17 اقپاندا قاراعاندى سوتىندا تاراپتاردىڭ ءجارىسسوزى تىڭدالدى. مەملەكەتتىك ايىپتاۋشى ءۇش ايىپتالۋشى — بەرىك احمەتوۆ، قايرات اقشانوۆ جانە نۇرلان شۇكىلدىكوۆكە ءومىر بويى تۇرمە جازاسىن سۇراپ، قالعان سوتتالۋشىلار بەردەن بازاروۆ، باتىربەك كايىربەكوۆ، جاراسحان مىرزاباەۆ جانە ايدوسا اكىموۆكە التى جىلعا دەيىن باس بوستاندىعىنان ايىرۋدى سۇرادى.

ولاردىڭ ادۆوكاتتارى بولسا، ايىپتالۋشىلاردىڭ قورىقشىنى ءولتىرۋ نيەتى بولماعانىن، سول سەبەپتەن "ادام ءولتىرۋ" بابىن باسقاعا الماستىرۋدى وتىنگەن.

زاڭسىز اڭشىلىقپەن اينالىستى دەپ ايىپتالىپ جاتقان ءتورت ادام جارتىلاي كىناسىن مويىنداعان. بىراق ول ءىس ماتەريالىندا كورسەتىلگەندەي، 17 ەمەس، ءۇش بوكەن ولتىردىك دەپ وتىر.

بىلتىر 13 قاڭتاردا "وحوتزووپروم" مەملەكەتتىك كاسىپورنىنىڭ ەكى قىزمەتكەرىنە قاراعاندى وبلىسىنىڭ ايماعىندا شابۋىل جاسالدى. سول كۇنى ينسپەكتورلار رەيد جۇرگىزىپ، بوكەندەردى اتۋعا كەلگەندەردى قولعا تۇسىرمەك بولعان. بىراق كۇدىكتىلەر قورىقشىلارعا قارسى وق اتىپ، ولار اۋىر جاراقاتتان اۋرۋحاناعا جەتكىزىلگەن. 15 قاڭتاردا نۇر-سۇلتان اۋرۋحاناسىندا 53 جاستاعى ەرلان نۇرعاليەۆ قازا تاپتى.

وسى وقيعادان كەيىن ەلدە زاڭسىز اڭشىلىق ءۇشىن جازانى كۇشەيتۋ تالاپ ەتىلدى. بىلتىر جەلتوقسان ايىندا قىلمىستىق كودەكسكە وزگەرىستەر ەنگىزىلىپ، "زاڭسىز اڭشىلىق" بابى بويىنشا سوتتالعاندارعا جازا كۇشەيتىلدى.

Abai.kz