تۇركيادان ورالعان ستۋدەنتتەردى كارانتينگە اتىراۋ قالاسىنا ورنالاستىرعان.

اۋەلى ستۋدەنتتەردى جەرگىلىكتى جاتاقحانالاردا ۇستاعان، ودان سوڭ جاڭادان تۇرعىزىلعان ۇيلەردەگى بوس پاتەرلەرگە اۋىستىرعان. اتا-انالار بالالاردىڭ جاعدايىن ويلاپ، الاڭداپ وتىر.

"بوس، سۋىق پاتەرلەر. بالالاردى سول جەردە ءبىر تاۋلىك ۇستادى. سىرتىنان جاۋىپ كەتتى. ولار قاتتى جاۋرادى، سۋىقتان تۇندە ۇيىقتاي المادى", - دەدى شىمكەنتتىك ستۋدەنتتىڭ اناسى نازىم ازيموۆا.

ستۋدەنتتەردىڭ بىرقاتارى كارانتيندەگى جاعدايدى ۆيدەوعا تۇسىرگەن.

تۇركيادان ەۆاكۋاتسيالانعان 25 ستۋدەنتپەن بىرگە تۋريستەر دە ۇشىپ كەلگەن. جولاۋشىلاردىڭ ءبىرىنىڭ تەمپەراتۋراسى جوعارى ەكەنى انىقتالعان. بىراق ستۋدەنتتەر مەن تۋريستەر ءبىر جاتاقحانادا تۇرعان.

ەلگە ورالعان كەزدە الىنعان اناليزدەردە كوروناۆيرۋس انىقتالماعان. بىراق ەكى اپتادان سوڭ ءۇش ادامنىڭ كوروناۆيرۋس جۇقتىرعانى بەلگىلى بولدى.

"ەكى اپتادان كەيىن الىنعان اناليز ءۇش ادامنىڭ اۋرۋ جۇقتىرعانىن انىقتادى. سول سەبەپتى ءبىز ولاردىڭ كارانتيندەگى مەرزىمىن تاعى 14 كۇنگە سوزدىق", - دەدى اتىراۋ وبلىسى اكىمشىلىگىنىڭ ءباسپاسوز حاتشىسى ەرجان قالىمبايۇلى.

قالا بيلىگى كارانتيندەگى ستۋدەنتتەردى سۋىق پاتەرلەردەن جەرگىلىكتى شيپاجايعا كوشىرگەنىن حابارلادى.

Abai.kz