كەشە مەملەكەت باسشىسى قاسىم-جومارت توقاەۆتىڭ لاتىن گرافيكاسىنا نەگىزدەلگەن ءالىپبيدى جەتىلدىرۋ بويىنشا تاپسىرماسىنا سايكەس، قازاقستان جازۋشىلار وداعىنىڭ نۇر-سۇلتان قالاسىنداعى فيليالىندا جازۋشىلار مەن عالىمدار اراسىندا ءالىپبي تالقىدان ءوتتى.

ءتىل ساياساتى كوميتەتىنىڭ ۇيىمداستىرۋىمەن وتكەن بۇل ءىس-شارا پرەزيدەنت اكىمشىلىگى باسشىسىنىڭ ءبىرىنشى ورىنباسارى م.اشىمباەۆتىڭ تاۋەلسىز ساراپشىلارمەن وتكەن كەزدەسۋدەگى  ۇسىنىستارى قارالدى. شىنىمەن شىعارماشىلىق ورتا دىبىس تاڭبالاۋىن جۇرەكپەن سەزىنەدى ەكەن. كەيبىر تاڭبالاردىڭ تازا ۇلتتىق ءمان ماعىناسىن انىقتايتىن تۇستارىنا توقتالدى. جازۋشىلار جازۋ مانىنە تەرەڭ تۇسىنىستىكپەن قاراپ، ۇلكەن ءمان بەردى.

ءىس-شاراعا قازاقستان رەسپۋبليكاسى مادەنيەت جانە سپورت  ۆيتسە-ءمينيسترى نۇرعيسا داۋەشوۆ، ءتىل ساياساتى كوميتەتى توراعاسىنىڭ ورىنباسارى ادىلبەك قابا، «ءتىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى، جازۋشى، مەملەكەتتىك سىيلىقتىڭ يەگەرى الىبەك اسقار،  قازاقستان جازۋشىلار وداعى نۇر-سۇلتان فيليالىنىڭ توراعاسى داۋلەتكەرەي كاپۇلى، قارجاۋباي سارتقوجا، "الاش" ادەبي سىيلىعىنىڭ لاۋرەتى، جازۋشى قۋانىش جيەنباي،  جازۋشى قۇنىپيا الپىسباي  الىپبيدەگى كەيبىر تاڭبالار توڭرەگىندە ويلارىن ورتاعا سالدى.

جازۋشىلارعا قازاق ءالىپبيىنىڭ جەتىلدىرىلگەن جوباسىن تانىستىرعان «ءتىل-قازىنا» ۇلتتىق  عىلىمي- پراكتيكالىق ورتالىعىنىڭ عالىم حاتشىسى انار فازىلجانوۆا: «ڭ دىبىسى حالىقارالىق فونەتيكالىق الىپبيدە بار Ŋ تاڭباسىمەن بەرىلدى. مىسالى: aŋşy, jaŋbyr, köleŋke. فونەتيكالىق نەگىزى Ŋ تاڭباسى مۇرىن جولدى، ءۇندى داۋىسسىز دىبىستى (ڭ) بەلگىلەيدى.

ال ادىستەمەلىك نەگىزى  دەگەندە ول Ŋ قولدى ۇزبەي جازۋعا ىڭعايلى ءارى ءجولۇستى تاڭبالارىن كوبەيتپەيدى. سونداي-اق كيريلنەگىزدى قازاق الىپبيىندەگى ڭ گرافيكاسىنا ۇقساس بولعاندىقتان وعان  تەز داعدىلانادى»-دەپ ويىن ورتاعا سالدى.

ال، قازاقستان رەسپۋبليكاسى  مادەنيەت جانە سپورت ۆيتسە-ءمينيسترى  نۇرعيسا داۋەشوۆ:  "تالقىلاۋدىڭ  جازۋشىلار وداعى عيماراتىندا ءوتۋى دە ماڭىزدى. ءالىپبي - بۇل ەل ەرتەڭى. ونى جان-جاقتى تالقىلاپ، فونەتيك عالىمداردىڭ نەگىزدەمەلەرى نەگىزىندە جاساۋ بۇگىنگى كۇننىڭ باستى تالابى. جازۋشىلار ءۇيى رۋحاني ءومىرىمىزدىڭ قايناعان ورداسى. بۇل جەردە رۋحاني شەشىمدەرگە جەتۋگە بولادى. مىنا تاريحي سۋرەتتەردىڭ ءوزى دە سويلەپ تۇر.  الاش قايراتكەرلەرى دە وسىنداي ورتادا الاش تاعدىرىن شەشكەن. الىپبيگە ماڭىزدىلىق بەرىپ، جەتى رەت ولشەپ ءبىر رەت شەشىلەتىن ءىس. قازاقتىڭ ءار قارىپىنىڭ استارىندا  ۇلتتىق بولىمىس، قازاقتى قازاق ەتىپ تۇرعان قاسيەتى تۇر.  سوندىقتان دا ءبىز ءالىپبي جاساۋدا ءار قارىپكە دەيىن ءجىتى كوڭىل ءبولىپ، الدىلارىڭىزعا كەلىپ تالقىلاپ وتىرمىز "-دەپ ويىن تۇيىندەدى.

«ءبىزدىڭ قازاق ءتىلى دە قىپشاق تىلدەر توبىنا جاتادى. دەمەك، تۇرىك بابالارىمىز ءبىزدىڭ بايىرعى تىلىمىزدە سويلەپ، سول تىلمەن يمپەرياسىن باسقارىپ، سول تىلمەن الەم وركەنيەتىنە ءوز ۇلەسىن قوسا ءبىلدى. ال جاڭا ءالىپبي  ءبىزدىڭ حالىقتىڭ قاجەتىنە، كوپتىڭ كادەسىنە جارايتىنداي بولعانى ابزال. ءبىز وسى جوبانى قولدايمىز. اسىرەسە، مىنا ڭ تاڭباسىنىڭ Ŋ تاڭبالانۋى قۋانتادى»-  حالىقارالىق شىڭعىس حان اكادەمياسىنىڭ اكادەميگى، فيلولوگيا عىلىمىنىڭ دوكتورى ، جازۋشى كارجاۋباي سارتقوجا.

ءىس-شاراعا  قاتىسقان جازۋشىلار مەن عالىمدار  جاڭا الىپبيگە قولداۋ كورسەتتى.

Abai.kz