ءالىبي! اينالايىن، ءالىبي بالام، باسىڭا اۋىر ءىس ءتۇسىپ جاتقان كەزدە ءوز اينالامدا سەنىڭ تاعدىرىڭا بەيتاراپ قاراعان ادام كورمەدىم. مەنىڭ اينالام دەپ وتىرعانىم – ەلىمىزدىڭ ونەر كەڭىستىگىنە، تەاتر الەمىنە، شىعارماشىلىق ءبىلىم بەرۋ سالاسىنا  قاتىسى بار ۇستازدار، ساحنا مەن كينو شەبەرلەرى. اعا بۋىن، ورتا بۋىن، كىشى بۋىن – اقتوبەدە سوتتالىپ جاتقان قارشاداي ءوزىڭدى ويلاپ قامىعۋدا. كەشە تاڭدا سەن تۇسىمە كىردىڭ. ەركىندىككە شىققان ساتىڭە ارنالعان التى الاش باس قوسقان مەرەكە بولىپ جاتىر ەكەن. ورازا ايى باستالعان العاشقى كۇننەن-اق دۇعامداسىڭ، تىلەگىمدەسىڭ. ءتۇسىمدى جاقسىلىققا جورىدىم.

شىنىن ايتقاندا، سەنىڭ تۋعان-تۋىسقاندارىڭدى بىلاي قويعاندا، تالانتىڭ مەن ونەرىڭە، ادامي بولمىسىڭا ءتانتى ۇستازدارىڭ قاتتى قاپالانىپ وتىرمىز. سەنىڭ تەاتر ساحنالارىندا، ۋنيۆەرسيتەت زالدارىندا وتكەن سپەكتاكلدەردەگى سومداعان بەينەلەرىڭدى كورىپ ءتانتى بولدىق. قوڭىر داۋىسىڭمەن جاس ءشامشىنى كوز الدىمىزعا اكەلدىڭ. ومىرگە ىڭكار، جان-جاعىنا شۋاعىن شاشقان مەيىرىمدى شاكىرت رەتىندە كوپتەگەن قوعامدىق-مادەني ءىس-شارانىڭ بەل ورتاسىندا ءجۇردىڭ.

ەلگە قىزمەت ەتۋدىڭ قانداي ەكەنىن جاستىق جالىنعا تولى دارىنىڭمەن ەكسپو حالىقارالىق كورمەسىندەگى مادەني جوبالارعا بەلسەنە قاتىسىپ، كورسەتە ءبىلدىڭ. «قازاقتىڭ قىزجىبەگى» اتانعان مەرۋەرت وتەكەشوۆانىڭ رۋحاني بالاسىنا، ونەردەگى ۇلىنا اينالدىڭ. 2019 جىلدىڭ ماۋسىم ايىنىڭ اياعىندا اتىراۋداعى ماحامبەت اتىنداعى تەاتردىڭ ساحناسىندا سەنىڭ سومداعان بەينەڭ - كورەرمەنگە قول سوقتىرىپ، تاڭداي قاقتىردى. ونەر ساپارى اياقتالىپ، ءبارىمىز ۇشاقپەن نۇر-سۇلتان قالاسىنا ورالدىق. ساباققا دەگەن العىرلىعىڭدى بىلاي قويعاندا، توپ ستاروستاسى رەتىندە سەنىڭ بىرگە وقيتىن دوستارىڭا دەگەن مەيىرىم مەن جاناشىرلىق سەزىمىڭە، ۇيىمداستىرۋشىلىق قابىلەتىڭە سەسسيا كەزدەرىندە، ۇلكەن شارالار كەزىندە تالاي كۋا بولدىق.

ءومىرى ەندى باستالعان، قىلمىسى تولىعىمەن دالەلدەنبەگەن، دارىنى جانارتاۋداي جارقىلداعان جاس جىگىتتى 10 جىلعا سوتتاۋ – ادىلەتسىزدىك! ءالىبيدىڭ بار كىناسى – جاستىعى شىعار، تەاتر الەمىندەگى تەمىردەي ءتارتىپتى 1-2 وقۋشىدان تالاپ ەتكەندىگى. ارينە، سەنىڭ ورنىڭدا تاجىريبەسى بار باسقا بىرەۋ بولعاندا، سول بالالاردى «ديسكوتەكاعا» جىبەرىپ، شارشاپ بيلەگەنشە سالقىنقاندىلىق تانىتىپ، سامارقاۋ تۇرا بەرەر ەدى. ال، سەن – سول كىشكەنتاي بالالاردى تارتىپكە شاقىرعىڭ كەلدى، تاربيەلەگىڭ كەلدى. قازىرگى قوعامداعى شىبىق تيمەي شىڭق ەتەر كەيبىر «بالالاردىڭ» كليپتىك ويلاۋ ساناسىندا اتا-اناسىنا ايتىپ كەك الۋ، ءوش الۋ ءۇردىسى بەلەڭ الىپ بارا جاتىر. جۋىردا عانا بەلورۋس پرەزيدەنتى گ.لۋكاشەنكو – مەكتەپتە سىرتىنان جاسىرىن ۆيدەوعا ءتۇسىرىپ، بالالارعا داۋىس كوتەرىپ، ولاردىڭ مازاعىنا، اتا-انالارىمەن قوعامدىق ۇيىمداردىڭ قۋدالاۋىنا ۇشىراعان ۇستازدى قورعاپ قالعان ءىسى – بەلورۋستىق اتا-انالارعا ساباق بولدى. بالا قۇقىعى قورعالۋى ءتيىس. بالانىڭ تاعدىرى – ەڭ باستى قۇندىلىق. ۇلدار تاربيەلەپ، نەمەرەلەر ءوسىرىپ وتىرعان اكە، اتا رەتىندە – بالا ءبارىمىزدىڭ باۋىر-ەتىمىز. بالالار - ەلدىڭ ەرتەڭى. بىراق بالا پسيحولوگياسىنىڭ جەتەگىندە كەتپەي، ەل بولىپ، قوعام بولىپ وسى ءالىبي وتەپبەرگەننىڭ ىسىنە – ارالاسىپ، جاس دارىندى قورعاپ قالۋىمىز كەرەك دەپ ەسەپتەيمىن. بۇل قازىرگى الەمدى الاڭداتقان احۋال كەزىندەگى ادام تاعدىرىننا بەي-جاي قاراي المايتىن ءبىزدىڭ كىسىلىك بەت-پەردەمىزدى اشىپ بەرۋى ءتيىس. ءالىبي تاعدىرى – ۇلتقا ساباق بولۋى كەرەك. سوندىقتان بۇل ىسكە، ءبىز ۇستازدارى عانا ەمەس، ەلىمىزگە تانىمال پسيحولوگيا نەمەسە پەداگوگيكا عىلىمدارىنىڭ دوكتورلارىن قاتىستىرا وتىرىپ، حالىقارالىق قۇقىق نەگىزىنەن تاجىريەبەسى مول زاڭگەرلەر مەن قوعام قايراتكەرلەرىنىڭ باسىن قوسىپ – مۇقيات تالداۋىمىز كەرەك. ەشقانداي جابىق سوت وتپەۋى ءتيىس!

