مەملەكەت باسشىسى قاسىم-جومارت توقاەۆ جەڭىس كۇنىمەن قۇتتىقتادى.

قۇرمەتتى وتانداستار!

بارشاڭىزدى ۇلى وتان سوعىسىنداعى جەڭىستىڭ 75 جىلدىعىمەن شىن جۇرەكتەن قۇتتىقتايمىن!

بۇل مەرەيلى مەرەكە قانقۇيلى جاۋدى كۇيرەتە جەڭىپ، تۋعان جەرىن قورعاپ قالعان اكەلەرىمىز بەن اتالارىمىزدىڭ وشپەس ەرلىگىن دارىپتەيدى.

قازاقستاندىقتار قيىن-قىستاۋ كەزەڭدە باتىرلىق پەن جانقيارلىقتىڭ جارقىن ۇلگىسىن كورسەتتى. مايدانعا اتتانعان 1 ميلليون 200 مىڭ ازاماتىمىزدىڭ جارتىسى ەلگە ورالعان جوق.

تالعات بيگەلدينوۆ، سەرگەي لۋگانسكي، لەونيد بەدا، ءاليا مولداعۇلوۆا، مانشۇك مامەتوۆا، يۆان پاۆلوۆ، باۋىرجان مومىشۇلى، ساعادات نۇرماعامبەتوۆ، مالىك عابدۋللين، حيۋاز دوسپانوۆا، راقىمجان قوشقارباەۆ جانە باسقا داڭقتى باتىرلارىمىزدىڭ ەسىمدەرى ماڭگى ەستە ساقتالادى.

سوعىس جىلدارىندا قازاقستانعا كوشىرىلگەن جۇزدەگەن وندىرىستىك جانە ونەركاسىپتىك كاسىپورىنداردا مىڭداعان وتانداسىمىز ەڭبەك ەتىپ، ۇلى جەڭىستى جاقىنداتۋعا ۇلەس قوستى. ءاربىر ون وقتىڭ توعىزى قازاقستاندا وندىرىلگەن قورعاسىننان قۇيىلدى. اۋىل حالقى جاۋىنگەرلەردى ازىق-تۇلىكپەن قامتاماسىز ەتۋ ءۇشىن ايانباي تەر توكتى.

ءبىز ەرجۇرەك اعا بۋىننىڭ الدىندا ماