جۇما, 29 ناۋرىز 2024
جاڭالىقتار 3228 0 پىكىر 29 قىركۇيەك, 2011 ساعات 05:28

سەرىكباي شايماعانبەتوۆ. 138-ءدىڭ حاتى توڭىرەگىندە...

مىنە، اپتادان استام ۋاقىت «مەن قازاقپىن» دەگەندى بەي-جاي قالدىرمايتىن، ەلدىڭ كوزى قاراقتى ازاماتتارىن ءدۇر سىلكىندىرگەن حات قازاق تا، ورىس باسپاسوزدەرىنىڭ بەلسەندىلىگىن كوتەرىپ، تالاي «مارقاسقالاردىڭ» ىشكى دۇنيەسىن اشكەرە ەتۋدە. بۇل جاي ەلدىڭ بۇگىنگىسى مەن ەرتەڭگىسى تولعاندىراتىن ءبىر پەرزەنتى رەتىندە مەنىڭ دە نامىسىمدى قايراپ، قولعا قالام الۋىما ءماجبۇر ەتتى. «بىلگەننىڭ بىلگەندىگى قايسىسى، ءجون ءسوزىن ورتاعا سالماسا» دەيدى عوي اتام قازاق. ەندەشە مەن دە وسى ماسەلە حاقىنداعى بىلدىگىم اۋقىمىندا ءوز ويلارىمدى ورتاعا سالۋدى ءجون كوردىم.

مىنە، اپتادان استام ۋاقىت «مەن قازاقپىن» دەگەندى بەي-جاي قالدىرمايتىن، ەلدىڭ كوزى قاراقتى ازاماتتارىن ءدۇر سىلكىندىرگەن حات قازاق تا، ورىس باسپاسوزدەرىنىڭ بەلسەندىلىگىن كوتەرىپ، تالاي «مارقاسقالاردىڭ» ىشكى دۇنيەسىن اشكەرە ەتۋدە. بۇل جاي ەلدىڭ بۇگىنگىسى مەن ەرتەڭگىسى تولعاندىراتىن ءبىر پەرزەنتى رەتىندە مەنىڭ دە نامىسىمدى قايراپ، قولعا قالام الۋىما ءماجبۇر ەتتى. «بىلگەننىڭ بىلگەندىگى قايسىسى، ءجون ءسوزىن ورتاعا سالماسا» دەيدى عوي اتام قازاق. ەندەشە مەن دە وسى ماسەلە حاقىنداعى بىلدىگىم اۋقىمىندا ءوز ويلارىمدى ورتاعا سالۋدى ءجون كوردىم.

تايعا تاڭبا باسقانداي ءبىر اقيقاتتى ۇلىعىمىز بار، جۇلىعىمىز بار، ورىسىمىز بار، قازاعىمىز بار قالاي تۇسىنبەيتىندىگىمىزگە، ونى ۇعىندىرۋ ءۇشىن 20 جىلدان بەرگى سۇلۋ-سىپايى ءۋاجدىڭ كولەمىندەگى قاۋقارسىزدىعىمىزعا تاڭ قالامىن! ۇلتتى ۇلتتان، ەلدى ەلدەن ەرەكشەلەندىرەتىن، دەربەستىگىن دالەلدەيتىن بىردەن-ءبىر ۇعىم، اينىماس كريتەري - انا ءتىلىنىڭ بولۋى وتكەن زامان تۇرعىسىنان الساڭ دا، زاماناۋي وركەنيەت تالابىنان الساڭ دا بەس ەنەدەن بەلگىلى قاعيدا ەمەس پە. ەل ەگەمەندىگىن ايشىقتايتىن اتريبۋتتاردىڭ قاتارىنداعى ەلۇران ءماتىنى ىشىندە باسقا ەلدەردىڭ ەلۇرانىنداعى سوزدەر كەزدەسۋى مۇمكىن، بار جوعى جەتى نوتادان عانا تۇراتىن اۋەندە دە ۇقساستىق تابىلۋى عاجاپ ەمەس، ەلتاڭبادا دا باسقا ەلدىڭ ەلتاڭباسىنىڭ ۇقساس ەلەمەنتتەرى بولۋى كادىك ەمەس، تۋدىڭ ءتۇسى، كولەمى، كەيبىر ورنەكتەرىنەن ۇقساستىق تابۋعا بولار. وسىلاردىڭ ىشىندەگى ەڭ ماڭىزدىسى دا، بىردەن-ءبىر ەرەكشەلەنىتىنى دە ءتىل.  ولاي بولسا، ءتىل تاۋەلسىزدىگى، ءتىل ەگەمەندىگى بولماعان جەردە 20 جىلدىعى دەپ دۇرلىگىپ جاتقان تاۋەلسىزدىگىمىزدىڭ ءمانى، ماعىناسى، قادىر-قاسيەتى نەدە؟!

ءتىپتى ارىدەن الساق قايسىبىر ەلدە بولماسىن مەملەكەت قۇراۋشى ۇلتتىڭ انا ءتىلىنىڭ ورنىعۋى، ۇستەمدىك الۋى ديالەكتيكالىق زاڭدىلىق، تەك ءبىز ارقايسىمىز ونى شاپشاڭداتىپ، ءوز زامانىمىزدا كورىپ، تۇيسىنگىمىز، سۇيسىنگىمىز كەلەدى. ەكىنشى جاعىنان بۇل قاجەتتىلىك ءپىسىپ، جەتىلىپ تە تۇر! باسقاسىن قويعاندا، ءتىپتى ءبىز قولدانامىز با، قولدانبايمىز با، جاقسى كورەمىز بە، كورمەيمىز بە، اتا زاڭمەن بەكىتىلگەن، بالاماسى جوق ءبىر عانا مەملەكەتتىك ءتىل بولۋى لوگيكا جاعىنان الساق تا تابيعي زاڭدىلىق بولسا كەرەك. كەزىندە قابىلداعان تاڭداۋلى عۇلامالارىمىزدىڭ قالاي تالداپ، قانداي ۇعىمعا جەتكەنىن ءبىر قۇدايىم ءبىلسىن، ءسوزدىڭ ءمانىن تۇسىنە بىلگەن ادامعا كونستيتۋتسيامىزدا بۇگىنگى كۇنگى كورسەتىلىپ وتىرعان «رەسمي ءتىل قۇقىعى» دەگەن تىركەستىڭ ءوزى الدىنداعى «مەملەكەتتىك» دەگەن ماعىناعا قايشىلىق تۋعىزىپ، ادامداردىڭ ساناسىن شاتىستىرىپ وتىر. بۇل ارادا «مەملەكەتتىك» پەن «رەسمي» دەگەن ءسوزدىڭ مانىندەگى ايىرماشىلىق قانداي؟ ودان دا جالپاقشەشەيلىككە سالىنباي اشىعىن ءبىر-اق كەسىپ: «ەكى ءتىل دە مەملەكەتتىك، رەسمي ءتىل» دەپ ءبىر-اق قايىرسا، بۇل ماسەلەنىڭ اۋەلدەن باسى اشىق بولار ەدى!  ياعني، ءاۋ باستان-اق ءبىز اسا مارتەبەلى حالىق قالاۋلىلارىنىڭ قولىمەن اتا زاڭىمىزدا ورىس تىلىنە قازاق تىلىمەن بىردەي دارەجە بەرىپ، سونى ءوزىمىز ونداعان جىل باسشىلىققا الىپ، ەندى «جاڭالىق اشقىمىز كەلەدى. مەنىڭشە، وي-قىرىمىز بار اتويلاتىپ، ورەكپىمەي، سابىرمەن قاراپ، كونستيتۋتسياعا وزگەرىس ەنگىزۋ ەمەس، بار-جوعى كونستيتۋتسياداعى قاتە كەتكەن ءماتىندى تۇزەتۋىمىز كەرەك سياقتى.

مەن سان جاعىنان دا، ءمان جاعىنان دا تازا قازاقتان باسقا ۇلت وكىلدەرى باسىم ايماقتانمىن. سوندىقتان دا ءبىز، تەرىستىكتەر، اسىرەسە ءتىل ماسەلەسى جونىندەگى قانداي دا ءبىر راديكالدى ۇسىنىستارعا وتە ساقتىقپەن قاراۋعا ءماجبۇرمىز. سويتە تۇرا سوڭعى 5-10 جىل توڭىرەگىندە ءبىزدىڭ ايماقتاعى قالىپتاسقان احۋالعا قاراپ، ونى وي ەلەگىنەن وتكىزىپ ساراپتاعاندا، ۇلكەن وكىنىشكە قاراي، مەملەكەتتىك ءتىل قازاق ءتىلى بولىپ، ۇستەمدىك قۇرۋىن جاقتامايتىنداردىڭ ىشىندە ءوزىمىزدىڭ قارا كوزدەرىمىز كوپشىلىك پە دەپ تۇيەسىڭ. ونى دالەلدەۋ ءۇشىن شاعىن ساراپتاما جاساپ كورەيىك.

