نە ۆەريۋ!» دەگەن ءسوزدى العاشقى كۇننەن باستاپ ادۆوكاتتار دا، ءبىز دە ايتىپ كەلەمىز...

وتىرىكتەرى بىرىنەن سوڭ ءبىرى اشىلىپ، ماسقارا بوپ جاتىر.

1. ايىپتاۋ جاعى شاقىرعان جيىرما شاقتى كۋانىڭ ءبارى دە ابىشەۆ پەن تۇكيەۆتىڭ پايداسىنا جاۋاپ بەردى. ياعني ول كىسىلەردىڭ قىلمىسىن دالەلدەيتىن بىردە-ءبىر ءسوز ايتقان جوق. كەرىسىنشە، قىلمىسكەر ەمەس ەكەنىن ايعاقتايتىن اڭگىمەلەر ايتىلدى.

2. ايىپتاۋ جاعىنىڭ ەڭ نەگىزگى، باستى كۋاگەرى اسىلجان جامپوزوۆ تا ءوز جاۋابىندا ۇلتتىق بيۋرو قىزمەتكەرلەرىنىڭ قيتۇرقىلىقتارىن دالەلدەپ بەردى.

3. ارىزدانۋشى ازامات شايمەردەنوۆتىڭ ءوزى ادۆوكاتتاردىڭ سۇراقتارىنا دالەلدى جاۋاپ بەرە الماي، ابدەن ساستى. بۇگىن تەرگەۋ ماتەريالدارىن زەرتتەۋ بارىسىندا ادۆوكاتتار شايمەردەنوۆتىڭ ءار حاتتامادا ءارتۇرلى جاۋاپ بەرگەنىنە سوت نازار اۋدارۋىن ءوتىندى.

4. ەڭ قىزىعى، پارا بەرگىسى كەلگەن «قازبايلىق» فيرماسىنىڭ ديرەكتورى ماكىشەۆتىڭ ول فيرماعا مۇلدە قاتىسى بولماي شىقتى.

5. تەرگەۋ جۇمىسى كەزىندە اتتاپ باسقان سايىن زاڭ بۇزۋشىلىققا جول بەرىلگەندىگىن ءتىزىپ جازىپ تاۋىسۋ مۇمكىن ەمەس!

6. ۇلتتىق بيۋرونىڭ ارانداتۋشىلىقپەن اينالىسقانىن، و باستان ابىشەۆكە تۇزاق قۇرۋعا جوسپارلى تۇردە كىرىسكەندەرىن ايتپاي-اق قويايىق...

7. ءبارىن ايت تا، ءبىرىن ايت - بۇگىن ونسىز دا «شوكتا» جۇرگەن ءبارىمىزدى ودان سايىن «شوك» قىلعان جاڭالىق - «قازبايلىقتان پارا الۋعا وقتالعانى تۋرالى» شايمەردەنوۆتىڭ ارىزى ەردردا (ەدينىي رەەستر دوسۋدەبنوگو راسسلەدوۆانيا) تىركەلمەگەن بوپ شىقتى. تىركەلگەنى - «2014 جىلى 1 ملن دوللار پارا الدى» دەگەن ارىزى. ول ارىز دالەلدەنبەگەندىكتەن، «قىلمىس قۇرامى بولماۋىنا بايلانىستى» قىسقارتىلعان. بىراق «قازبايلىقتان پارا الۋعا وقتالدى» دەپ، ەكى زەينەتكەردى 8 اي بويى قاپاستا ۇستاپ وتىرعان 50 ملن تەڭگەلىك ءىس بويىنشا ارىز «سوتقا دەيىنگى بىرىڭعاي تەرگەۋ رەەسترىندە» تىركەلمەگەن.

ال بۇل جەردە اناۋ-مىناۋ ازاماتتىق نە اكىمشىلىك ءىس ەمەس، قىلمىستىق ءىس قوي!
ءتىپتى، شايمەردەنوۆتىڭ «پارا الۋعا وقتالعانى تۋرالى ارىزى» تىركەلمەگەن دە!

ال سانكتسيا الاردا تىركەلىپ، قىسقارىپ كەتكەن ىسكە العان دا، تىركەلمەگەن ءىس بويىنشا قاماۋعا العان!

بىراق تىركەلمەگەن، ءتۇبىرى جوق ىسپەن ۇلتتىق بيۋرو، ودان كەيىن پروكۋراتۋرا، ەندى مىنە، سوت - 8 ايدان بەرى اينالىسىپ، ەلگە ەرەن ەڭبەگى سىڭگەن ەكى ارىسىمىز 8 ايدان بەرى تۇرمەدە وتىر!

بۇگىنگى ءىس ماتەريالدارىن زەرتتەۋ بارىسىندا جانە ادۆوكاتتاردىڭ ايتقانىنان مەنىڭ تۇسىنگەندەرىم، قىسقاشا ايتقاندا، وسىلار.

شىرىگەن جۇيە ەمەي نەمەنە؟!.. الدىڭعى تىكەلەي ەفيردە (ۆيدەودا) ادۆوكاتتار ءتۇسىندىرىپ ايتتى. تىڭداپ كورىڭىزدەر...قانداي باسسىزدىقتار ورىن الىپ جاتقانىن حالىق كوپتەپ بىلگەنى دۇرىس.

ساۋلە ابەدينوۆا

قوسىمشا: Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر الماستىرۋعا اركىم قۇقىلى. جوعارىداعى سپيكەردىڭ پىكىرى رەداكتسيا ۇستانىمىن بىلدىرمەيدى. الداعى ۋاقىتتا ماقالادا ەسىم-سويلارى اتالعان جەكەلەگەن ازاماتتار رەداكتسيامىزعا جاۋاپ بەرۋگە نيەتتى بولسا، ولاردىڭ دا پىكىرىن بەرۋگە ءازىرمىز. 

Abai.kz