جۇما, 29 ناۋرىز 2024
46 - ءسوز 5850 6 پىكىر 27 قاڭتار, 2020 ساعات 12:44

بيلىك وكىلدەرىنىڭ ءبىر مالشىنى قابىلداپ جاتقانىن كورمەگەلى قاي زامان...

ول كەزدە مەن 5 جاستا ەدىم. سول جىلى قىس قاتتى بولدى. ونى كەيىن «1968 – 69 جىلدارى مەشىن جۇتى» دەپ اتادى. اكەم كۇنەسحان مال باعاتىن. جان جاعىن بيىك تاۋ قۇرساعان، لايلى دەگەن جەردى قىستادىق. بۇل حان-ءتاڭىرى اۋماعىنداعى بيىك سىلەمدەردىڭ ءبىرى. قار قالىڭ جاۋدى. ول از بولعانداي قىستىڭ سۋىق بولعانى سونداي، قاردىڭ بەتى مۇز بولىپ قاتىپ قالدى. مال قاردى تەۋىپ جايىلا المادى. ءشوپ تاۋسىلدى. ءشوپ اكەلەتىن جولدىڭ ءبارىن قار ۇرلەپ تاستاعان. مال قىرىلا باستادى. سول كەزدەگى اكەمنىڭ ارەكەتى ءالى ەسىمنەن كەتپەيدى. ول جارىم تۇننەن تۇرىپ تاۋ ەتەگىنە دەيىنگى 3 شاقىرىم قاردى اتپەن جارىپ، كەي تۇسىن بالتالاپ ءىز سالاتىن. ماقسات - تاۋ ەتەگىندەگى قاراعايعا ىلىگۋ. قاراعايلى القاپقا ىلىكسە، مال قاراعاي ءبۇرىن جەيدى، اشتان قىرىلمايدى. سوندا اكەم ءبىر قۇشاق ءشوپتى بۋىپ بەرىپ، «قويدىڭ الدىنا ءتۇسىپ الىپ، اتپەن بۇزىپ سالعان ىزبەن جۇرە بەر» دەيتىن. ءشوپتى سۇيرەيمىن. قويلار ارتىمنان ساپقا تۇرعان سولداتتاي ەرىپ وتىرادى. الدى تاۋ ەتەگىنە جەتكەندە، سوڭى قورادان شىعىپ جاتاتىن. بويىم ءبىر قارىس. اياعىمدا قالىڭ شۇلعاۋ ورالعان كەرزى ەتىك. اياعىم قاتىپ قالاتىن. قولىمدى ۇرلەپ-ۇرلەپ قويىپ، ءبىر جىعىلىپ، ءبىر تۇرىپ سول ءشوپتى سۇيرەپ بارا جاتقانىمدى ءالى ۇمىتپايمىن...

نە كەرەك وسىنداي ازاپتى كۇندەردى باستان كەشىپ، اكەم 500 قويدىڭ 400-ءىن امان الىپ قالدى. وندا دا بىرقاتارى كوكتەم شىعا سۇيەلدەن ءولدى. سول جىلى اۋىل مالشىلارىنىڭ ەڭ مىقتى دەگەنى 100 باس مالدى عانا امان الىپ قالعان. 500 قويدان تۇگەل ايىرىلىپ، قۇرىعىن ۇستاپ قالعان مالشىلار دا بولدى...

كوكتەمگە ىلىنە بەرە اۋداننان باسشىلار كەلىپ اكەمە «ءسىزدىڭ وسىنشا مالدى جۇتتان امان الىپ قالعانىڭىز كەرەمەت ەرلىك بولدى، مەدالعا ۇسىنامىز» دەدى. الايدا مالشىلار سلەتى وتكەندە مەدالدى باسشىلاردىڭ كوڭىلىن تاپقاندار تاقتى. بىراق اكەمنىڭ جۇزىنەن كەيىستىك بايقامادىم. ول بۇكىل ءومىرىن سول اۋىلشارۋاشىلىعىنا ارنادى...

...سول كەزدە اكەمنىڭ 30-دان جاڭا اسقان كەزى ەكەن. جاستار مال باققىسى كەلمەيدى دەگەندە وسى وقيعا ەسىمە ءتۇستى. قايتىپ بارادى، ەگەر ەش جاعداي تۋعىزىلماسا، ەڭبەكتەرى ەلەنبەسە. يگى جاقسىلار جينالاتىن جەرگە شاقىرىلاتىن دا، ماراپاتتالاتىن دا كوبىنشە انشىلەر، ارتىستەر، سپوتشىلار...

تاۋ باسىندا قاسات قاردا مالدى قايتسەم امان الىپ قالام دەگەن مالشى تۋرالى ءبىر رەپورتاج كورمەيمىز. گازەتتەر دە كوپ جازبايدى. ولار جوق سياقتى. قالانىڭ كوشەسى تازالانباي قالدى دەپ كۇندە دابىل قاعىپ جاتادى. دالاداعى مالشىنىڭ جاعدايىن قالاي دەپ كىم سۇرايدى؟ بيلىك وكىلدەرىنىڭ ءبىرى قويشىنى، مالشىنى قابىلداپ، نە ءوزى بارىپ ماراپاتتاپ، راحمەت ايتىپ جاتقانىن كورمەگەلى قاي زامان...

تەحنيكا، تەحنولوگيا، روبوتتاندىرۋ دەگەن جاقسى، ارينە. بىراق ءبارىڭ ەت، نان جەپ، ءسۇت ىشەسىڭدەر عوي. وسىنداي جيىنداردا اق قار كوك مۇزدا مال سوڭىندا جۇرگەن جاستاردى دا ۇمىتپاڭىزدارشى. بيىل دا قار قالىڭ. مۇمكىن ولاردىڭ دا ءبىر بالاسى ءدال قازىر ۇسىگەن قولىن ۇرلەپ، قاسات قاردا مالدى ساقتاپ قالۋ ءۇشىن ءبىر شوكىم ءشوپ سۇيرەپ بارا جاتقان بولار...

ادىلبەك قابانىڭ الەۋمەتتىك جەلىدەگى جازباسىنان

Abai.kz

6 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616