ەگەر ساناماعا كوشسەك، قازىر بار باسقا ۇلت وكىلدەرىنىڭ بەلگىلى ءبىر بولىگى ءوز بايلىقتارىن جيىپ العان، قالعان عۇمىرلارىنا سول جەتكىلىكتى دەگەندەر ءتىل ماسەلەسىنسىز-اق ورمانعا قاراۋشىلار، ولارعا بىزدە قانداي ءتىل جەتەكشىلىك جاسايتىنى ءبارىبىر، بىراق انا جاققا بارعاندا ءتىل ماسەلەسىن سىلتاۋلاتۋى (بۇرىن دا ورىن العانىنداي ساياسي بوسقىن ساناتىنا كىرىپ، قوسىمشا قاراجات الۋى ءۇشىن) مۇمكىن.

ەكىنشى ءبىر بولىگى - تۇراقتى جەرىن ءالى دە انىقتاي الماعان ازشىلىق - ەندى عانا بايۋ جولىنا تۇسكەن بايشىكەشتەر. ولار ءالى دە بولسا ەل بايلىعىن اساي تۇسكىسى كەلەدى، سوندىقتان دا سىرتقا كەتۋگە اسىعا قويمايدى. ولار بيلىك تاراپىنان قابىلدانعان قاي شەشىمگە دە قارسى بولمايدى، تەك اقشا تابۋلارىنا كەدەرگى بولماسا بولعانى، «اقشاعا ءتىلدىڭ قاتىسى جوق» دەگەن ۇعىمداعىلار، ياعني قازاق تىلىنە جاۋىقپايدى.

ءۇشىنشى ءبىر توپ - ول كەدەي-كەپشىكتەر. ولار قازاقستاننان ەشقايدا كەتە المايتىنىن بىلەدى، سوندىقتان دا ەلدەگى زاڭنامانى بۇزۋعا ىقتيارلى ەمەس، ياعني ەگەر كونستيتۋتسيا مەملەكەتتىك ءتىل قازاق ءتىلى دەپ بەكىتسە، ونى مويىنداۋعا ءازىر، قازىرگى كەزدە قازاق ءتىلىن ۇيرەنۋگە ەرەكشە ىقىلاسپەن كىرىسۋشەلەر دە وسىلار، جانە ولار باسقا ۇلت وكىلدەرىنىڭ ۇشتەن ەكىسىنەن استامىن قۇرايدى.

سوندا وسىنشاما شۋ شىعارىپ، قازاق ءتىلىنىڭ جاپپاي قولدانىسقا ەنۋىنە قارسى شىعىپ جاتقان كىمدەر دەگەن سۇراق تۋادى. ولار كەشەگى كەڭەستىك داۋىردە وزدەرى بيلەپ-توستەپ ۇيرەنگەن ات توبەلىندەي «پاسىق ينتەلليگەنتسيا» وكىلدەرى.

ال سودان كەيىن، مەيلىڭ نامىستان، مەيلىڭ اشۋلان - ول ءوزىمىزدىڭ «قارا ورىستار»، ياعني ورىس ءتىلدى قازاقتار! ولاردىڭ قارسىلىقتارى الدىندا كەلتىرىلگەندەردىڭ بارىنەن دە اسىپ تۇسەدى. جالپىلاما ستاتيستيكاعا جۇگىنسەك، ءدال قازىرگى جاعدايدا مەملەكەتتىك مەكەمەلەردە قىزمەت جاسايتىنداردىڭ 80 پايىزدان استامى قازاق ازاماتتارى، ال ولاردىڭ 90 پايىزىنا جۋىعى، وكىنىشكە وراي، ەكى ءتىلدى ەمەس، تەك ورىستىلدىلەر. مىنە، قازاق ءتىلىنىڭ بىرەگەي مەملەكەتتىك ءتىل بولىپ قولدانىسقا ەنۋىنە كىم قارسى!  كۇپى كيگەن قايران قازاعىمنىڭ «ىشتەن شىققان جاۋ جامان» دەگەنى وسى!