مەن دە ءالىبي تاعدىرىنا بەي-جاي قاراي المايمىن. جاس تاعدىر يەسىنىڭ وسپەي جاتىپ، وشۋىنە بار بولمىسىممەن قارسىمىن!  الەمنىڭ ونەر كەڭىستىگىن تانىعان جان رەتىندە ايتارىم; ءالىبي وتەپبەرگەن - بولاشاق قازاق ونەرىنىڭ ءاسانالىسى، ءانۋارى، قۇمانى، تۇڭعىشبايى، دوسحانى! ءالىبيدىڭ بويىندا وسى ساڭلاق اعالارى سەكىلدى اكتەرلىك، انشىلىك، سازگەرلىك قابىلەتتەر ۇيلەسىم تاۋىپ، ءبىر ءوزى ءبىر كىسىلىك تەاترعا اينالا الاتىن حاس تالانتتىڭ قاسيەتتەرىنە يە! ال ونەرىنەن بولەك، وتباسى مەن ۇستازدارىنان العان تاربيەسى مەن ادامي قاسيەتتەرى مول جاس.

كەشە عانا باقيلىق دۇنيەدەگى اناسىنا ارناعان زارىن ەستىپ، ساي-سۇيەگىم سىرقىرادى. ەستەرىڭىزدە بولار... مەنىڭ ۇمىتقانىم جوق. وسىدان 3 جىل بۇرىن ەلىمىزدىڭ جاس سپورتشىسى جارىستان ورالىپ كەلە جاتىپ، حالىقارالىق ۇشاق ىشىندە جانىندا وتىرعان جولاۋشى-قىزدىڭ تىزەسىنە قولى ءتۇسىپ، ۇيقىسىراپ باسى ونىڭ يىعىنا سۇيەگەنى ءۇشىن ناقاقتان-ناقاق لوندوندا تاعدىرى سوتقا تۇسكەنى. جالاقور شەت ەلدىك جولاۋشى قىز - قازاقتىڭ وعىلانىنا: «ماعان زورلاۋ ارەكەتىن جاسادى»، - دەپ سوتقا بەرىپ، اەروپورتتا جاس جىگىتتى تۇتقىنعا الادى. وسىنى كوزىمەن كورگەن كورشى ورىندىقتا وتىرعان اعىلشىن وتباسى اراشاعا ءتۇستى. بۇكىل سوت وتىرىسىنا قاتىسىپ، قورعاۋعا بارىن سالدى. سوندا، قازاقتىڭ جاس بالاسىن اعىلشىندار وزدەرى قورعاپ، ونىڭ جىمىسقى ارەكەتى بولماعانىن ايتىپ اقتاپ العان بولاتىن. التى ايعا سوزىلعان سوتتا، ايدالاداعى اعىلشىن سوتى - قازاقتىڭ جاس ورەنىن اقتاپ، ەلىنە ورالۋىنا دانەكەر بولدى.

قازىر دە كوزىمىز كورىپ، بۇكىل ەل كۋا بولىپ وتىرمىز: ەل پرەزيدەنتى ق.توقاەۆ – قىتاي تۇرمەسىندە التى جىل ەركىندىكتى اڭساعان اقجارقىن تۇرلىبايدىڭ ەلگە ورلاۋىنا دانەكەر بولىپ جاتىر. ادام بالاسىن ىستەمەگەن ءىسى ءۇشىن جاۋاپقا تارتۋ – وركەنيەتتىلىكتىڭ بەلگىسى ەمەس! ەشقانداي دا ادامدىق مورالعا سىيمايدى!  ءالىبي – بولاشاق قازاق ونەرىنىڭ قايراتكەرى! ءالىبيدى تولىعىمەن اقتاۋدى سۇرايمىن!

اسحات ماەميروۆ،

قازاقستاننىڭ ەڭبەك سىڭىرگەن قايراتكەرى،

فيلوسوفيا دوكتورى

Abai.kz