Vlast سايتىنىڭ جازۋىنشا، سۋديا بەلسەندى فاريزا وسپانعا "ۇساق بۇزاقىلىعى ءۇشىن" - 13 مىڭ تەڭگە كولەمىندە، ارينا وسيپوۆاعا مارشقا قاتىسىپ، "ۇساق بۇزاقىلىق" جاساعانى ءۇشىن 66 مىڭ تەڭگە كولەمىندە ايىپپۇل سالعان. اقپارات بويىنشا، سۋديا مارش كەزىندە قاتىسۋشىلاردىڭ گۇل شوعىرىن ورتەۋىن "بۇزاقىلىق" دەپ باعالاعان.

وسينوۆسكايانىڭ ءىسى قارالعان كەزدە اقپارات قۇرالدارىنىڭ وكىلدەرى مەن بەلسەندىلەردىڭ جاقتاستارى سوت زالىنان شىعارىلعان.

بۇعان دەيىن مارشقا قاتىسقان وزگە بەلسەندىلەردىڭ دە اكىمشىلىك جازاعا تارتىلۋى مۇمكىن ەكەنى ايتىلعان ەدى.

8 ناۋرىز كۇنى اكتسيانى بىرنەشە فەمينيستىك توپ ۇيىمداستىرعان. وعان شامامەن 200 ادام قاتىسقان.

مارشقا قاتىسقاندار قازاقستانداعى ايەلدەر قۇقىعىنىڭ احۋالى مەن تۇرمىستاعى زورلىق-زومبىلىق ماسەلەسىن ايتىپ، بيلىكتەن تۇرمىستاعى زورلىق-زومبىلىق جازاسىن كۇشەيتۋدى تالاپ ەتكەن ەدى.

شەرۋدى ۇيىمداستىرعاندار مارشتى وتكىزۋ ءۇشىن بىلتىر التى-جەتى رەت الماتى قالاسى اكىمدىگىنە ءوتىنىش بەرگەنىن، رۇقسات الا الماعانىن ايتقان ەدى.

قازاقستاندا حالىق قانداي دا ءبىر بەيبىت شەرۋ، ميتينگىگە شىعاتىن بولسا، جەرگىلىكتى اكىمدىكتەن الدىن الا رۇقسات الۋى ءتيىس. بيلىك رۇقسات بەرىلمەگەن ميتينگىنىڭ ءبارىن "زاڭسىز" دەپ تاۋىپ، قاتىسۋشىلارىن ۇستايدى جانە جاۋاپقا تارتادى.

Abai.kz