قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي نۇرعاليۇلى تاسماعامبەتوۆ كەشە 63 جاسقا تولدى. ال كەشەلى-بەرى الەۋمەتتىك جەلىدە يمانعالي تاسماعامبەتوۆ زەينەت جاسىنا تولۋىنا بايلانىستى ەلشىلىك قىزمەتىنەن كەتەدى ەكەن دەگەن گۋ-گۋ اڭگىمە تارادى.

ەربول ەدىلوۆ دەيتىن ازامات Telegram جەلىسىندە  "نە گرۋستنىي پرازدنيك" اتتى جازبا جاريالادى. وندا زەينەت جاسىنا جەتكەن يمانعالي نۇرعاليۇلىنىڭ ساياسي قىزمەتى مەن زەينەتى تۋرالى ازدى-كەم شولۋ جاساپ، بولجام ايتىپتى.

رەسەيدەگى ەلشىلىككە تىزگىنشىلىك ەتىپ جۇرگەن يمانعالي تاسماعامبەتوۆتىڭ زەينەت جاسىنا تولۋىن تىلگە تيەك ەتە وتىرىپ: "ساياساتكەر ءۇشىن بۇل ءبىر ەڭ بەلسەندى جۇمىس جاسايتىن جاس دەسەك تە، تاعايىندالاتىن مەملەكەتتىك قىزمەتتى اتقارۋعا شەكتەۋ قوياتىن زاڭناماعا ەشتەڭە ىستەي المايسىڭ", دەپ جازدى.

ءسوز اراسىندا زەينەتپەن بىرگە مەم-قىزمەتتەن دە بىرگە كەتكەن ابىقاەۆ، جاقسىبەكوۆ، مۋسيندەردى مىسال ەتىپتى. زەينەتكە كەتۋى كەرەك دەگەن ەسىموۆ، كوشەرباەۆ پەن ساراپباەۆتاردى دا ءسوز ەتكەن. ءسويتىپ، ولاردىڭ زەينەتكە شىعىپ، مەملەكەتتىك قىزمەتتەن كەتۋى - "اعاشكالار ءداۋىرىنىڭ" اياقتالۋىن بىلدىرەدى دەگەن اۋانداعى پىكىرىن ايتقان.

ەربول ەدىلوۆتىڭ ايتۋىنشا، زەينەت جاسىنا تولعان سوڭ، يمانعالي نۇرعاليۇلى مەملەكەتتىك قىزمەتتەن كەتۋ تۋرالى شەشىمگە كەلگەن-مىس. بۇل ناقتى اقپارات بولماعان سوڭ، ءبىز بۇنى ەدىلوۆتىڭ بولجامى دەپ قابىلدادىق.

يمانعالي نۇرعاليۇلى قازاقستان پرەزيدەنتىنىڭ كومەكشىسى، پرەزيدەنتتىڭ ءبىرىنشى كومەكشىسى، قازاقستاننىڭ ۆيتسە-پرەمەرى، بۇرىنعى ءبىلىم جانە مادەنيەت ۆيتسە-ءمينيسترى، اتىراۋ وبلىسىنىڭ اكىمى، قازاقستاننىڭ ۇكىمەت باسشىسى، قازاقستاننىڭ مەملەكەتتىك حاتشىسى، پرەزيدەنت اكىمشىلىگىنىڭ جەتەكشىسى، الماتى مەن استانا قالالارىنىڭ اكىمى، قر قورعانىس ءمينيسترى ت.ب. قىزمەتتەردى اتقاردى. قازىر قازاقستاننىڭ رەسەيدەگى توتەنشە جانە وكىلەتتى ەلشىسى.

سونىمەن، ەربول ەدىلوۆ ەسىمدى شولۋشى ءوز پىكىرىن ايتىپتى. بولجامىن جاساپتى. ونىڭ ويىنشا، يمانعالي تاسماعامبەتوۆ كوپ وتپەي، زەينەتكە كەتىپ، مۋسين، ابىقاەۆ، جاقسىبەكوۆتەردىڭ قاتارىنا قوسىلادى-مىس. بۇل انىق ەمەس. تەك سۋبەكتيۆتى بولجام عانا.