بۇعان قانداي شارا قولدانباققا كەرەك. بۇل ارادا ۇلكەن  دابىراسىز-اق رەسپۋبليكانىڭ مەملەكەتتىك قىزمەت ىستەرى اگەنتتىگىنىڭ باسىنا كەلىپ جاتقان ءا. بايمەنوۆ باۋىرىمىزدىڭ ۇلكەن شەشىمدىلىك، شىن جاناشىرلىق پەن ناعىز پاتريوتتىق سەزىمى قاجەت سياقتى. وپپوزيتسيالىق بولىپ ەسەپتەلگەن پارتيانىڭ جەتەكشىلىگىندە جۇرگەندە ءوزىنىڭ سارا دا سارابدال ويلارىمەن، تياناقتى، تاباندىلىعىمەن، الىستان ويلاي بىلەتىن، قايسىبىر بولماسىن ءوزى قوزعاعان ماسەلەنىڭ ءمان-جايىن جەتە بىلەتىن ستراتەگتىگىمەن حالىق سۇيىسپەنشىلىگىنە بولەنىپ، كوزايىمى بولعان ءاليحاننىڭ بۇل جەردە دە شىنايى ىسكەرلىك پەن كەسەلدىڭ تامىرىن كورە بىلەتىندىگىمەن تانىلاتىنا سەنىمدىمىز.

بىرىنشىدەن، ءوزىنىڭ ۇلتتىق ءتىلىن، انا ءتىلىن بىلمەيتىن، قۇلدىق پسيحولوگيادان ارىلا الماعان، ۇلتتىق سانا-سەزىمىن، نامىسىن باسقا ۇلتتىڭ تابانىنا سالىپ بەرىپ وتىرعان مارگينالدار مەملەكەتتىك قىزمەت اۋقىمىنداعى تىلدىك ورتانىڭ كەڭەيۋىنە زور كەدەرگى كەلتىرۋدە. ەندەشە، اتا زاڭداعى تۇزەتۋلەردى كۇتپەي-اق پرەزيدەنتتىڭ زاڭ كۇشى بار جارلىعىمەن بەكيتىن مەملەكەتتىك قىزمەتكەرلەرگە قويىلاتىن تالاپتار مەن ولاردى اتتەستاتتاۋدان وتكىزۋ ەرەجەلەرىندە مەملەكەتتىك قىزمەتكە الىناتىن كانديداتۋرالاردىڭ (ۇلتى قازاق ازاماتتارى ءۇشىن) قازاق ءتىلىن ءبىلۋى مىندەتتى دەگەن وزگەرىس ەنگىزۋ قاجەت.  ودان كەيىنگى قادام، التى اي مەرزىمدە قازىر قىزمەتتە جۇرگەندەردى اتتەستاتتاۋدان وتكىزۋ كەرەك، وتە الماعاندارعا تاعى التى اي ۋاقىت بەرىپ، ودان وتپەسە ورىندى بوساتۋىن تالاپ ەتسە ءىس ورنىنان جىلجىر ەدى دەپ ەسەپتەيمىن.

ونداي شەشىم بولمايىنشا بيلىك باسىندا، شەنەۋنىكتەر كرەسلولارىندا وتىرعان جاڭاعىنداي رۋحاني مىسكىن، جالتاق كادرلارمەن قازاق ءتىلى ەشقاشاندا شارىقتاپ شىقپايدى دەگەن ءسوز.

ەكىنشىدەن، قازىر زەينەتكەر جاسىنداعى اعالارىمىزدىڭ ەسىندە بولۋى كەرەك، 40-شى، 50- ءشى جىلدارى جەرگىلىكتى ۇلت ءتىلىن مەڭگەرگەن باسقا ۇلت وكىلدەرىنەن شىققان ماماندارعا ەڭبەكاقىسىنىڭ بەلگىلى ءبىر  پايىزى كولەمىندە قوسىمشا اقى تولەنىپ كەلگەن. سونىڭ ناتيجەسىندە ءبىزدىڭ وبلىستىڭ وزىندە تىڭ كوتەرۋدىڭ الدىنداعى جىلداردا قازاقشا سايراپ تۇرعان ورىس، ۋكراين، بەلورۋس، نەمىس، كارىس ازاماتتارى كوپتەپ سانالدى، ولاردىڭ اراسىندا قازاقى اۋدانداردا باسشى قىزمەتتەرگە سايلانىپ، جەرگىلىكتى حالىق ورتاسىندا ىسكەرلىگىمەن عانا ەمەس، قازاق ءتىلىن مەڭگەرۋدەگى دە العىرلىعىمەن، زەرەكتىگىمەن لايىقتى سىي قۇرمەتكە بولەنگەندەر ءالى دە بار.

