اپىراي-ا، قۇلدىق سانا بويىمىزعا ابدەن مەڭدەپ كىرگەن ەكەن! مىسقالداپ، تامشىلاپ تا شىقپاي جاتىر ەكەن.كۇنى كەشە 10 كوشەنىڭ اتاۋىن قازاقشالاعانىمىزعا ءبارىمىز بوركىمىزدى اسپانعا اتىپ جاتىرمىز. شىنىمدى ايتايىن، مەن دە قۋانىپ وتىرمىن. بىراق...

"قالا اكىمىنىڭ ءبىر قاۋلىسىمەن ىستەلەتىن ءىس ەمەس پە، كوشە اتاۋى ەمەس، باسقارۋشىلارىمىزدىڭ قۇلدىق ساناسىن وزگەرتۋ كەرەك" دەپ س. ەرعالي مەن س. مۇستافا ارىپتەستەرىم ("ازات" ارداگەرلەرى) ايتىپ تاستاپ ەدى، جۇرتشىلىق تالاپ تاستادى، قارعىس تا ايتىپ جاتىر. ارينە، ورىسى باسىم سولتۇستىك قالالارى مەن قازاعى باسىم وڭتۇستىك قالالاردى سالىستىرۋعا كەلمەيدى.

مىسالى، بىزدە قىزىلوردادا بۇل ماسەلە ەشقانداي پروبلەما بولعان جوق. بىزدە بىردەن جارىس، باسەكە باستالدى. كىم ءبىرىنشى بولىپ اتاسىنا، تۋىسىنا كوشە، مەكتەپ اتىن الىپ بەرەدى. ال كەشەگى ءبىرىنشى حاتشىلار مەن قىزىل ديرەكتورلارعا ەشقانداي كەدەرگى بولعان جوق. ەڭ ۇزىن كوشەلەر مەن مەكتەپتەر، اۋىلدار سولارعا بەرىلدى. وردەنى، مەدالى نەمەسە اتاعى بولسا بولدى، مىندەتتى تۇردە كوشە بەرىلۋى كەرەك...

قاجىمۇقان، مومىشۇلى دەگەندەر قالانىڭ شەتتەرىندە قالتارىس، قىسقا كوشەلەردە قالىپ قويدى. وزگەرمەگەن كوشە قالمادى، ۇلگەرمەگەندەرى جاڭا كوشە بولسا سولاردى وزدەرى بەلگىلەپ كەزەك كۇتىپ وتىر. ولار ونىسىمەن قويماي اناۋ-مىناۋ كوشەلەردى مىسە تۇتپايدى، ورتالىقتان ۇلكەن كوشە نەمەسە مەكتەپ، اۋىل اتىن بەر دەيدى.

تاعى ءبىر ەرەكشەلىك، باياعى گەرجودتىڭ قاسىندا جۇرگەن قازاق ورىنباسارلارىنىڭ ۇرپاقتارى اتالارىنا (بەدەبەكوۆ، جانكين، قۇلتەكەنوۆ ت.س.س.) كوشە بەرگىزىپ جاتىر.

مىناداي پارادوكس ورىن الىپ وتىر: "قىزىلقۇم" كوتەرىلىسىنىڭ باسشىسى اقمىرزا ءتوسۇلىن تىرىدەي ورتەپ ولتىرگەن نكۆد قىزمەتكەرى ءۇبىسۇلتان اياپوۆتىڭ اتىنا كوشە بەرىلىپ باسىنا تاقتا قويىلدى. بۇعان نە دەيسىز؟ بۇل ءجايتتار كەزىندە قىرىمبەك كوشەرباەۆقا جەتكىزىلدى، جاۋاپ بولعان جوق.

سوندا قالاي، قازاقتى قىرعان ورىس چەكيستەر مەن بولشەۆيكتەر جاۋىزدار دا، قازاقتى قىرعان قازاق چەكيستەر مەن بولشەۆيكتەر باتىرلار بولعانى ما؟

ساعات ءجۇسىپتىڭ الەۋمەتتىك جەلىدەگى جازباسىنان

Abai.kz