ال ءبىز وسى رەتتە ەل بيلىگىندەگى زەينەتكەرلەر وتريادىن ءبىر تۇگەندەپ شىققاندى ءجون كوردىك. شولۋشى ەربول ەدىلوۆ ءوز پىكىرىندە "زەينەتكەرلەرگە مەم-قىزمەتتە بولۋعا زاڭ شەكتەۋ قويادى" دەپتى. سولاي ما؟  ەندەشە قاراڭىز...

ماسەلەن، مەملەكەتتىك حاتشى قىرىمبەك كوشەرباەۆ. قازىر - 64 جاستا. قىرىمبەك ەلەۋۇلى دا قىرۋار قىزمەتتىك كابينەت اۋىستىرعان ادامداردىڭ ءبىرى. بىرنەشە مينيسترلىكتى باسقاردى. قىزىلوردا، باتىس قازاقستان، ماڭعىستاۋ وبلىستارىن باسقاردى. رەسەيدە ەلشى دە بولدى.

بەردىبەك ساپارباەۆ - 66 جاستا. قر پرەمەر ءمينيسترىنىڭ ورىنباسارى. بىرنەشە وبلىستا اكىم، بىرنەشە مينيسترلىكتە مينيستر بولعان ادام.

اماندىق باتالوۆ - 67 جاستا. الماتى وبلىسىنىڭ اكىمى.

دانيال احمەتوۆ - 65 جاستا. شىعىس قازاقستان وبلىسىنىڭ اكىمى.

بۇدان بولەك، الدەقاشان زەينەت جاسىنا تولسا دا قىزمەتىنەن كەتپەي جۇرگەن دەپۋتاتتار دا جەتەرلىك.  سەنبەسەڭىز، قاراڭىز:

ماجىلىستەگى زەينەتكەر اتالار:

ۆلاديسلاۆ كوسارەۆ - 1937 جىلى تۋعان. جاسى 82-دە.

قۋانىش سۇلتانوۆ - 1945 جىلى تۋعان. جاسى 74-تە.

تۇرعىن سىزدىقوۆ - 1947 جىلى تۋعان. جاسى 72-دە.

باقتىقوجا ىزمۇحامبەتوۆ - 1948 جىلى تۋعان. جاسى 71-دە.

ۆلاديمير بوجكو - 1949 جىلى تۋعان. جاسى 70-تە.

قابيبوللا جاقىپوۆ - 1949 جىلى تۋعان. جاسى 70-تە.

سەرىك ۇمبەتوۆ - 1950 جىلى تۋعان. جاسى 69-دا.

شايماردان نۋرۋموۆ - 1950 جىلى تۋعان. جاسى 69-دا.

جەكسەنباي دۇيسەباەۆ - 1950 جىلى تۋعان. جاسى 69-دا.

ساۋىتبەك ءابدىراحمانوۆ - 1951 جىلى تۋعان. جاسى 68-دە.

احمەد مۋرادوۆ - 1951 جىلى تۋعان. جاسى 68-دە.

اباي تاسبولاتوۆ - 1951 جىلى تۋعان. جاسى 68-دە.

جانات جاراسوۆ - 1951 جىلى تۋعان. جاسى 68-دە.

ەرسۇلتان بەكتۇرعانوۆا -1952 جىلى تۋعان. جاسى 67-دە.

ءبايدىلدا جىلقىشيەۆ - 1952 جىلى تۋعان. جاسى 67-دە.

باقىتجان ەرتاەۆ - 1952 جىلى تۋعان. جاسى 67-دە.

ومارحان وكسىكباەۆ - 1954 جىلى تۋعان. 22 جەلتوقساندا اسى 65-كە تولادى.

ميحايل چيركوۆ - 1954 جىلى تۋعان. جاسى 65-تە.

اسقار بازارباەۆ -1954 جىلى تۋعان. جاسى 65-تە.

رومان كيم - 1955 جىلى تۋعان. جاسى 64-تە.

ماجىلىستەگى زەينەتكەر اپالار:

گۇلجان قاراقۇسوۆا - 1950 جىلى تۋعان. جاسى 69-دا.

