21 اقپان كۇنى «دەموكراتيالىق پارتيا» قۇرۋ جونىندەگى باستاماشىل توپتىڭ جەتەكشىسى جانبولات ماماي مەن بەلسەندى جانبول راماتۋللا حالىقتى زاڭسىز ميتينگكە شاقىردى دەگەن ايىپپەن قاماۋعا الىندى.

ءىىم ءباسپاسوز قىزمەتىنىڭ مالىمەتىنشە، جوعارىدا اتالعان ەكى ازاماتتى الماتى وبلىسى قاراساي اۋدانىنىڭ پب قىزمەتكەرلەرى قر اقبتك-ءنىڭ 488-بابى 3-بولىگىندە كوزدەلگەن اكىمشىلىك قۇقىقبۇزۋشىلىق جاساعانى ءۇشىن ۇستاعان.

مامايدىڭ جاقتاستارى 22 اقپان كۇنگى تاڭعى ساعات 5:00-گە دەيىن ونىڭ قايدا ەكەنىن تابا الماعان.

وسى ءتۇنى الماتى وبلىسى قاسكەلەڭ قالاسى قاراساي اۋدانى پوليتسيا باسقارماسىنا بارعان ءبىر توپ ادام «دەموكراتيالىق پارتيا» قۇرۋ جونىندەگى باستاماشىل توپتىڭ جەتەكشىسى جانبولات مامايدى قاماۋدان بوساتۋدى تالاپ ەتتى.

ونىڭ جاقتاۋشىلارى «بوستاندىق» دەپ ايعايلاپ، تالاپتارى ورىندالماعان جاعدايدا اشتىق جاريالايتىندارىن ايتتى.

ايتا كەتەيىك، وتكەن جىلى جانبولات ماماي جاقتاستارىمەن بىرگە «دەموكراتيالىق پارتيا» قۇراتىندارىن جاريالاپ، ادىلەت ءمينيسترى ونى جىلدىڭ سوڭىندا تىركەگەن.

وسىدان كەيىن ج.ماماي 22 اقپاندا الماتى قالاسىندا «دەموكراتيالىق پارتيانىڭ» قۇرىلتايىن وتكىزەتىنىن حابارلاعان بولاتىن.

ارتىنشا جوسپارى وزگەرىپ، بۇل كۇنى ءتۇرلى قىسىمدارعا بايلانىستى ميتينگكە شىعاتىندارىن مالىمدەگەن. ءدال وسى كۇنى قازاقستاندا ۇكىمەتكە قارسى ەكى ميتينگ جوسپارلانعان.

ونىڭ العاشقىسىن شەتەلدە تۇراتىن وپپوزيتسيالىق ساياساتكەر مۇحتار ءابليازوۆ پەن ول جەتەكشىلىك ەتەتىن «قازاقستاننىڭ دەموكراتيالىق تاڭداۋى»  (قدت) قوزعالىسى جوسپارلاسا، ەكىنشىسى ج.ماماي باستاعان توپتىڭ ۇيىمداستىرۋى ەدى.

سونىمەن، قاراساي اۋداندىق سوتىنىڭ قاۋلىسىمەن جانبولات ماماي 3 تاۋلىككە، راحماتۋللا 15 تاۋلىككە اكىمشىلىك قاماۋعا الىندى.

ال بۇگىن الماتى، نۇر-سۇلتان، شىمكەنت جانە اقتوبە قالالارىندا ميتينگكە كەلگەندەردى قۇقىق قورعاۋ ورگاندارىنىڭ قىزمەتكەرلەرى ۇستاعانى تۋرالى اقپارات تارادى.

دالىرەك ايتقاندا، الماتىدا قدت ميتينگىسىنە كەلگەن 100-گە جۋىق ادامنىڭ ۇستالعانى، سونداي-اق، شىمكەنت پەن اقتوبە قالالارىندا دا پوليتسيا ونداعان ادامدى ۇستاعانى حابارلاندى.

سونىمەن قاتار، بۇگىن جانبولات ماماي مەن جانبول راحماتۋللاعا بوستاندىق سۇراپ، الاڭعا جيىلعان "دەمپارتيا" وكىلدەرىنىڭ دە تۇتقىندالعانى تۋرالى اقپارات تارادى.

ولاردىڭ اراسىندا ساياساتكەر تولەگەن جۇكەەۆ، قوعام بەلسەندىسى ىرىسبەك توقتاسىن، "جاس الاش" گازەتىنىڭ باس رەداكتورى، جانبولات مامايدىڭ ايەلى ينگا يمانباي دا بار.

ال قر ءىىم-ءنىڭ ۇستالعاندار تۋرالى رەسمي اقپاراتى ازىرگە تاراعان جوق.

Abai.kz