بەيسەنبى, 20 اقپان 2020
1175 10 پىكىر 24 قاڭتار, 2020 ساعات 14:14

قازاقستاندىق ستۋدەنتتەر ۆيرۋس تارالعان ۋحان قالاسىنان شىعا الماي وتىر

قىتايدا بەلگىسىز ۆيرۋستان ەكى اپتا ىشىندە 17 ادام كوز جۇمدى. رەسمي پەكيننىڭ دەرەگىنشە، 2019-nCoV دەپ اتالاتىن ۆيرۋستى 500-دەن اسا ادام جۇقتىرعان. ينفەكتسيا وشاعى – 11 ميلليوننان اسا تۇرعىنى بار ۋحان قالاسى قازىر جابىق تۇر.

قاڭىراعان قالا، ماسكا تاققان تۇرعىندار، ازىق-تۇلىك تاۋسىلا باستاعان دۇكەندەر. قىتايدا وقيتىن قازاقستاندىق ستۋدەنتتەر ۆيرۋس وشاعى ۋحان قالاسىنىڭ (قازاقستاندىق ستۋدەنتتەردىڭ سانى بويىنشا قىتايدا وندىققا كىرەدى) قازىرگى كورىنىسىن وسىلاي سيپاتتايدى.

قىتايدا بىلتىر جىل سوڭىندا "پنەۆمونياعا ۇقساس اۋرۋعا شالدىققاندار" كۇرت كوبەيگەن. كەيىن ونىڭ قوزدىرۋشىسى بەيمالىم ۆيرۋس ەكەنى بەلگىلى بولدى، ينفەكتسيا جۇقتىرعاندار سانى كۇن سايىن كوبەيىپ جاتىر. اۋرۋدان ايىعا الماي كوز جۇمعاندار دا كوبەيىپ كەلەدى. قىتاي بيلىگى ەمى مەن ۆاكتسيناتسياسى تابىلماعان ۆيرۋستىڭ تارالۋىن توقتاتۋ جولىن ىزدەپ جاتىر.

اقتوبە قالاسىنىڭ تۇرعىنى رابيعا سيسەنعاليەۆا ۋحاندا قالىپ قويعان قىزى انەل سيسەنعاليەۆانىڭ جاعدايىنا الاڭدايدى. ايتۋىنشا، نانكين قالاسىندا وقيتىن قىزى "قىسقى دەمالىسىن وتكىزۋ ءۇشىن ۋحانداعى قۇربىسىنا قوناققا بارعان". جالعىز پەرزەنتىن ۋايىمداپ وتىرعان انا قازاقستان ۇكىمەتىنەن ۋحان قالاسىنداعى ستۋدەنت قىزى مەن وزگە دە قازاقستاندىقتاردى ەۆاكۋاتسيالاۋدى سۇرايدى. ونىڭ سوزىنشە، ءبىر عانا ۋحان كوللەدجدىڭ جاتاقحاناسىندا قازىر 20-25 قازاقستاندىق بار.

- قازاقستان پرەزيدەنتى قاسىم-جومارت توقاەۆ پەن ەل ۇكىمەتىنەن، قازاقستاننىڭ قىتايداعى ەلشىلىگىنەن كومەك سۇرايمىن. ۋحان قالاسىندا قالىپ قويعان ستۋدەنتتەردى ۆيرۋس قاۋپى ابدەن سەيىلگەنشە ەلگە ەۆاكۋاتسيالاپ، قول ۇشىن بەرسەڭىزدەر ەكەن، - دەيدى ول.

قاڭتاردىڭ 23-ءى كۇنى نۇر-سۇلتاندا قازاقستان دەنساۋلىق ساقتاۋ مينيسترلىگىنىڭ وكىلى جانداربەك بەكشين بريفينگ وتكىزىپ، ەۆاكۋاتسيا ماسەلەسىنە قاتىستى جاۋاپ بەردى.

- ۆيرۋس وشاعىنان شىعۋعا بولمايدى. ەرەجە – سول. ونداعى ستۋدەنتتەردى قازاقستانعا ساۋ ەكەندەرىنە كوز جەتكىزگەن سوڭ الدىرۋىمىز كەرەك. ۆيرۋس جۇقتىرعان ادام سول جەردە قالىپ، سوندا ەمدەلۋى ءتيىس، - دەيدى بەكشين.

سىرتقى ىستەر مينيسترلىگىنىڭ وكىلى ازاتتىققا "قىتايداعى قازاقستاندىق ستۋدەنتتەردىڭ جاعدايى باقىلاۋدا" دەپ مالىمدەدى.

- بۇل جاعداي سىرتقى ىستەر مينيسترلىگىنىڭ ەرەكشە باقىلاۋىندا. ۋحاندا قالىپ قويعان بارلىق ستۋدەنتپەن بايلانىس ورناتىلعان. ۆيرۋس جۇقتىرعاندار اراسىندا قازاقستاندىقتار جوق، - دەدى مينيسترلىكتىڭ رەسمي وكىلى ايبەك سمادياروۆ ازاتتىققا.

2019-nCoV دەگەن ات بەرىلگەن ۆيرۋس – بۇعان دەيىن ەشبىر ادامدا انىقتالماعان كوروناۆيرۋستىڭ ءبىر ءتۇرى. 2000 جىلدارى 800-دەي ادامدى مەرت قىلعان Sars ۆيرۋسى دا وسى كوروناۆيرۋستىڭ ءبىر ءتۇرى ەدى.

ۆيرۋس ۋحانداعى تەڭىز ونىمدەرى بازارىنان تاراعان. كەيبىر اقپارات قۇرالدارىنىڭ جازۋىنشا، بازار قاڭتاردىڭ 1-ىندە جابىلعانعا دەيىن وندا تەڭىز ونىمدەرى عانا ەمەس، جارقانات، تاۋىق، قويان مەن جىلان زاڭسىز ساۋدالانىپ كەلگەن. قاڭتاردىڭ 22-ءسى كۇنى "مەديتسينالىق ۆيرۋسولوگيا" جۋرنالىندا زەرتتەۋ جاريالاعان عالىمدار "ۆيرۋستىڭ جىلاننان تاراعانىن" جازدى. مۇنى راستايتىن نە جوققا شىعاراتىن زەرتتەۋلەر ءالى جاريالانبادى.

Abai.kz

10 پىكىر