2020 جىلى مەكتەپتەرگە لاتىن ءالىپبيى ەنگىزىلمەيدى. بۇل تۋرالى سەناتتىڭ جالپى وتىرىسىندا ءبىلىم جانە عىلىم ءمينيسترى اسحات ايماعامبەتوۆ مالىمدەدى.

ايماعامبەتوۆتىڭ ايتۋىنشا، جاڭا ءالىپبيدىڭ ءالى دە جەتىلدىرەتىن تۇستارى بار. ونى اياقتاۋ قازىر مادەنيەت مينيسترلىگىنە جۇكتەلگەن. سوندىقتان، ءالىپبيدىڭ ناقتى نۇسقاسى بەكىتىلگەننەن كەيىن عانا ءبىلىم مينيسترلىگى ءتيىستى جۇمىستار جۇرگىزبەك. ال، ازىرگە بۇل جايلى ايتۋعا ەرتە دەيدى مينيستر.

ونىڭ ايتۋىنشا، ءالفاۆيتتىڭ تۇپكىلىكتى جانە بەكىتىلگەن نۇسقاسى جوق. سوندىقتان، "2020 جىلى ءبىز مەكتەپتەردە لاتىن تىلىنە كوشەمىز دەپ ايتۋدىڭ قاجەتى جوق"

اسحات ايماعامبەتوۆ، بجعم ءمينيسترى:

-بۇل ۇزاق پروتسەسس. الدىمەن ونى بەكىتۋ كەرەك. وزىندىك ەرەجەلەرى بولادى. وعان بىرتە-بىرتە كوشەدى. سودان كەيىن ءبىز ءتيىستى دايىندىقتى جۇرگىزۋىمىز كەرەك. سوندا عانا وقۋ قۇرالدارى مەن وقۋلىق دايىندالادى. ياعني، بۇل كوپ جۇمىس. وسى جۇمىستار اتقارىلعاننان كەيىن عانا لاتىن ءالىپبيىن ەنگىزەمىز.

ەسكە سالا كەتەيىك، ەلىمىزدە 2025 جىلعا قاراي بارلىق ءىس قاعازداردى لاتىن گرافيكاسىنا كوشىرۋ جوسپارلانعان. وسى جىلدىڭ اقپان ايىندا جوبا جاسالىپ، 2019 جىلى حالىقتى جاڭا ەملە بويىنشا وقىتۋ جانە وسىعان مۇعالىمدەردى دايارلاۋ جوسپارلانعان بولاتىن.

ال، بۇرىنعى ءبىلىم جانە عىلىم ءمينيسترى ەرلان ساعاديەۆ "2020 جىلدىڭ قىركۇيەگىنەن باستاپ مەكتەپالدى دايارلىق سىنىبىندا وقيتىن بالالار لاتىن تىلىنە كوشەدى" دەگەن بولاتىن. الايدا، وسى جىلدىڭ قازان ايىندا مەملەكەت باسشىسى قاسىم-جومارت توقاەۆ لاتىن گرافيكاسىنداعى قازاق ءالىپبيىن جەتىلدىرۋدى تاپسىردى.

Abai.kz