ەلدەگى جاعداي كۇننەن كۇنگە قيىنداپ بارادى. حالىق ۇرەيدە. ءتاجتاجالدىڭ بەتى قايتار ەمەس. بىراق بيلىك بۇل جاعدايدى ءالى تەرەڭ ءتۇسىنىپ، جۇرەگىمەن قابىلداي قويماعان سىندى. مەملەكەتتىك كوميسسيا قۇرىلىپ، وعان ۇكىمەت باسشىسى جەتەكشىلىك ەتۋدە. ارى قاراي نە ىستەپ جاتقاندارى بەلگىسىز. ءبارىن دارىگەرلەرگە ارتىپ قويىپ، قاراپ وتىر ما دەپ قالامىن. وسىلاي ىندەتپەن كۇرەسۋگە بولا ما؟

كورشى رەسەيگە قاراساق، ەلدەگى جاعدايعا بايلانىستى كۇن باتىستاعى كالينينگرادپەن قيىر شىعىستاعى ۆلاديۆوستوك اراسىنداعى مۇقىم اسكەرى تىنىمسىز جاتتىعۋعا كوشكەن. سوعىسقا دايىندالىپ جاتقان جوق. كوروناۆيرۋس ىندەتىنە قارسى حالىققا كومەك بەرۋ ءۇشىن، قاي جەردە، نە ىستەۋ كەرەك، سونى پىسىقتاۋ ۇستىندە. مىنە بۇل بىزگە ۇلگى.

كەشە قىتايدىڭ ۋحانىندا ىندەت وشاعى پايدا بولعاندا قىتاي حالىق ارمياسى حالىققا قالاي كومەك بەردى. قىتاي بيلىگى ارميانى ءساتتى پايدالانا الدى. ال، ءبىزدىڭ ەلدە قالاي؟ ونداي تىرلىكتى بايقاپ تۇرعان جوقپىن. راس، كوشەلەردە پوليتسەيلەرمەن بىرگە جۇرگەن ۇلتتىق ۇلاننىڭ ساربازدارى كوزگە شالىنىپ قالادى. بار بولعانى وسى. ەلدە مۇنداي توتەنشە جاعداي جاريالانعان كەزدە ارميا كەز-كەلگەن وقيعاعا دايار تۇرۋى ءتيىس ەمەس پە! كوشىرەتىندى كوشىرىپ، كومەك بەرەتىنگە قول ءۇشىن سوزىپ دەگەندەي... بۇل ءبىر دەپ قويىڭىز.

ەكىنشىدەن بيلىك «بىزبىرگەمىز» دەپ ۇرانداتىپ، تازا پيار جاساۋعا كوشكەن. اسىرەسە ەلدەگى ساياسي الاڭدا مونوپوليس بولىپ وتىرعان «نۇر وتان» مۇقتاج جاندارعا كومەك بەرىپ جاتىرمىز دەپ ءوزىن-ءوزى تازا جارنامالاۋعا كوشكەن سىندى. ويتكەنى قىر استىندا پارلامەنت سايلاۋى تۇر. ولاردىڭ ازدى-كوپتى جاساپ جاتقان كومەگىنىڭ استارىندا «مىنە بۇگىن ءبىز كومەك بەرىپ جاتىرمىز، ەرتەڭ سايلاۋدا ءبىزدى قولداڭدار» دەگەن يشارا جاتقانى انىق. جانە ول كومەگى مۇقتاج جانداردىڭ بارلىعىنا جەتىپ جاتپاعانى تاعى بەلگىلى.

ۇشىنشىدەن، مۇنداي جاعدايدا ەلدەگى كەز-كەلگەن مينيسترلىك الەۋمەتتىك جەلىلەر ارقىلى كۇندەلىكتى حالىق الدىندا ەسەپ بەرىپ وتىرۋى ءتيىس. سوندا عانا بيلىكتىڭ سىن ساعاتتا حالىق ءۇشىن، مەملەكەت ءۇشىن نە ىستەپ جاتقانى بەلگىلى بولىپ وتىرادى. وكىنىشتىسى، بىزدە ول جوق. كەرىسىنشە ءبىر وتباسىعا بىرەۋ كومەك رەتىندە ءبىر قوراپ كوتەرىپ بارىپ، بەرىپ جاتسا، فوتووتچەت رەتىندە بەس-التى ادام سونى سۋرەتكە تارىپ، ۆيدەوعا ءتۇسىرىپ جۇرەدى. وسىدا كومەك پە؟

حالىققا جانى اشيتىن ۇكىمەت مۇنداي كوز بوياۋشىلىقپەن اينالىسپاس ەدى.

ازاماتحان ءامىرتايدىڭ الەۋمەتتىك جەلىدەگى جازباسى

Abai.kz