اكىمدەر مەن مينيسترلەردى حالىق سايلاۋ كەرەك. ول پروتسەستى قالاي جۇزەگە اسىرعان دۇرىس؟

بۇگىنگى دامىعان تەحنولوگيا زامانىندا، تىم بولماسا، ون-لاين داۋىس بەرۋ جۇيەسى ارقىلى ەكسپەريمەنت جاساپ كورۋگە بولادى. ول وپ-وڭاي. اكىم نە مينيستر بولعىسى كەلەتىن كانديدات ءوز باعدارلاماسىن e.gov جانە e.halyk جۇيەلەرىنىڭ "داۋىس بەرۋ" بولىمىنە جاريالايدى. سول باعدارلاماسىمەن تانىسقان سوڭ، حالىق ءوزى قالاعان كانديداتقا ون-لاين داۋىس بەرەدى.

مىسالى، بۇگىندە "رەيتينگ اكيموۆ" دەيتىن تۇككە تۇرعىسىز جوبالار بار عوي، اكىمدەردىڭ رەيتينگىن وتىرىك انىقتايدى، ياعني، قاي اكىمنىڭ جاعىمپازى، پىسىق مەنەدجەرلەرى كوپ، سولار داۋىس جيناپ بەرەدى.

نەمەسە، "حالىق سۇيىكتىسى" دەيتىن دالباسا جوبا بار. دالباسا دەيتىنىم، قاتىسۋشىلار "ماعان داۋىس بەرشى" دەپ جالىنىپ وتىرادى.

سول سياقتى، ونلاين جۇيەدە حالىق داۋىسى ارقىلى سايلاۋ وتكىزسە، وندا حالىق ءوز ىقىلاسىمەن جاپپاي قاتىسىپ، ىسكەر ادامعا داۋىس بەرەر ەدى. ءبىر ادام ءبىر-اق رەت داۋىس بەرە الاتىن ەرەجە، باعدارلاماسىن دۇرىستاپ، ساۋاتتى جاساسا، جەتىپ جاتىر. كومپيۋتەردى بىلمەيتىن جاس-كارىلەر تسونعا بارىپ، وپەراتوردىڭ كومەگىمەن داۋىس بەرەتىن بولۋ كەرەك...

ساۋلە ابىلداحانقىزىنىڭ الەۋمەتتىك جەلىدەگى جازباسىنان

Abai.kz