بۇگىن قازاقستان پرەزيدەنتى «اباي جانە XXI عاسىرداعى قازاقستان» اتتى ماقالاسى جاريالاندى. مەملەكەت باسشىسى اتالعان ماقالاسىندا ۇلى اقىننىڭ 175 جىلدىعىنا وراي وتكىزىلەتىن ءىس-شارالار جونىندە اتاپ ءوتتى.

رەسپۋبليكا بويىنشا ۇزىن-ىرعاسى 500-دەن استام شارا ۇيىمداستىرىلادى. سولاردىڭ ءبىرسىپىراسى پرەزيدەنت ماقالاسىندا ايتىلعان. ەندى رەت-رەتىمەن جازايىق...

1. ەڭ باستى شارا - «اباي مۇراسى جانە الەمدىك رۋحانيات» اتتى حالىقارالىق عىلىمي-پراكتيكالىق كونفەرەنتسيا

تامىز ايىندا سەمەي قالاسىندا يۋنەسكو-مەن بىرلەسىپ وتكىزىلەتىن «اباي مۇراسى جانە الەمدىك رۋحانيات» اتتى حالىقارالىق عىلىمي-پراكتيكالىق كونفەرەنتسيا ەڭ باستى شاراعا اينالادى.

2. «اباي جانە رۋحاني جاڭعىرۋ ماسەلەلەرى» اتتى حالىقارالىق كونفەرەنتسيا

قازان ايىندا نۇر-سۇلتان قالاسىندا «اباي جانە رۋحاني جاڭعىرۋ ماسەلەلەرى» دەگەن تاقىرىپتا حالىقارالىق كونفەرەنتسيا وتەدى. بۇل جيىنداردا ابايدىڭ تۇلعاسى مەن مۇراسى جان-جاقتى زەردەلەنىپ، ونىڭ شىعارماشىلىعىن ءححى عاسىرداعى جاڭا قازاقستاننىڭ يگىلىگىنە پايدالانۋعا جول اشىلادى.

3. اباي شىعارمالارى الەمنىڭ 10 تىلىنە اۋدارىلادى

ۇلى اقىننىڭ شىعارمالارى ون تىلگە اۋدارىلىپ، باسىپ شىعارىلادى. اتاپ ايتقاندا، اباي ەڭبەكتەرى اعىلشىن، اراب، جاپون، يسپان، يتاليان، قىتاي، نەمىس، ورىس، تۇرىك، فرانتسۋز تىلدەرىنە ءتارجى­ما­لانادى.

4. «اباي» تەلەسەريالى تۇسىرىلەدى

اقىننىڭ ءومىرى، مۇراسى، قازاق مادەنيەتىن دامىتۋداعى ءرولى تۋرالى بىرنەشە دەرەكتى فيلم جانە «اباي» تەلەسەريالى تۇسىرىلەدى.

5. مەم­لە­كەت­تىك سىيلىق ەندى «اباي اتىن­داعى مەم­لەكەتتىك سىيلىق» دەپ اتالادى 

اقىن تويىنا وراي رەسپۋبليكالىق جانە حا­لىق­ارالىق دەڭگەيدە تەاتر جانە مۋزىكا فەستيۆالدارى وتەدى. بيىلعى ءباي­گەلەر اباي شىعارماشىلىعىنا ار­نا­لادى. ادەبيەت جانە ونەر سالاسىن­داعى ۇزدىك شىعارمالارعا بەرىلەتىن مەم­لە­كەت­تىك سىيلىق ەندى «اباي اتىن­داعى مەم­لەكەتتىك سىيلىق» دەپ اتالاتىن بولادى.

6. قازاقستاننىڭ ەلشىلىكتەرى جانىنان «اباي ورتالىقتارى» قۇرىلادى

ابايدىڭ تۇلعاسى مەن مۇرا­سىن ۇلىق­تاۋ شەتەلدەردە دە جالعا­سادى. رەسەيدەگى، فرانتسياداعى، ۇلىبري­­تا­نيا­دا­عى جانە باسقا دا مەملەكەتتەردەگى قازاق­­ستاننىڭ ەلشىلىكتەرى جانىنان «اباي ورتالىقتارىن» قۇرۋ جوس­پار­لا­نىپ وتىر.

