بەيسەنبى, 28 ناۋرىز 2024
ەل ءىشى... 14896 13 پىكىر 30 ءساۋىر, 2020 ساعات 14:36

قورداي وقيعاسى. اقساقالعا قول كوتەرگەندەرگە ۇكىم شىقتى

بيىل اقپان ايىندا جامبىل وبلىسى قورداي اۋدانىندا ورىن العان شەتىن وقيعا قازاق قوعامىن ءدۇر سىلكىندىردى. اتالعان ايماقتا ۇزاق ۋاقىتتان بەرى قوردالانعان تەكە-تىرەس اۋىزى اشىلعان قاندى جاراداي بۇرق ەتىپ جارىلعان بولاتىن.

بۇل وقيعاعا اركىم ارقالاي باعا بەردى. «بىرلىگى جاراسقان كوپۇلتتى مەملەكەت» دەگەن ۇرانعا بەرىك قازاق بيلىگى قاقتىعىستىڭ سەبەبى قاراپايىم تۇرمىستىق كيكىلجىڭ دەگەن توقتامعا كەلدى. جالعان ينتەرناتسيوناليستەر مەن قازاققا قارسى جۇمىس جاسايتىن رەسەيلىك سيپاتتاعى باق دۇنگەندەردى زارداپ شەگۋشى، قازاقتى زورەكەر ەتىپ كورسەتۋگە تىرىستى. قارياسىن قورلاپ، پوليتسياسىن ساباعان باسسىزدىققا نامىستانعان قازاق جاستارىن اقتاي سويلەگەن از اعايىن جوعارداعى تەگەۋرىندى توپتىڭ تاساسىندا قالدى.

8 اقپان كۇنى وقيعانىڭ سالدارىن جويۋ جونىندەگى ۇكىمەت كوميسسياسى قۇرىلدى. بەردىبەك ساپارباەۆ باستاعان كوميسسيا الدىمەن دۇنگەن جۇرتىمەن كەزدەسىپ، سولاردىڭ كوڭىلىن اۋلادى. قىرعىز اسا قاشقان اق تاقيالى ازاماتتاردى جالىنىپ-جالپايىپ ءجۇرىپ، قايتارىپ اكەلدى. سىنعان-جوعالعان مۇلكىن تولەپ بەرۋگە ۋادە ەتتى. ءۇي-جايىن، قورا-قوپسىسىن قايتا سالىپ بەرەتىنىن ايتتى. سول ءۇشىن بيۋدجەتتەن 1 ملرد. 700 ملن. تەڭگە ءبولىندى.

ونى از دەسەڭىز اتالعان مەملەكەتتىك كوميسسيا قۇرامىندا ۇكىمەتكە ءۇش قايناسا سورپاسى قوسىلمايتىن «دۇنگەن قازاقستاندىق قوعامى» قوعامدىق بىرلەستىگىنىڭ توراعاسى ابۋباكير ۆوينتسە دەگەن ادام جۇمىس ىستەدى. بىراق مەمكوميسسيا قۇرامىندا قازاق بەلسەندىلەرى مەن قوعام قايراتكەرلەرى بولعان جوق.

حالىق ساپارباەۆ باستاعان كوميسسيانىڭ العاشقى ساپارىنا سىن كوزبەن قارادى. جالتاقويلىقپەن ءبىر جاقتى جۇمىس ىستەمەي، قاقتىعىستىڭ تۋىنداۋ سەبەبىنە ءمان بەرۋدى سۇرادى. 80 جاستاعى قاريانىڭ تاياققا جىعىلۋى جانە دۇنگەن ازاماتتاردىڭ پوليتسياعا قول كوتەرۋى قاقتىعىسقا سەبەپ بولعان بولاتىن.

ارادا ءۇش ايعا جۋىق ۋاقىت وتكەندە وسى قاقتىعىسقا سەبەپ بولعان قارت كىسىنى تاياققا جىعىپ، دەنساۋلىعىنا زالال كەلتىردى دەپ ايىپتالعان اكەلى-بالالى يۋنحۋلارعا قاتىستى سوت ۇكىمى شىقتى.

