قر ءماجىلىسىنىڭ بۇرىنعى دەپۋتاتى، قوعام جانە مەملەكەت  قايراتكەرى كامال بۇرحانوۆ قايتىس بولدى. بۇل تۋرالى سەنات دەپۋتاتى مۇرات باقتيارۇلى "Facebook" جەلىسىندەگى جەكە پاراقشاسىندا جازدى.

"جالعان ءومىر-اي... ۇستازىم، دوسىم، ارىپتەسىم كامال بۇرحانوۆ دۇنيەدەن وزىپتى. سوڭعى ەكى جىل توسەك تارتىپ جاتىپ كالعان ەدى. ماعريپا جەڭگەم كولدان كەلگەنشە بارلىعىن جاسادى. امال نەشىك، ءبارى ءبىر جاراتقاننىڭ قولىندا. باقۇل بول ادال دوس. جانىڭ ءجانناتتا بولعاي كامال اعا!" دەپ جازدى دەپۋتات.

بۇرحانوۆ قامال نيزامۇلى - 1954 جىلى 31 ناۋرىزدا تاشكەنت وبلىسى يانگيۇل اۋدانى شۋروليساي اۋىلىندا دۇنيەگە كەلگەن. تاشكەنت مەملەكەتتىك ۋنيۆەرسيتەتىن، ماسكەۋ مەملەكەتتىك الەۋمەتىك ۋنيۆەرسيتەتىن بىتىرگەن. ساياسي عىلىمدارىنىڭ دوكتورى، پروفەسسور.

2007-2016 جىلدار ارالىعىندا قر پارلامەنتى ءماجىلىسىنىڭ 4-5 شاقىرىلىمدارىندا دەپۋتات بولدى.

2004-2006 جىلدارى - قر پرەزيدەنتى اكىمشىلىگىنىڭ باس ساراپشىسى،

2006 -2007 جىلدارى - ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى قىزمەتتەرىن اتقاردى. كامال نيزامۇلى ونشاقتى عىلىمي ەڭبەكتىڭ اۆتورى.

Abai.kz