وپپوزيتسيا تۋرالى زاڭناما كارانتين كەزىندە قارالماۋى ءتيىس
COVID-19-KZ - 20
كارانتين تاعلىمدارى
باسقا ۋاقىت تابىلماعانداي ءدال كارانتين كەزىندە ءبىزدىڭ اۋزى ماسكاسىز دا بۋلى پارلامەنت ەرەكشە بەلسەندىلىك تانىتىپ، بىرىنەن سوڭ ءبىر پىتىرلاتىپ زاڭ قابىلداپ جاتىر! جانە دە ونىڭ ىشىندە ىلعي قوعامدىق-ساياسي ماڭىزى بار زاڭدار: ميتينگىلەر، پارتيالار، سايالاۋ تۋرالى. ەندى، مىنە، پارلامەنتتىك وپپوزيتسيا تۋرالى زاڭناما دا قاراستىرىلىپ جاتىر ەكەن دەگەن اقپارات شىعىپ جاتىر.
اينالايىندار-اۋ! وپپوزيتسيا تۋرالى زاڭدى وپپوزيتسيا ۇسىنۋى نە قورعاۋى كەرەك ەمەس پە؟
بۇگىنگى پارلامەنتتەگى قانداي وپپوزيتسيا ول؟!
ول ەكى پارتيا "نۇروتاننىڭ" ايتقانىنان شىقپايتىن قۇيىرشىقتارى، ساياسي ساتەليتتەرى ەمەس پە؟
ەلدەگى جاعدايدى وسىنشاما ۋشىعىپ كەتۋىنە، ەلدە اۆتوكراتيا ورناۋىنا ءدال سول ەكى كۆازيدەموكراتيالىق پارتيانىڭ قوماقتى ۇلەسى بار ەمەس پە؟
باسقاسىن ايتپاعاندا، جاڭاوزەندە بەيبىت حالىقتى قىناداي قىرىپ جاتقاندا، ولار پارلامەنت مىنبەسىنە شىعىپ اپ، داۋىس شىعاردى ما؟!
مەن ءۇشىن جاڭاوزەن - ناعىز حالىقشىلدىقتىڭ، دەموكراتياشىلدىقتىڭ ينديكاتورى! ول كەزدە ۇندەمەي قالعان كەز كەلگەن ۇيىم نە تۇلعا ءوزىن حالىقشىل دەپ اتاۋعا مورالدىق قاقى جوق!
ولاي بولسا، بىزگە "توتەنشە جاعداي كەزىندە پارلامەنتتە مەملەكەتتىڭ ساياسي جۇيەسىنە تىكەلەي اسەر ەتەتىن زاڭ جوبالارىن قاراستىرۋعا ۋاقىتشا تىيىم سالىنادى" دەگەن باپ ەنگىزۋ كەرەك.
ويتكەنى كارانتين كەزىندە زاڭعا سايكەس جاريا قوعامدىق تىرلىك، قيمىل-ارەكەت جاساۋعا كەدەرگى كوپ.
ايتپەسە، بۇلار كارانتين كەزىندە ويىنا كەلگەنىن جاساپ الۋى ابدەن مۇمكىن!
ءامىرجان قوساننىڭ الەۋمەتتىك جەلىدەگى جازباسى
Abai.kz