سوتتا 27 جاستاعى مارات يۋنحۋعا بۇزاقىلىق جاساپ، ادام دەنساۋلىعىنا قاساقانا ورتاشا اۋىرلىقتاعى زيان كەلتىردى، ونىڭ 60 جاستاعى اكەسى ەرسمان يۋنحۋعا بۇزاقىلىق جاسادى دەگەن ايىپ تاعىلدى. اكەلى-بالالى بۇزاقىدان ءزابىر كورگەن قۇداشباەۆتار وتباسى سوتتا زارداپ شەگۋشى دەپ تانىلدى. سوت زالىندا جاريالانعان ۇكىمدە وسىلاي ايتىلدى.

سوت 24 ءساۋىر كۇنى سوتتالۋشى مارات يۋنحۋدى كىنالى دەپ تانىپ، وعان 2 جىل 6 ايعا باس بوستاندىعىنان ايىرۋ جازاسىن ورتاشا رەجيمدەگى كولونيادا وتەۋگە كەستى.

«يۋنحۋ مارات ەرمانەۇلىن قر قك 293 باپ 3 ءبولىم 1 جانە 2 پۋنكتى (بۇزاقىلىق), 107 باپ 2 ءبولىم 5 پۋنكتىنە (دەنساۋلىققا قاساقانا ورتاشا زيان كەلتىرۋ) سايكەس قىلمىستىق قۇقىق بۇزعانى ءۇشىن كىنالى دەپ تانىلسىن. وسى باپتارعا سايكەس ەكى جىل التى اي مەرزىمگە باس بوستاندىعىنان ايىرۋ جازاسى تاعايىندالسىن، جازاسى قىلمىستىق-اتقارۋ جۇيەسى ورتاشا قاۋىپسىز مەكەمەلەرىندە وتەلسىن»، – دەلىنگەن جامبىل وبلىسىن قورداي اۋداندىق سوتىنىڭ ۇكىمىندە.

ال ونىڭ اكەسى ەرسمان يۋنحۋ بولعان وقيعاعا كىنالى دەپ تانىلىپ، 2,5 جىلعا باس بوستاندىعىن شەكتەۋ جازاسى تاعايىندالدى.  وعان قىلمىستىق كودەكستىڭ 293 بابى 2 ءبولىمى 1,2 پۋنكتتەرى بويىنشا ايىپ تاعىلعان.

بۇدان بولەك، سوت اكە مەن بالادان 3 ميلليون تەڭگەدەن استام مورالدىق شىعىن ءوندىرۋدى، سونداي-اق سوت شىعىندارىن تولەۋدى مىندەتتەدى.

قازاقستان حالقىن ابىگەرگە سالىپ، تۇتاس بيلىكتى تابانىنان تىك تۇرعىزعان وقيعانىڭ تۇتانۋىنا سەبەپ بولعاندارعا كەسىلگەن جازا وسى. جازانىڭ اۋىر-جەڭىلدىگىن اركىم ءوزى پايىمدار...

ەكىنشى ءبىر ماسەلە، ناۋرىز ايىنىڭ سوڭىندا تارتىپسىزدىكتەرگە بەلسەندى قاتىسقانداردى ۇستاۋ ءۇشىن ارنايى وپەراتسيا جۇرگىزىلىپ، 25 ادام ۇستالدى، ولاردىڭ جەتەۋى بۇرىن سوتتى بولعاندار. ولار الماتىعا اكەلىنىپ، ەكى ايعا قاماۋعا الىنعان بولاتىن.

29-ءساۋىر كۇنى قر باس پروكۋراتۋراسى الماتى قالاسىنىڭ تەرگەۋ يزولياتورىندا وسى ءىس بويىنشا قاماۋعا الىنعان كيباەۆ بەكبول مۋحامەدوۆيچتىڭ قايتىس بولعانىن مالىمدەدى. ونى كامەرادا بىرگە وتىرعاندار سول جاق قولىنىڭ بىلەك تۇسى كەسىلگەن كۇيىندە دارەتحانادان تاپقان. ءولىمنىڭ الدىن الا سەبەبى قانىڭ كوپ جوعالتۋى بولۋى مۇمكىن. قازىر بەكبول كيباەۆتىڭ قايتىس بولۋ فاكتىسى بويىنشا الماتى قالاسىنىڭ ارنايى پروكۋرورلارىمەن سوتقا دەيىنگى تەرگەپ-تەكسەرۋ جۇرگىزىلۋدە.

Abai.kz

13 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530