قىرعىزستان پرەزيدەنتى سوورونباي جەەنبەكوۆ تاجىكستانعا تەرريتوريا الماسۋدى ۇسىندى. بۇل تۋرالى Ca-news سايتى جازعان. 

سوورونباي جەەنبەكوۆ تاجىكستانمەن شەكارالاس داۋلى ايماقتارعا قاتىستى مالىمدەمە جاساپ، قاجەت بولعان جاعدايدا، رەسمي بىشكەك دۋشانبەمەن جەر الماسۋعا دايى ەكەنىن ايتقان.

-قىرعىزستان بۇل جۇمىسقا دايىن. ۆيتسە-پرەمەر رازاقوۆ باستاعان كوميسسيا، پرەمەر-مينيستر جانە مەن ءوز باعىتىمىزدى ايقىندادىق. ءبىز ارىپتەستىككە شاقىرۋدامىز. قاجەت بولسا، تەرريتوريالارمەن الماسۋعا دايىنبىز. بارلىق نۇسقالاردى قارايىق. تۇرعىندارمەن سويلەسەيىك. بىراق شىندىعىن ايتقاندا، جۇمىس ءبىز قالاعانداي ەمەس، وتە باياۋ جۇرۋدە. بۇل ماسەلەنى شەشۋدىڭ 3 جولى بار. ونىڭ ەڭ ءتيىمدىسى ەكىجاقتىڭ كوزقاراستارىن ەسكەرە وتىرىپ كەلىسسوزدەر جۇرگىزۋ. ءبىز قازىر وسى جولمەن كەلەمىز، - دەدى جەەنبەكوۆ.

ايتا كەتەيىك، قىرعىزستان مەن تاجىكستاننىڭ شەكارالىق اۋداندارىندا جەرگىلىكتى حالىق اراسىندا كيكىلجىڭ ءجيى بولىپ تۇرادى. جەلتوقسان ايىنىڭ باسىندا عانا شەكارالىق ايماقتا ورنالاسقان كوك-تاش اۋىلىندا قىرعىزدار مەن تاجىكتەر اراسىندا قاقتىعىس بولىپ، تاراپتار ءبىر-ءبىرىن تاسپەن اتقىلاعان.

Abai.kz