كوروناۆيرۋس ادامزاتتىڭ دەنساۋلىعىنا عانا ەمەس، جان ساۋلىعىنا دا وراسان نۇقسان كەلتىرەيىن دەپ وتىر عوي.

قازىر ۇلىبريتانيانىڭ ماماندارى دابىل قاعۋدا، كوروناۆيرۋستىڭ ادام ساناسىنا، پسيحيكالىق ساۋلىعىنا اسەرى كوپ جىلدارعا سوزىلادى دەپ وتىر. دەمەك، دەپرەسسياعا، پسيحيكالىق اۋرۋلارعا شالدىعاتىندار، وزدەرىنە قول جۇمسايتىندار سانى وسەدى دەپ بولجاپ، سونىڭ الدىن الۋ ءۇشىن جۇمىلا كىرىسىپ جاتىر. ويتكەنى پسيحيكالىق ساۋلىق قورى (Mental Health Foundation) زەرتتەۋ جۇرگىزىپ، كارانتين كەزىندە ەلدەگى 18-24 جاس ارالىعىنداعى جاستاردىڭ 44 %، ال ەرەسەكتەردىڭ تورتتەن ءبىرى (24 %) جالعىزدىق سەزىنگەنىن انىقتاپتى.

ۇكىمەتتىڭ «كەڭەسىمەن» Samaritans-تان باستاپ، پسيحيكالىق ساۋلىققا الاڭدايتىن مىڭداعان ۇيىمدار، كونسۋلدار (بىزشە اكىمشىلىكتەر), ءتۇرلى فەستيۆال، بيزنەس وكىلدەرى كۇندەلىكتى اپدەيت حاتتارىندا جانىڭىزدىڭ ساۋلىعىن كۇتۋ ءۇشىن نە ىستەۋگە بولاتىنىن، وزدەرى سىزگە قانداي كومەك ۇسىنۋعا دايار ەكەنىن جازادى. تەلەفون شالساڭىز، تىڭدايتىن قۇلاق بار دەپ ەسكەرتەدى، ميلليونداعان ەرىكتىلەر وسى ىسكە جۇمىلعان. بىراق تەلەفون شالۋشىلار سانى وسكەن، ەڭ ءىرى ۇيىمداردىڭ ءوزى «ەرىكتىلەر قاجەت، كومەكتەرىڭىز قاجەت» دەپ شىرىلداۋدا.