ال كۇنى بۇگىن مەملەكەتتىك تىلدە ءىس قاعازدارىن جۇرگىزىپ وتىرعاندارعا ەڭبەكاقىسىنىڭ 10 پايىزى كولەمىندە ىنتالاندىرۋ اقىسى تولەنۋ جونىندە ۇكىمەتىمىزدىڭ ارنايى شەشىمى بولا تۇرسا دا، ونى ەكىنىڭ ءبىرى ورىنداي بەرمەيدى جانە ونىڭ ورىندالۋىن باقىلاپ، تەكسەرىپ جاتقان دا ەشكىم جوق. وسىدان ارتىق كەرتارتپالىق بولا ما؟

ايتا كەتەتىن ءبىر جاي، مەملەكەتتىك قىزمەتتە جۇرگەن ازاماتتاردىڭ جالپىسىنا ءتان بىردەي كەسەل - قازاقشا جاقسى بىلەتىندەردىڭ ورىس تىلىنە شورقاقتىعى، قازاقشا بىلمەيتىن قازاق ازاماتتارىنىڭ ورىسشاسىنىڭ دا شامالىلىعى. "مەن ورىسشا وقىدىم" دەپ كەرگيتىن تالاي كەۋدەمسوقتاردىڭ ورىس تىلىندە سايراۋى دا تۇرمىستىق دەڭگەيدە، ەكى اۋىز ءسوزدىڭ باسىن قۇراپ جازىپ شىعا المايتىن مەشەۋلىكتەرىن كوزىمىز كورىپ ءجۇر. قازىرگى كەزدە قاي ءبىر مەكەمەنى الىپ قاراساڭ دا، نە قازاقشا، نە ورىسشا جوندەم اقپارات، تۇشىمدى ءسوز، تەرەڭ تالداۋ، ءماندى ينتەرۆيۋ، ماعىنالى بايانداما جازاتىن ماماندار جوقتىڭ قاسى. ول تۇگىلى ءاپ-ادەمى جازىپ، سوقىرعا تاياق ۇستاتقانداي دايىنداپ بەرگەن ماتەريالدىڭ ءوزىن دۇرىستاپ وقىپ بەرە الماي، نە ينتوناتسيا، نە ديكتسيا جوق، ورىسشا سەپتىك، ساندىق جالعاۋلاردى بەلدەن باسىپ، قۇن-جىنىن شىعاراتىندارى قانشاما. ءا. بايمەنوۆ باۋىرىمىزدىڭ وسى قىزمەتكە كەلگەن بەتتە «مەملەكەتتىك قىزمەتكەرلەرگە ەسسە جازعىزۋ كەرەك» دەگەن شارتى ول تەك ادەبي ۇعىمدا ەمەس، ءىستىڭ ءجونىن بىلگەن ناعىز ماماننىڭ ءسوزى.

جالپى بىزدە كادر ساياساتىن (ەگەر ول بولسا!) جۇرگىزۋدە "مىقتى ۇستاعان" ءبىر پوزيتسيامىز -  جاسى قىرىقتان اسقان ازاماتتاردى مەملەكەتتىك قىزمەتكە جولاتپاۋ! مەنىڭشە، قانداي مەكەمە بولماسىن ۇرپاق، تاجىريبە ساباقتاستىعىن ەسكەرۋ جوق. جاستاردىڭ وي-ءورىسى، پسيحولوگياسى قانشالىقتى جاڭاشا دەگەنمەن، جاستىڭ اتى جاس، ولاردا تاجىريبەنىڭ، جازۋ-سىزۋ ەرەكشەلىكتەرى مەن كەڭسە قىزمەتىنىڭ قىر-سىرىن، ءتىپتى قىزمەتتىڭ قادىرىن ءبىلۋ مەن قاراپايىم ەتيكانىڭ جەتىسپەۋشىلىگى كوزگە ۇرىنىپ تۇرادى جانە قانشاما ارتىق پروبلەما تۋعىزادى. وسىدان بارىپ، ەشقانداي لوگيكاعا سيمايتىن نۇسقاۋلاردىڭ تۋى، ءىستىڭ بايىبىنا جەتە بەرمەي، "جالاڭ قىلىش" كوماندالىق تاسىلدەردىڭ ەتەك الۋى، نورماتيۆتىك قۇجاتتاردى بىرنەشە مارتە تۇزەتۋ ارقىلى ءمانىن ارەڭ جەتكىزۋ، باسى ورتالىقتان باستاپ ساۋاتسىز (ستيليستيكالىق، گرامماتيكالىق، ءتىپتى قۇقىقتىق) قۇجاتتاردىڭ شىعۋى سياقتى كەلەڭسىزدىكتەر، جاستار ۇلگى الىپ سوڭىنان ەرەتىن، كەڭسە قىزمەتىندە تاجىريبە جيناقتاعان وسى قىرىقتاعىلاردىڭ ورنى بوس بولعاندىقتان دا شىعار دەگەن ويعا كەلەسىڭ.