گالينا بايماحانوۆا - 1952 جىلى تۋعان. جاسى 67-دە.

ەكاتەرينا نيكيتينسكايا - 1955 جىلى تۋعان. جاسى 64-تە.

مايرا ايسينا - 1956 جىلى تۋعان. جاسى 63-تە.

سۆەتلانا بىچكوۆا - 1957 جىلى تۋعان. جاسى 62-دە.

گۇلميرا يسيمباەۆا - 1957 جىلى تۋعان. جاسى 62-دە.

يرينا ارونوۆا - 1957 جىلى تۋعان. جاسى 62-دە.

زاعيپا باليەۆا - 1958 جىلى تۋعان. جاسى 61-دە.

قۇرالاي قارەكەن - 1958 جىلى تۋعان. جاسى 61-دە.

تاتيانا ياكوۆلەۆا - 1958 جىلى تۋعان جاسى 61-دە.

زاۋرەن امانجولوۆا - 1958 جىلى تۋعان. جاسى 61-دە.

سەناتتاعى زەينەتكەرلەر:

قۇرمەتتى سەناتور: نۇرسۇلتان نازارباەۆ. 1940 جىلى تۋعان. جاسى 79-دا.

تولەۋبەك مۇقاشەۆ. 1950 جىلى تۋعان. جاسى 69-دا.

بەكمىرزا ەلامانوۆ. 1950 جىلى تۋعان. جاسى 69-دا.

تالعات مۇساباەۆ. 1951 جىلى تۋعان. جاسى 68-دە.

مارات تاعىموۆ. 1952 جىلى تۋعان. جاسى 67-دە.

باقىتجان جۇماعۇلوۆ. 1953 جىلى تۋعان. جاسى 66-دا.

راشيت اكىموۆ. 1954 جىلى تۋعان. جاسى 65-تە.

ۆلاديمير ۆولكوۆ. 1955 جىلى تۋعان. جاسى 64-تە.

بەكتاس بەكنازاروۆ. 1956 جىلى تۋعان. جاسى 63-تە.

اسقار شاكىروۆ. 1956 جىلى تۋعان. جاسى 63-تە.

سەرىك جاقسىبەكوۆ. 1956 جىلى تۋعان. جاسى 63-تە.

داۋرەن ادىلبەكوۆ. 1956 جىلى تۋعان. جاسى 63-تە.

عۇمار دۇيسەمباەۆ. 1956 جىلى تۋعان. جاسى 63-تە.

مۇحتار جۇماعازيەۆ. 1956 جىلى تۋعان. جاسى 63-تە.

ەرىك سۇلتانوۆ. 1956 جىلى تۋعان. جاسى 63-تە.

سونىمەن، رەسەيدەگى ەلشى يمانعالي تاسماعامبەتوۆ تە زەينەت جاسىنداعىلاردىڭ قاتارىنا قوسىلدى. دەسەك تە، ول - يمانعالي تاسماعامبەتوۆ مەملەكەتتىك قىزمەتتەن كەتتى دەگەن ءسوز ەمەس. "كەتەمىن" دەپ ءوزى، "كەتەدى" دەپ اقوردا ايتقان جوق. ازىرگە ەل اۋزىنداعى اڭگىمە - بولعانى بولجام عانا.

ال جوعارىداعى ساياسي ماندات يەلەرىنىڭ ۇزىن-سونار تىزىمىنە كوز جۇگىرتسەك، 2 وبلىس اكىمى، 1 مينيستر جانە ءماجىلىس پەن سەناتتاعى 45 دەپۋتات قازىردىڭ وزىندە زەينەتكەر ەكەن. ەندەشە، "تاسماعامبەتوۆ زەينەت جاسىنا تولدى" دەپ قارا اسپاندى ءتوندىرۋ جانە قيسىنسىز... ءاسىلى، يمانعالي تاسماعامبەتوۆ ءدال وسى سەبەپپەن قىزمەتتەن كەتسە - دەمەك، قالعاندارى دا سولاي ىستەۋى ادىلەتتى بولماق...

نۇربيكە بەكسۇلتانقىزى

Abai.kz