7. اق­شوقى ەلدى مەكەنىندەگى قۇنانباي وسكەن­­بايۇلى اۋلەتىنىڭ قورىمى اباتتاندى­رىلادى

شىعىس قازاقستان وبلىسىنىڭ اق­شوقى ەلدى مەكەنىندەگى قۇنانباي وسكەن­­بايۇلى اۋلەتىنىڭ قورىمى اباتتاندى­رىلادى.

سونىمەن قاتار مەملەكەت باسشىسى اباي تۇل­عاسىن جوعا­رى دارەجەدە دارىپتەۋ ءۇشىن ۇكىمەتكە بىرقاتار تاپسىرمالار بەردى.

8. سەمەي قالاسىن الەۋمەتتىك-ەكو­نو­مي­كالىق تۇرعىدان كەشەندى دامىتۋ جۇمىستارى قولعا الىنادى

«سەمەي ءوڭىرى – قازاق تاريحىنداعى كيەلى ولكەنىڭ ءبىرى. سوندىقتان ەلدىڭ رۋحاني دامۋىندا ەرەكشە ورنى بار سەمەي قا­لاسىن تاريحي ورتالىق رەتىندە بەلگى­لەگەن ءجون. ۇلى اباي مەن شاكارىم­نىڭ، مۇحتار اۋەزوۆتىڭ كىندىك قانى تام­عان ءوڭىر ايرىقشا قۇرمەتكە لايىق. وسى­عان وراي شاھاردى الەۋمەتتىك-ەكو­نو­مي­كالىق تۇرعىدان كەشەندى تۇردە دامى­تىپ، ونداعى تاريحي-مادەني نىساندار­دى جاڭا تالاپقا ساي جاڭعىرتامىز. ۇكى­مەتكە بۇل ماسەلەگە بايلانىستى ءتيىستى شارالار قابىلداۋدى تاپسىرامىن»، دەلىنگەن پرەزيدەنت ماقالاسىندا.

9. جيدەبايدا «اباي مۇراسى» اتتى جاڭا عي­مارات سالىنادى

مەرەيتوي جىلى اياسىندا ابايدىڭ قاستەرلى مەكەنى – ايگىلى جيدەبايدى اباتتاندىرىپ، ۇلى اقىننىڭ رۋحىنا تاع­زىم ەتۋگە كەلەتىن جۇرتشىلىققا قولاي­لى جاعداي جاسالاتىن بولادى.

سونىمەن قاتار ابايدىڭ «جيدە­باي-ءبورىلى» مەملەكەتتىك تاريحي-ءما­دەني جانە ادەبي-مەموريالدىق قورىق-مۋزەيىنە ەرەكشە كوڭىل ءبولىپ، عىلىمي-تانىمدىق جۇمىستارمەن اينالىساتىن ورتالىققا اينالدىرۋ قولعا الىنادى.

«جيدەبايدا مۋزەيگە ارنايى لايىق­تالعان «اباي مۇراسى» اتتى جاڭا عي­مارات سالۋ قاجەت»، دەلىنگەن ماقالادا.

10. «اباي» جۋرنالىنا مەملەكەت تاراپىنان قولداۋ كورسەتىلەدى

«1918 جىلى سەمەي قالاسىندا مۇحتار اۋەزوۆ پەن جۇسىپبەك ايماۋىتوۆ نەگى­زىن قالاعان، 1992 جىلدان بەرى قايتا شىعا باستاعان «اباي» جۋرنالىنا مەملەكەت تاراپىنان قولداۋ كورسەتۋ كەرەك»، دەدى قازاقستان پرەزيدەنتى.

وسى جانە باسقا دا اۋقىمدى شارالار ۇلى ابايدىڭ رۋحىنا تاعزىم ەتىپ، ونىڭ مول مۇراسىن دارىپتەۋ ءۇشىن وتكى­زىلمەك.

Abai.kz