سوڭعى بىرەر اپتادان بەرى قارجاۋباەۆتىڭ قايدا جۇرگەنى مەنى قىزىقتىرا باستادى. كەشەگى جەلتوقساندا قايرات رىسقۇلبەكوۆكە قيانات جاساپ، ءسابيت يسابەكتەرگە وتىرىك كاۋلىك بەرگەن ن. قارجاۋباەۆ! (بۇل ساتقىننىڭ اتىن انىقتاۋ ازىرگە مۇمكىن بولماي تۇر). بىراق، جەر جۇتىپ كەتپەگەن بولسا ول پەندەنىڭ ءبىر جەردە جۇرگەنى انىق. جەلتوقسان جاقىنداعان سايىن ءوز ايىبىنان ءوزى ۇيالىپ، كىرەرگە تەسىك تاپپاي جۇرگەن بولسا، ونى انىقتايىق. بالكىم، ونىڭ دا ءوز ايتارى بار شىعار. قالاي بولعاندا دا اقيقات ايتىلۋى ءتيىس.

قاي قوعامدا دا قىلمىسكەر جازاسىز قالعان ەمەس. ءبىزدىڭ پايىمداۋىمىزشا، قارجاۋباەۆ – قىلمىسكەر! بولماعاندى بولدى دەپ، جازىقسىز جانعا جالا جاۋىپ، وتىرىك كۋالىك ەتۋ ارقىلى ءبىر ادامنىڭ ولىمىنە سەبەپكەر بولىپ وتىر. جانە وعان سانالى تۇردە باردى.

قايرات رىسقۇلبەكوۆتىڭ ەرلىگىن ۇلىقتاپ، رۋحىنا تاعزىم ەتەتىندەر ونىڭ ولىمىنە سەبەپشى بولعان ساتقىنداردىڭ جازاسىن بەرۋى ءتيىس. شىن مانىندە ادىلەتتى قوعام ورناتقىمىز كەلسە، بۇگىندە ءار جەردە بۇقپانتايلاپ جۇرگەن قارجاۋباەۆتاردى تابۋىمىز كەرەك. جانە ساتقىندىقتىڭ ءتۇبى جاقسى بولمايتىنىن جاس ۇرپاقتىڭ ساناسىنا سىڭىرە بىلەيىك.

سوندا عانا اركىم ءوزىنىڭ ارىنىڭ الدىندا ادال بولۋعا ارەكەت ەتەدى.