بيىلعى باستى مەرەيتوي اقىننىڭ 175 جىلدىعى ەمەس ەكەنىن ءىشىم سەزەدى (سەزۋ ء–بىلۋ ءھام ناقتى فاكت ەمەس). وسى جاستىڭ جارتىسىنا كەلسە دە مەمقازىناعا ماڭگىلىك مىنداكار بولىپ وتىرعان كىسى بار... «مى گوۆوريم لەنين، پودرازۋمەۆاەم — پارتيا، مى گوۆوريم پارتيا، پودرازۋمەۆاەم — لەنين» دەپ ماياكوۆسكي ايتپاقشى، وسى ءىس-شارانىڭ دا ۇرانى وسىعان ساياتىنداي. الدىنا اقىندى سالىپ قويەەەپ...

كەشەلى بەرى وسى مەرەيتوي (ويشىلدىڭ) شىعىنىنىڭ جالپى كولەمى جايىنداعى اقپارات تارادى. ءۇش ملرد! قالا كۇنىنە ودان الدەقايدا كوپ جۇمسالادى دا نەگىزى... ءجا، مەيلى. ءبىر ءسات ويلانايىقشى.

جالپى، ابايدى كىم ۇلىقتاماق؟ كىمدەر تويلاماق؟ سالىق پەن سەس-تەن ءيتى شىققان يپ-لار ما؟ ءبيتىن سىعىپ، قانىن جالاپ وتىرعان جالعىزباستى انالار ما؟ قايسى؟

ارينە، مەمبيۋدجەتتەن قارجىلاندىرىلاتىن مەكەمەلەر مەن كاسىپورىندار. ونىڭ ىشىندە الدا جۇرەتىندەر: اقپارات، ءبىلىم-عىلىم، مادەنيەت، ىشكى ساياسات سالالارى. ەندى وسى اتالعانداردىڭ ىشىنەن كىمنىڭ جۇرەگى داۋالاپ، ءىس-شارا وتكىزۋ ءۇشىن جوعارى جاقتان اقشا تالاپ ەتە الادى ەكەن؟

جۋرناليستەر بولماشى قالاماقى ءۇشىن كولدەي ماقالا جازار، تەلەجۋرناليستەر كۇلتوبەنىڭ باسىنان تۇسىرىلگەن سيۋجەتتەرىن تالعاجاۋ ەتەر، «قازاقستان» ۇا-نان «قۇنانباي»، «اباي اندەرى» كورسەتىلەر، عىلىم اكادەمياسىنىڭ عالىمدارى بىرلەسىپ ءبىر-ەكى مونوگرافيا باسىپ شىعارار، جوعارى وقۋ ورىندارىنىڭ فيلولوگيا فاكۋلتەتتەرىندە عىلىمي كونفەرەنتسيا وتكىزىلەر، مەكتەپتەردىڭ 1-سىنىپ(!) وقۋشىلارى عىلىمي جوبا قورعار، فيلارمونيا اباي اندەرىنەن كونتسەرت بەرەر، مۋزەي ەكسپوزيتسياسىنان جۇلىپ الىنعان جادىگەرلەرمەن كورمە ۇيىمداستىرىلار، تەاترلار 70 جىل رەپەرتۋاردان تۇسپەي كەلە جاتقان «اباي» دراماسىن، وپەراسىن قويار، كىتاپحاناشىلار كىتاپتارىن قۇشاقتاپ كونفەرەنتسيا ءوتىپ جاتقان جەرلەردە جۇرەر، جازۋشىلار وداعىندا كۇندە ءمۇشايرا، سەمەيدە «وقىرماندار» ت.جۇرتبايمەن كەزدەسەر، الماتىدا «ويشىلدار» ع.ەسىممەن سۇحباتتاسار...

بىلاي قاراساڭ، وسى جۇمىستاردى بيۋدجەتتىك سالا قىزمەتكەرلەرى كۇن سايىن ىستەپ ءجۇر جانە جالاقىدان بوتەن اقى سۇرامايدى. جىل سوڭىندا وسى اتالعان جۇمىستاردى ىستەدىك دەپ اۋىل اۋدانعا، اۋدان وبلىسقا، وبلىس مينيسترلىكتەرگە ەسەپ بەرەدى. مينيسترلىك ءبارىن جيىپ-تەرىپ،ءوزى ىستەگەندەي ەتىپ ۇكىمەتكە باياندايدى. ۇكىمەت پارلامەنت پالاتالارىنىڭ پرەزيدەنت قاتىسۋىمەن وتەتىن بىرلەسكەن وتىرىسىندا جىلدى جابادى. سونىمەن بىتەدى! ال، سىزدەر ءۇش ملرد از دەيسىزدەر!