سەنبى, 31 قازان 2020
COVID-19 قازاقستاندا. جۇقتىرعاندار — 111953. جازىلعاندار — 106310. قايتىس بولعاندار — 1825
اكىمنىڭ ءىسى 2455 11 پىكىر 16 قاڭتار, 2020 ساعات 16:30

ۇقك: بولات باقاۋوۆ قىزمەتىن اسىرا پايدالاندى دەگەن كۇدىككە ءىلىندى

قر ۇلتتىق قاۋىپسىزدىك كوميتەتى پاۆلودار وبلىسىنىڭ اكىمى بولات باقاۋوۆتىڭ ۇستىنەن ءىس قوزعاپ، جەدەل تەرگەۋ جۇمىستارىن جۇرگىزىپ جاتىر. بۇل تۋرالى ۇلتتىق قاۋىپسىزدىك كوميتەتى حابارلادى.

پاۆلودار وبلىسىنىڭ اكىمى بولات باقاۋوۆقا قاتىستى قىزمەت بابىن اسىرا پايدالانۋ فاكتىسى بويىنشا ايىپ تاعىلىپ، ءىس تىركەلگەن. سول بويىنشا قازىر تەرگەۋ جۇمىستارى جۇرگىزىلۋدە.

"ۇلتتىق قاۋىپسىزدىك كوميتەتى 2020 جىلعى 15 قاڭتاردا پاۆلودار وبلىسىنىڭ اكىمى ب. باقاۋوۆقا قاتىستى لاۋازىمدىق ۋاكىلەتتىلىكتەرىن اسىرا پايدالانۋ فاكتىسى بويىنشا قر قك 362-بابى 2-ءبولىمى 3-تارماعى بويىنشا تىركەلگەن قىلمىستىق ىسكە سايكەس جەدەل-تەرگەۋ ءىس-شارالارىن جۇرگىزدى. قازىرگى ۋاقىتتا تەرگەۋ امالدارى جالعاسۋدا. وسى كەزەڭدە تولىق دەرەكتەر تەرگەۋ مۇددەسىندە جاريالاۋعا جاتپايدى",- دەلىنگەن ۆەدومستۆو حابارلاماسىندا.

باقاۋوۆقا قاتىستى مۇنداي قاۋەسەت بۇعان دەيىن الەۋمەتتىك جەلىدە تاراعان بولاتىن. الايدا، پاۆلودار وبلىسىنىڭ اكىمدىگى بۇل اقپاراتتىڭ رەسمي تۇردە راستالماعانىن ايتقانى.

ال بۇگىن ۇقك قازىر بولات باقاۋوۆقا قاتىستى تەرگەۋ جۇمىستارى جۇرگىزىلىپ جاتقانىن حابارلادى.

بولات باقاۋوۆ كىم؟

ول 2016 جىلدىڭ ناۋرىز ايىندا پاۆلودار وبلىسىنىڭ اكىمى بولىپ تاعايىندالعان. 12 جىل اكىم بولعان.

بولات باقاۋوۆ 1971 جىلى پاۆلودار وبلىسىنىڭ جەلەزين اۋدانىنا قاراستى نوۆوكۋزمينكا اۋىلىندا تۋعان.

ءبىلىمى

قازاق قۇقىقتانۋ جانە حالىقارالىق قاتىناستار ينستيتۋتىن (2003) "زاڭ عىلىمدارى" ماماندىعى بويىنشا، حالىقارالىق بيزنەس، ەكونوميكا جانە كاسىپورىنداردى باسقارۋ اكادەمياسىن (2005) بىتىرگەن.

قىزمەتى

2008-2011 جىلدار ارالىعىندا پاۆلودار وبلىسى، تەرەڭكول اۋدانىنىڭ اكىمى،

2011-2014 جىلدار ارالىعىندا  اقسۋ قالاسىنىڭ اكىمى،

2014-2016 جىلدار ارالىعىندا پاۆلودار قالاسىنىڭ اكىمى،

2016 جىلدىڭ 25 ناۋرىزىنان بەرى پاۆلودار وبلىسىنىڭ اكىمى قىزمەتىن اتقارىپ كەلەدى.

اتاقتارى

ءحوببيى - اڭشىلىق. 2018 جىلعى اقپارات بويىنشا جالاقىسى - 744 مىڭ تەڭگە.

2002 جىلى - "ەرەن ەڭبەگى ءۇشىن" مەدالىمەن،

2011 جىلى "قر تاۋەلسىزدىگىنە 20 جىل" مەدالىمەن،

2012 جىلى "وبلىسقا سىڭىرگەن ەڭبەگى ءۇشىن" توسبەلگىسىمەن،

2015 جىلى "قۇرمەت" وردەنىمەن،

2016 جىلى "قر تاۋەلسىزدىگىنە 25 جىل" مەدالىمەن ماراپاتتالعان.

اكىم پورترەتى

بولات باقاۋوۆتىڭ قىزمەتى مەن قۇزىرەتىنە قاتىستى باسپاسوزدە سىن از ەمەس. ال بىلتىرعى جىلدىڭ سوڭىندا ونىڭ پورترەتى قايىرىمدىلىق اۋكتسيونىندا ساتىلعانى بەينەلەنگەن ۆيدەو الەۋمەتتىك جەلىگە تاراپ، جۇرت قىزۋ تالقى جاساعان. بەينەجازبادا كەش جۇرگىزۋشىلەرى - بەلگىلى ازىلكەشتەر، تۇرسىنبەك قاباتوۆ پەن ياروسلاۆ مەلەحين اكىم بولات باقاۋوۆتىڭ پورترەتىن اۋكتسيوندا ويناتىپ جاتقانى كورسەتىلگەن. اكىم پورترەتىنىڭ قۇنى 31 ميلليون تەڭگەگە دەيىن باعالانعان. بۇل ارينە، جۇرتتىڭ اشۋىن تۋعىزعان.

سول كەزدە پاۆلودار وبلىسى اكىمدىگىنىڭ ءباسپاسوز حاتشىسى ەرنار سايتاحمەت باق-قا پىكىر ءبىلدىرىپ، اكىم پورترەتىنىڭ قۇنى الەۋمەتتىك جەلىدە ايتىلعان باعادان الدەقايدا ارزان ەكەنىن، بار بولعانى 700 مىڭ تەڭگەگە ساتىلعانىن ايتقان.

Abai.kz

11 پىكىر