دىنمۇحامەد قوناەۆتىڭ ەستەلىگىنەن:

جەلتوقساننىڭ ون جەتىسى كۇنى ساعات 11-گە قاراي ماعان قازاقستان كومپارتياسى ورتالىق كوميتەتىنىڭ ەكىنشى حاتشىسى و.س.ميروشحين تەلەفون سوقتى. ورتالىق كوميتەتكە كەلۋىمدى ءوتىندى.
— جايشىلىق پا؟ مەن زەينەتتى دەمالىستامىن عوي، — دەپ ەدىم، ول:
— الاڭعا ءبىر توپ جاستار جينالدى. ولار كەشە وتكەن ورتالىق كوميتەتتىڭ پلەنۋمىنىڭ شەشىمىن دۇرىس-بۇرىستىعىن بىلگىسى كەلەدى. تالابى سول. جينالعانداردىڭ الدىندا سويلەپ، ءىستىڭ ءمان-جايىن ءتۇسىندىرىپ بەرسەڭىز دۇرىس بولار، — دەپ جاۋاپ بەردى.
— جاقسى، — دەپ جانە مىنانى سۇرادىم. — كولبين كەلىسە مەن بۇعان؟

ميروشحين تەلەفون تۇتقاسىن كولبينگە بەردى. ول ورتالىق كوميتەتكە كەلىپ، جاستار الدىندا سويلەۋىمدى ءوتىندى. مەن كەلىسىمىمدى بەردىم. تابان استىنان جينالىپ، ايتقان جەرگە باردىم. ءبىرىنشى حاتشىنىڭ كابينەتىنە كىرسەم، بيۋرو مۇشەلەرى تۇگەل جينالىپ، الاڭعا جينالعاندارعا نە ىستەۋ كەرەكتىگىن اقىلداسىپ وتىر ەكەن. كولبين ەكى ادامعا: نازارباەۆ پەن كاماليدەنوۆكە — جاستار الدىندا سويلەۋدى ۇسىندى. ماعان ءسىز بىلاي ەتسەڭىز قايتەدى دەگەن تاپسىرما بولمادى. كولبيننىڭ كابينەتىندە باقانداي ەكى ساعات، ءتىپتى، ودان دا اسىق ۋاقىت تاپجىلماي وتىردىم. باسىن اشا كەتەيىن، مەنىڭ ءسوز سويلەۋىم تۋرالى اڭگىمە كوتەرىلگەن جوق. سوسىن كولبين ماسكەۋمەن بايلانىسىپ، الدەكىممەن سويلەسە باستادى. اڭگىمەسىنە كەدەرگى بولمايىق دەپ، ميروشحيننەن باسقامىز سىرتقا شىعىپ كەتتىك. اراعا از-كەم ۋاقىت سالىپ، كولبين بارلىق بيۋرو مۇشەلەرىن جيناپ، ولارعا قوسىپ مەنى دە شاقىردى. كىرگەن بويدا ول ماعان:
— ءسىز بوسسىز، دەم الا بەرىڭىز. ءبىز ءوزىمىز-اق ءتيىستى شارا قولدانىپ، تارتىپكە كەلتىرەمىز، — دەدى.

مەن شىعار الدىندا ميروشحيننەن:
— نە ءۇشىن شاقىرتتى، نەگە سويلەتپەدىڭىزدەر؟ — دەپ سۇرادىم.

ول بىلاي دەپ جاۋاپ بەردى:
— اقىلداسا كەلىپ، سىزگە الاڭعا شىعىپ سويلەۋىڭىزدىڭ قاجەتى بولا قويماس دەپ شەشتىك.

1987 جىلى ماۋسىم ايىندا ماسكەۋدە وتكەن كوكپ ورتالىق كوميتەتىنىڭ پلەنۋمىندا ماعان الاڭعا شىعىپ، ءسوز سويلەۋگە رۇقسات ەتپەگەنىن ميروشحين تاعى دا راستادى.

اسەت اقمولدانىڭ الەۋمەتتىك جەلىدەگى پاراقشاسىنان

Abai.kz