بورحەس 1973 جىلى ماكسيكو قالاسىنا ساپار شەكتى. ول ءوز سوزىمەن ايتقاندا، «مەيىرىمسىز رەسمي قابىلداۋلاردىڭ» بارىنە دەرلىك قاتىسۋعا كەلىسىم بەردى.

ارگەنتينالىق جازۋشى ماكسيكاعا بارعان ساتىندە ءوزى تۇسكەن ءۇي يەلەرىنە ءبىر ءوتىنىش جاساپتى. ونىڭ حۋان رۋلفومەن سويلەسكىسى كەلىپتى. ءسويتىپ ەكەۋىن تاڭعى استا كەزدەستىرۋ ۇسىنىلادى.

بىراق بورحەس:

– كەشىرىڭىزدەر، مەن ءۇشىن تاڭ – اۋىر مەزەت. كەشكىلىك جانىما الدەقايدا جاقىن. مەن تاڭ مەزگىلىندە كۇش-قۋاتىم الا المايمىن. مەن رۋلفومەن تەك كەشتە سويلەسكىم كەلەدى، – دەيدى.

وسىدان ارى ەكەۋىنىڭ سۇحباتى جالعاسىپتى...

حۋان رۋلفو:

– ۇستاز، بۇل مەن – رۋلفو. ءسىزدىڭ كەلگەنىڭىز قانداي جاقسى بولدى. ءسىزدى قانشالىقتى قۇرمەتتەيتىنىمىزدى بىلەسىز عوي.

بورحەس:

–اقىرى كەزدەستىك-اۋ، رۋلفو. مەنىڭ كورۋىم ناشارلادى.  ەل ارالاعاندا ەشتەڭىەنى كورە المايمىن، بىراق پىكىرلەستەرىمىنىڭ داۋىسىن ەستي الامىن. مۇندا ماعان دەگەن جىلى سەزىمدى ەستىپ تۇرمىن. بىراق مەنى «بورحەس» دەپ تە، «ۇستاز» دەپ تە اتاماڭىز. مەن – حورحە ءلۋيسپىن.

رۋلفو:

– قانداي جاقىندىق… وندا ءسىز مەنى حۋان دەپ اتاڭىز.

بورحەس:

– مەن ءبىر نارسەنى مويىندايىن. ماعان «حۋان» دەگەن اتاۋ «حورحە لۋيستەن» بەتەر ۇنايدى. ول قىسقا ءارى انىق ەستىلەدى. قىسقالىق ارقاشان مەنىڭ تالعامىمدا بولعان.

رۋلفو:

– جوق، بۇلاي بولمايدى. «حۋان» دەگەن كەز كەلگەن ادام بولۋى مۇمكىن. ال «حورحە لۋيس» – تەك بورحەس قانا.

بورحەس:

– ءسىز ءاردايىم ىزەتتىسىز. ايتىڭىزشى، سوڭعى كەزدەرى قالاي ءومىر ءسۇرىپ جاتىرسىز؟

رۋلفو:

– مەن بە؟ مەن… ءولىپ بارا جاتقاندايمىن. ءار جەردە، ءار ساتتە سونداي كۇي كەشەمىن.

بورحەس:

– وندا ءسىز جامان ەمەس ءومىر ءسۇرىپ ءجۇرسىز دەگەن ءسوز.

رۋلفو:

– قالايشا ولاي دەيسىز؟

بورحەس:

– ويلاپ كورىڭىزشى، ەگەر ءبىز ماڭگى ءومىر سۇرسەك، بۇل قانداي باقىتسىزدىق بولار ەدى. ادام وندا ۇنەمى ءولىپ بارا جاتقان كۇي كەشىپ، ءوزىن ءتىرى سەزىنەر ەدى.

رۋلفو:

– ءيا… ول راس. وندا ادام ءولىمدى كۇندەلىكتى تىرشىلىكتىڭ ءبىر بولىگى رەتىندە قابىلدار ەدى.

بورحەس:

– مەن سىزگە ءبىر قۇپيا ايتايىن. مەنىڭ اتام – گەنەرال،  ول بورحەس دەپ اتالماعان، ونىڭ شىن ەسىمى باسقا بولعان، بىراق ول قۇپيا كۇيىندە قالدى. كەيدە مەن ول كىسىنىڭ اتى پەدرو پارامو بولعان شىعار دەپ ويلايمىن. سوندا مەن – ءسىز جازعان كومالا تۋرالى ادامداردىڭ تيتتەي جاڭعىرىعىمىن.

رۋلفو:

– وندا مەن ەندى تىنىش ولە بەرسەم بولاتىنداي.

اعىلشىن تىلىنەن اۋدارعان دۇيسەنالى الىماقىن

Abai.kz