بەيسەنبى, 9 ءساۋىر 2020
COVID-19 قازاقستاندا. جۇقتىرعاندار — 764. جازىلعاندار — 55. قايتىس بولعاندار — 7
46 - ءسوز 1425 9 پىكىر 17 اقپان, 2020 ساعات 12:42

دارىگەرسىز قالىپ جۇرمەيمىز بە؟

قالاداعى ءتىل ورتالىقتارىنىڭ بارىندە دەرلىك قازاق دارىگەرلەرى اعىلشىن ءتىلىن جەتىك مەڭگەرۋ ءۇشىن اسقان بەلسەندىلىكپەن قۇلشىنا كىرىسىپ جاتىر. ءسىز وعان ءبىزدى ەمدەۋ ءۇشىن بىلىمدەرىن جەتىلدىرىپ جاتىر ەكەن دەپ قۋانساڭىز، ونىڭىز تىم ەرتە. سەبەبى، ولار اعىلشىن ءتىلىن جەتىك مەڭگەرىپ السا، باتىس ەۋروپا ەلدەرىنە، اقش-قا كەتۋدى ءجون كورەدى ەكەن. ونىسىن ەشكىم سوگە دە المايدى. سەبەبى، بىزدەن وزگە ەلدەردىڭ كوبىندە دارىگەرلەر وتە اۋقاتتى ءومىر سۇرەدى. ءبىلىمى مەن ءبىلىگى جوعارى بولسا، ەمدەۋ-ساۋىقتىرۋ قابىلەتى مىقتى بولسا، بۇكىل بايلىقتىڭ كىلتى دارىگەردىڭ شيپالى الاقانىنا ءوزى-اق كەلىپ قونادى. ولاي بولسا، جاقسى ءومىر ءسۇرۋدى كىم قالامايدى؟ ەڭبەگىنە ساي اقى الۋى ادىلەتتىلىك.

مىسالى، اقش-تا جەدەل جاردەم شاقىرساڭىز، كەلىپ ءسىزدىڭ قان قىسىمىڭىزدى ولشەپ، كەڭەس بەرگەنى ءۇشىن وعان العىس ايتىپ 25 دوللار ۇسىناسىز. ول جاي ءبىر شايلىق (چاەۆوي) ياعني، راقمەت ايتۋ ءراسىمى عانا. اقش-تا "قۇر اياققا باتا جۇرمەيدى", "قۇرعاق قاسىق اۋىز جىرتادى" دەگەن قازاقتىڭ قاعيدالارى ءىس جۇزىندە ءتاۋىر جولعا قويىلعان. العىس ايتاسىڭ با، 2 دوللار بولسا دا، قولىنا ۇستاتىپ ايتاسىڭ. ەمدەۋدىڭ باسقا تولەمدەرىن ايتپاي-اق قويايىن. ال، بىزدە جەدەل جاردەم دارىگەرىن شاقىرىپ الىپ، ۇرىپ-سوعىپ نەمەسە يتكە تالاتىپ جىبەرۋلەرى دە كادىك. ول از دەسەڭىز، اۋرۋىن اسقىندىرىپ جىبەرىپ و دۇنيەلىك بولىپ كەتكەن مارقۇمدار ءۇشىن دە دارىگەردى ءبىر جاقتى كىنالاپ سوتقا سۇيرەۋ، تىلدەپ جابىرلەۋ بەرگى جاعى.

وكىمەتتىڭ ولارعا بەرىپ وتىرعان جالاقىسى ءتىپتى كوڭىل كونشىتپەيدى. ايتۋدىڭ ءوزى ۇيات. قىسقاسى، بىزدە تەك دارىگەر عانا ەمەس، ءاربىر قازاق تابان ەت ماڭداي تەرىن اياماي تىربىڭداسا دا ادال ەڭبەگىڭ لايىقتى باعاسىن المايدى. كەرىسىنشە، اۋىردىڭ استى جەڭىلدىڭ ۇستىمەن جۇرگەن ماسىلداردىڭ ۇپايلارى تۇگەل. قارجى ۇرلاپ، تەندەر تۇگەندەپ جۇرگەندەر مەملەكەتتىك قىزمەتتە شالقايىپ وتىرىپ-اق ميللياردەر بولا سالادى. بيلىك باسىندا جۇرگەندەردىڭ بەلبالاسى، كۇيەۋبالاسى، كەلىنى بولماي-اق، قۇداسىنىڭ قۇداسى بولساڭ دا باي-قۋاتتى ءومىر سۇرۋگە سونىڭ ءوزى جەتكىلىكتى. مۇنداي سىبايلاستىق پەن جەمقورلىق جايلاعان قوعامدا ارينە، ادال ەڭبەگىڭ سوقىر تيىنعا تاتىمايدى. وسىنداي كەرەعارلىقتىڭ سالدارىنان كوزى اشىق جاستاردىڭ كوبى شەتەلگە كەتىپ جاتقانى بارشاعا ءمالىم. ەندى، ولاردىڭ قاتارىنا مەديتسينا قىزمەتكەرلەرى قوسىلدى. وسىلاي كەتە بەرسەك، ونسىز دا جەتىسپەي جاتقان مەديتسينا ماماندارىنىڭ ەڭ تاڭداۋلىلارى شەتەل اسىپ، دارىگەرسىز قالىپ جۇرمەيمىز بە؟

ءتىپتى، مەدبيكەلەردىڭ ءوزى مۇنداعى تيىن-تەبەننەن تۇراتىن ازعانا ايلىعى شايلىعىنا جەتپەسە، ءتىل ۇيرەنىپ الىپ شەكارا اسىپ كەتسە، وركەنيەتتى ەلدەردە ءبىزدىڭ ۇيقىشىل دەپۋتاتتاردىڭ ەڭبەكاقىسىنان كەم تۇسپەيتىن جۇمىس تابا الادى. ەڭبەكاقى تولەۋدىڭ ءتارتىبى قايتا قارالماسا، الەۋمەتتىك ادىلدىك ورناماسا، ەڭ بەرگىسىن ايتقاندا، باس اۋىرىپ بالتىر سىزداسا، ساپالى ەم جاسايتىن دارىگەرسىز قالىپ جۇرمەيمىز بە؟

قۋاندىق شاماحايۇلىنىڭ الەۋمەتتىك جەلىدەگى جازباسىنان

Abai.kz

9 پىكىر