جۇما, 3 ءساۋىر 2020
COVID-19 قازاقستاندا. جۇقتىرعاندار — 453. جازىلعاندار — 29. قايتىس بولعاندار — 3
1241 1 پىكىر 22 ناۋرىز, 2020 ساعات 14:43

كوممۋنالدىق قىزمەت اقىسىن تولەۋ جىل سوڭىنا دەيىن ۇزارتىلدى

توتەنشە جاعداي سالدارىنان كوممۋنالدىق قىزمەت اقىسىن تولەي الماي وتىرعان الماتى تۇرعىندارىنا بورىشتارىن جىل سوڭىنا دەيىن وتەۋگە مۇمكىندىك بەرىلدى. مۇنداي مۇمكىندىك كوروناۆيرۋس ىندەتىنە بايلانىستى جاريالانعان كارانتينگە وراي كوممۋنالدىق قىزمەتتەردى ۋاقىتىندا تولەۋگە مۇمكىندىگى جوق قالا تۇرعىندارىنا بەرىلەدى.

بۇگىنگى كۇننەن باستاپ كارانتيندىك جاعدايعا بايلانىستى قيىن ماتەريالدىق جاعدايعا تاپ بولعان تۇتىنۋشى تەلەفون ارقىلى نەمەسە ەلەكتروندىق سايتتار ارقىلى قىزمەت كورسەتۋشىنىڭ ەسەپ ايىرىسۋ بولىمىنە حابارلاسىپ، جىلدىڭ ناۋرىز جانە ءساۋىر ايلارى ءۇشىن تولەمدەردىڭ مەرزىمىن ۇزارتا الادى.

تولەمدەر بويىنشا كەيىنگە قالدىرۋ تەك جەكە تۇلعالارعا سۋمەن جابدىقتاۋ جانە كارىز جۇيەسى ءۇشىن («الماتى سۋ» مكك), جىلىتۋ جانە ىستىق سۋمەن جابدىقتاۋ («الماتى جىلۋ جەلىلەرى» جشس), ەلەكتر ەنەرگياسى («الماتىەنەرگوسبىت» جشس), گازبەن جابدىقتاۋ («قازترانسگاز ايماق» اق الماتى وندىرىستىك فيليالى), تەلەفون بايلانىسى («الماتىتەلەكوم» اتد) قىزمەتتەرى بويىنشا بەرىلەدى.

ايتا كەتەيىك، كارانتين كەزىندە كوممۋنالدىق قىزمەتتەرگە قارىزى بار تۇرعىنداردى ەلەكتر جارىعىنان، سۋدان، جىلۋ مەن گازدان جانە تەلەفون بايلانىسىنان اجىراتۋ جوسپارلانىپ وتىرعان جوق.

سونداي-اق جەكە تۇلعالار كوممۋنالدىق قىزمەت اقىسىن ۋاقىتىلى تولەمەگەنى ءۇشىن ايىپپۇلدار سالىنبايدى.

Abai.kz

1 پىكىر