قازاقستاندا ازاماتتاردىڭ بيلىككە دەگەن سەنىمى بۇرىننان وتە تومەن. بەيبىت كۇندە سەنىمگە پىسقىرماعان بيلىك كارانتيننىڭ كەزىندە ءوز ءسوزىن ءاربىر ازاماتقا جەتكىزە الماي دال بولىپ جاتىر. ەڭ سوراقىسى، ازاماتتارمەن كوممۋنيكاتسيا جاساي الماعان بيلىك وكىلدەرى ولارعا “توبىر” دەپ شابلون تاعىپ، ءوز شاراسىزدىعىن اقتاۋعا تىرىسىپ جاتىر.

ءوزىن “ەليتا” سانايتىن كەي كىسىلەر وسىندا پوليتسەيلەر مەن دارىگەرلەردىڭ ەڭبەگىن ءانشى مەن ۆاينەرلەردى عانا تىڭدايتىن “توبىر” دۇرىس تۇسىنبەي جاتىر دەپتى. ءسنوبيزمنىڭ ءيىسى شىعاتىن بۇل مەسسەدج “ەرتەڭ قىرىلىپ قالساڭدار، وزدەرىڭنەن كورىڭدەر” دەگەنگە كەلەدى. لوگيكاسى “سۇمدىق” ەليتا وكىلدەرىنە كەلەسى سۇراقتاردى قويعىم كەلەدى:

پوليتسەيلەردى ساياسي رەجيمنىڭ كۇزەتشىسىنە اينالدىرعان “توبىر” ما الدە “ەليتا” ما؟

پوليتسەيلەردى ازاماتتاردىڭ قاۋىپسىزدىگىنە بەيجاي قاراپ، “مۋسور” اتالاتىنداي دەڭگەيگە جەتكىزگەن “توبىر” ما الدە “ەليتا” ما؟

مۇعالىمدەر مەن دارىگەرلەردى ساياسي ناۋقاندارعا پايدالانۋ ارقىلى “قۇل” قىلعان “توبىر” ما الدە “ەليتا” ما؟

مۇعالىمدەر مەن دارىگەرلەردىڭ ەڭبەگىن “قۇلدىڭ” ەڭبەگىنە تەڭەپ، ولارعا كۇلكىلى ايلىق تولەپ كەلە جاتقان “توبىر” ما الدە “ەليتا” ما؟

مۇعالىمدەر مەن دارىگەرلەردى “قۇلعا” اينالدىرۋ ارقىلى ءبىزدىڭ قوعامدا ولاردى لۋزەر قىلعان “توبىر” ما الدە “ەليتا” ما؟

ءسوز بوستاندىعىن تۇنشىقتىرىپ، مەملەكەتتىك تەلەكانالدار ارقىلى ءانشى-پانشىلەردەن كۋلت جاساعان “توبىر” ما الدە “ەليتا” ما؟

ءانشى-پانشىلەردى نۇر وتاننىڭ پارتيالىق تىزىمىنە قوسىپ، ولاردان ساياسي قايراتكەر جاساعان “توبىر” ما الدە “ەليتا” ما؟

“Salem Social”-گە ميلليونداردى قۇيىپ، ۆاينەرلەردەن “رولەۆايا مودەل” جاساعان “توبىر” ما الدە “ەليتا” ما؟

ەلدە بىردە-ءبىر تاۋەلسىز باق قالدىرماي، ازاماتتاردىڭ تسەنزۋراسىز اقپاراتتى الەۋمەتتىك جەلىدەن عانا ىزدەيتىن كۇيگە جەتكىزگەن “توبىر” ما الدە “ەليتا” ما؟

ەلدەگى ءبىلىم مەن عىلىمدى جانە مەديتسينانى كونسپيرولوگيانىڭ جانىندا شاراسىز كۇيگە تۇسىرگەن “توبىر” ما الدە “ەليتا” ما؟

قۇداي بەتىن اۋلاق قىلسىن، ارينە. بىراق كوروناۆيرۋستى مىڭداعان كازاقستاندىق جۇقتىراتىن بولسا، “توبىر” مەن “ەليتا” بولىپ ءبولىنۋدىڭ كوكەسىن سوندا كورەمىز. ءبولىنىستىڭ كوكەسىن ونسىز دا ءبارىمىز جولاماۋعا تىرىساتىن مەملەكەتتىك اۋرۋحانالارعا باي-باعلانداردىڭ، اتقامىنەرلەردىڭ جانە “توبىردىڭ” كۇنى قاتار تۇسكەندە كورەمىز.

قازىر رەسەيدە مەماۋرۋحانالارعا سەنبەيتىن جانە ولاردا ەمدەلمەيتىن بايلار ۇيلەرىنە ورناتۋ ءۇشىن قۇنى شامامەن $22,500 تۇراتىن يۆل اپپاراتتارىن جاپپاي ساتىپ الىپ جاتىر ەكەن (قازاقستاندا دا وليگارحتار يۆل اپپاراتتارىن الدەقاشان ۇيلەرىنە ورناتىپ قويۋى دا مۇمكىن). ەكسپەرتتەردىڭ ايتۋىنشا، ول اپپاراتقا ناۋقاستىڭ كۇنى تۇسكەندە ونى امان الىپ قالۋ ءۇشىن "يۆل"-ءدى دۇرىس پايدالانا بىلەتىن ماماندار مەن تاجىريبەلى دارىگەرلەر كەرەك. ياعني، سىن ساعاتتا سىرتقا شىعا الماي قالعان بايلار ەلدەگى مىقتى دارىگەرلەرگە “قۇدا ءتۇسۋى” مۇمكىن. وسىلايشا دارىگەرلەر ەتيكالىق تاڭداۋ جاساۋمەن بەتپە-بەت كەلۋى مۇمكىن…

قازىرگى ءبىزدىڭ دارىگەرلەردىڭ جانكەشتىلىگىنە قاراپ، ءالى دە بولسا ار-وجدانىن ادىلەتسىز جۇيە سىندىرا الماعان دارىگەرلەر ەلىمىزدە كوپ دەپ سەنەمىن.

پ-سى: كوروناۆيرۋستى جەڭۋدىڭ قازىرگى ەڭ ءتيىمدى جولى – ۇيدە وتىرۋ. ادامدارمەن وففلاين قارىم-قاتىناس جاساۋدى كارانتين بىتكەنشە توقتاتۋ. وسىنداي قىسىلتاياڭ كەزدە جۇرتقا “توبىر” دەپ شابلون تاعۋدىڭ ورنىنا “ەليتا” ءوز كۇشىن ازاماتتارعا تۇسىنىكتى تىلمەن كوروناۆيرۋستى جەڭۋ ءۇشىن ءاربىر ادام ءوز ۇلەسىن قوسۋى كەرەك ەكەنىن، مەملەكەتتەن مۇقتاج جاندارعا الەۋمەتتىك كومەك قالاي بەرىلەتىن تۇسىندىرۋگە جۇمساۋى كەرەك.

ايتپەسە، 30 جىل بويى حالىقتى “توبىر” كورىپ، لوگيكاعا مۇلدەم كەلمەيتىن اقىل ايتۋدان بىرنارسە شىقسا، وسى ۋاقىتقا دەيىن شىعار ەدى عوي.

شالقار نۇرسەيىتتىڭ الەۋمەتتىك جەلىدەگى جازباسى

Abai.kz