تابيعات زاڭىنا قارسى كەلە المايسىڭ. ءشوپ جاڭادان، قالىڭ بولىپ ءوسۋى ءۇشىن ەسكىسىن تۇبىنەن تىقىرلاپ ورىپ تاستاۋ كەرەك. ايتپەسە ەسكى ءشوپ دۇرىس ءونىم بەرمەگەنىمەن قويمايدى، قايتا ءشىرىپ باسقالارىن دا بۇلدىرەدى.

اڭداردا دا سولاي، كارى جانۋار السىرەگەندىكتەن نە ۇيىرگە ەرە الماي، نە باسقا پايداسىن كورسەتپەي قايتا كەسىرىن تيگىزەدى. جۇقپالى اۋرۋلار دا سول كارى جانۋارلاردان باستاپ تاراپ، بۇكىل ءۇيىردى قۇرتادى. سوندىقتان تابيعاتتا تابيعي سۇرىپتاۋ دەگەن بار. ونىڭ اسەرىمەن كارىلەر تەز جاستاۋلارىنا ورنىن بەرىپ جاتادى.

بۇل ءومىر زاڭى! ونسىز العا دامۋ جوق! مەملەكەتتە دە سولاي بولۋى كەرەك!

قول بوساعان سوڭ، كىشكەنە ساراپتاما جاساعانمىن. ءوزىم از-ماز ارالاسقان قاي سالانى قاراسام دا 10 ەمەس-اۋ، 15 -20 جىلداپ باسشىلىقتا وتىرعان ادامدار. ءارىسى ءبىر وبلىستان ەكىنشىسىنە، سوسىن ۇشىنشىسىنە ءدال سول پوزيتسياعا سەكىرىپ ءجۇر، بەرىسى سول وتىرعان جەرىن جەكەمەنشىككە العانداي تاپجىلماعان-اۋ تاپجىلماعان. ال، ودان جوعارى بيلىكتەگى جاعدايدى وزدەرىڭىز دە بىلەسىزدەر. الدى بەس رەت مينيستر، التى رەت اكىم بولىپ جاتىر(اسىرەلەپ ايتام ارينە).

بۇل نەنى بىلدىرەدى؟ ەل باسقارۋعا لايىق جاستار جوق پا؟ بار ارينە. دەمەك، بيلىكتىڭ وزىندە جاڭارۋ نيەتى جوق.

بۇلاي كەتە بەرسە نە بولادى؟جاڭاعى ايتقانداي، تابيعات زاڭى. ءىرىپ-ءشىريمىز، جويىلىپ كەتەمىز (قۇداي بەتىن ءارمان قىلسىن)

نە قۇتقارادى؟ حالىقتىڭ ءوزىن-ءوزى ساقتاۋ ينستينكتى.

جانۋارلار الەمى حابارىنان كورگەن ءبىر مىسال: ارىستاندار پرايدى. پرايدتى 15 جىل ۇستاعان سىرتتان قارتايدى. ادەتتە، مۇندايدا پرايدتا جوق، ساياق جاس ەركەك ارىستاندار كەلىپ كوسەممەن كۇش سىناسادى. جەڭسە، پرايدتىڭ جاڭا كوسەمى اتانادى، ال كارى سىرتتان شەتتە ولەدى. بىراق، ءبىر قىزىعى الگىنىڭ ەسكى "اۆتوريتەتى" مىقتى ما، جاس ارىستانداردىڭ جەكپە-جەككە جۇرەكتەرى داۋالامايدى. ال، تابيعات ءوز دەگەنىن ىستەيدى عوي، سول ماۋسىمدا الگى پرايدتىڭ قانشىرلارىنىڭ ( ۇرعاشىلارىنىڭ) دەنى "قىسىر" قالدى، ال قالعاندارى كۇشىكتەدى، بىراق ءولى تۋدى(سەبەبى تۇسىنىكتى بولار).ياعني، پرايدتىڭ بولاشاعىنا قاۋىپ ءتوندى. سول كەزدە پرايدتاعى 6-7 قانشىر كەلىسىپ العانداي جابىلىپ، الگى كارى سىرتتاندى وزدەرى قۋىپ جىبەردى. سىرتتاعى ساياق ارىستانداردىڭ ەڭ مىقتىسىن پرايدتارىنا "قوجايىن" قىپ الدى.
ءوزىن-ءوزى ساقتاۋ ينستينكتى دەگەن وسى.

مەن بيلىككە قارسى ەشتەڭە ايتىپ وتىرعانىم جوق. وزىمە دە ەش قىزمەتتىڭ كەرەگى جوق. تەك سوڭعى 1-2 جىلداعى تاعايىنداۋلاردان كەيىن وزىمشە وي قورىتىپ وتىرعانىم. دۇرىس تۇسىنىڭىزدەر.

جاناحمەت اعىبايدىڭ الەۋمەتتىك جەلىدەگى جازباسى

Abai.kz