ءسوز سوڭىندا م. شاحانوۆ اعامىز مۇرىندىق بولىپ، جاھاندانۋدىڭ بۇگىنگى كۇنگى پروبلەمالىق ماسەلەسىنىڭ بىرەگەيىن، الاش ازاماتىنىڭ بۇگىنگى كۇنگى جانايقايىن جاريا ەتكەن حاتتىڭ ءدۇمپۋى كوپناسىلدى قوعامىمىزدى ءبىر سىلكىنتكەنىن ەرەكشە اتاي كەتىكم كەلەدى. كىمنىڭ كىم ەكەنى از ۋاقىتتىڭ ىشىندە اشىلىپ تا قالدى. شىندىعىن ايتقاندا، مۇحتار اعا، ەل ءۇشىن تۋعان ەر ەسەبىندە  قاشاندا دا جانىن شۇبەرەككە ءتۇيىپ، سول ەلدىڭ تاعدىرى ءۇشىن قۇربانى بولۋعا مويىن ۇسىنعان ءور تۇلعالى ازاماتتىڭ ساناتىنا جاتاتىندىعىڭىزدى دالەلدەپ قاجەتى جوق دەپ ەسەپتەيمىز. كەشە عانا ەلىمىزدىڭ زاڭ شىعارۋشى جوعارعى ورگانى قاتارىندا ءتىل تاعدىرىنا بايلانىستى ماسەلەلەردى قويماستان قايتا-قايتا كوتەرگەندىگىڭىزبەن، ول ورىننان دا ءسىزدى «جىلجىتىپ» جىبەرگەنىن جاقسى تۇسىنەمىز. ونىڭ ەسەسىنە تەك ءتىل عانا ەمەس، تۇتاستاي ۇلت ماسەلەسىنە جايباراقات، ءتىپتى ەلباسىمىز شىرقىراپ جانىن سالىپ جۇرگەن باستامالارعا دا كەرەناۋ قارايتىنداردىڭ، كۇندەلىكتى ءىشىپ-جەم مەن ونكۇندىك بولاشاعىنا قارجىنى جامباستاپ باسىپ جاتقاردىڭ اسىقتارى الشىسىنان ءتۇسىپ، تالتاڭداپ جۇرگەنى تاعى ءمالىم. بىراق، «اققا قۇداي جاق» دەگەن، ءسىز سياقتى، سىزدەر سياقتى كوكىرەگى وياۋ، ساناسى ايقىن، ءوز ۇلتىن، حالقىن قاستەرلەيتىن ۇلدارى بار ەلدىڭ جارقىن بولاشاعى بولماۋى مۇمكىن ەمەس. بۇگىن بولماسا ەرتەڭ، ەرتەڭ بولماسا ارعىكۇنى ول كۇندەر تۋارى اللاعا ايان! سوندىقتان دا، ەل ىشىندەگى كەيبىر كەرى اۋىز كەرتارتپالاردىڭ قاڭقۋىن قۇلاققا قىستىرماڭىز، مويىماڭىز دەگىم كەلەدى. اللا سىزگە، ءسىز سياقتى ەلدىڭ قامىن ويلايتىن، جىرىن جىرلايتىن جاناشىرلارىنا مىقتى دەنساۋلىق، ۇزاق عۇمىر، توبىقتى ءتوزىم مەن سالقىن سابىر، ساليقالى پاراسات بەرسىن دەپ تىلەيمىز. قادىرمەندى مۇحتار اعا، مەنى دە ءسىزدىڭ جاقتاۋشىڭىز رەتىندە، ءماتىندى تولىق وقىعان جانە سول كۇيىندە قولداۋشى ازاماتتىڭ ءبىرى دەپ ەسەپتەۋىڭىزدى وتىنەمىن!

 

«اباي-اقپارات»

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558