مەملەكەتتىك دۋمانىڭ سايتىندا جاريالانعان قۇجاتتا نەگىزگى زاڭنىڭ 22 بابىنا بىردەي وزگەرىستەر ەنگىزۋ ۇسىنىلعان.
وعان سايكەس، كونستيتۋتسياعا مەملەكەتتىك كەڭەس دەگەن جاڭا بيلىك ورگانى ەنگىزىلەدى. ول "مەملەكەتتىك بيلىك ورگاندارىنىڭ ءوزارا ءىس-ارەكەتىن قامتاماسىز ەتۋ، ىشكى جانە سىرتقى ساياساتتىڭ نەگىزگى باعىتتارىن، مەملەكەتتىڭ الەۋمەتتىك-ەكونوميكالىق باسىم باعىتتارىن انىقتاۋ ماقساتىندا" پرەزيدەنت تارابىنان قۇرىلادى.
- مەملەكەتتىك دۋما پرەزيدەنت ۇسىنعان ۇكىمەت باسشىسىن، سونىمەن بىرگە پرەمەر-مينيستر ۇسىنعان ۆيتسە-پرەمەر مەن مينيسترلەردى بەكىتۋ قۇقىعىن الادى. كۇشتىك قۇرىلىم باسشىلارىن پرەزيدەنت فەدەراتسيا كەڭەسى مەن كەلىسكەننەن كەيىن ءوزى بەكىتەدى. سونىمەن بىرگە مەملەكەت باسشىسى پرەمەر-ءمينيستردى جانە مينيسترلەردى قىزمەتىنەن الۋ قۇقىعىن ساقتاپ قالادى.
- زاڭ جوباسىندا كونستيتۋتسياداعى پرەزيدەنتتىك مەرزىمنىڭ سانى تۋرالى باپتان "قاتارىنان" دەگەن ءسوزدى الىپ تاستاۋ ۇسىنىلعان: ء"بىر ادام رەسەي فەدەراتسياسىنىڭ پرەزيدەنتى قىزمەتىن ەكى مەرزىمنەن ارتىق اتقارا المايدى دەپ جازىلعان. دەمەك، پۋتين 2024 جىلى مەرزىمى اياقتالعاننان كەيىن پرەزيدەنتتىككە قايتا سايلانا المايدى.
- مەملەكەتتىك دۋما دەپۋتاتتارى، فەدەراتسيا كەڭەسىنىڭ مۇشەلەرى (ولار ءۇشىن "سەناتور" تەرمينى ەنگىزىلەدى), مينيسترلەر جانە سوتتار ءۇشىن جاڭا شەكتەۋلەر بولادى. ولار رەسەيدەن باسقا مەملەكەتتە تۇرۋ قۇقىعى بار قاندايدا ءبىر قۇجاتقا يە بولماۋى كەرەك.
- وزگەرىستەرگە سايكەس، رەسەيدىڭ پرەزيدەنتى بولىپ ەلدە كەمىندە 25 جىل تۇرعان جانە وعان دەيىن باسقا ەلدىڭ ازاماتى بولماعان ادام عانا سايلانا الادى.
- بۇدان بولەك حالىقارالىق كەلىسىمدەرگە قاراعاندا رەسەيدىڭ نەگىزگى زاڭدارىنا ارتىقشىلىق بەرۋ قاراستىرىلعان.
- زاڭ جوباسىنداعى وزگەرتۋلەر پارلامەنت تارابىنان قابىلدانعاننان كەيىن "جالپى حالىقتىق داۋىس بەرۋگە" شىعارىلاتىنى جازىلعان.
پۋتين كونستيتۋتسياعا وزگەرىستەر ەنگىزۋ تۋرالى ۇسىنىستى 15 قاڭتاردا بىلدىرگەن. ربك اقپاراتىنا قاراعاندا، جالپى حالىقتىق داۋىس بەرۋ 12 ساۋىرگە جاريالانۋى مۇمكىن.
Abai.kz
