ولار وتكەن اپتانىڭ سوڭىندا ۇقك توراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆتىڭ اتالعان ەكى قازاق قىتايعا قايتارىلاتىنى جايلى سوزىنە نارازىلىق ءبىلدىردى.
وزدەرىن "قازاقستاننىڭ دەموكراتيالىق پارتياسىن قۇرۋشى باستاماشىل توپ" رەتىندە تانىستىرعان قوعام بەلسەندىلەرى "قاستەر مەن مۇراگەردى قىتايعا قايتارۋعا بولمايدى، ولار قىتايدا ءولىم جازاسىنا كەسىلۋى مۇمكىن", - دەپ سانايدى.
جانبولات ماماي 2009 جىلى شىڭجاڭداعى ەتنيكالىق ۇيعىرلار قارسىلىعى كۇشپەن باسىلعاننان كەيىن قازاقستاننان پانا سۇراپ كەلگەن ۇيعىر ازاماتى ارشيدين يسرايلدىڭ حابارسىز كەتكەنىن ەسكە سالدى.
- ارشيدين يسرايل تەلەفون، ينتەرنەت ارقىلى شىڭجانداعى باسسىزدىقتار تۋرالى الەمگە اقپارات تاراتتى. 2010 جىلى باسىنا قاتەر تونگەننەن كەيىن قازاقستان شەكاراسىنان زاڭسىز ءوتتى. قازاقستان ونى دەرەۋ تۇرمەگە قاماپ، 2011 جىلى قىتايعا قايتارىپ بەردى. ول ازاماتتىڭ سودان كەيىنگى تاعدىرى بەلگىسىز، - دەدى ماماي.
ساياساتكەر تولەگەن جۇكەەۆ "ەكى ەتنيكالىق قازاقتى قورعاۋ – قازاق قوعامىنىڭ بورىشى" دەپ سانايدى.
- ەگەر قازىر ولارعا قورعان بولا الماساق، كەيىن ءوزىمىزدى دە قورعاي المايمىز. ءبىز سايراگۇل ساۋىتبايدى قورعاي المادىق. ولار شەكارانى ەرىككەننەن كەسىپ وتپەيدى، امالسىزدان زاڭسىزدىققا بارادى، - دەيدى ول.
ءباسپاسوز جيىنىن وتكىزگەندەردىڭ ايتۋىنشا، ەتنيكالىق ەكى قازاقتىڭ ءىسى سوتقا جەتپەي تۇرىپ ۇقك-ءنىڭ مالىمدەمە جاساۋىن قۇپتاۋعا بولمايدى.
جەلتوقساننىڭ التىسىنا ۇقك توراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ قاستەر مۇساحان مەن مۇراگەر ءالىمۇلىنىڭ قىتايعا قايتارىلاتىنىن حابارلاعان ەدى.
Abai.kz
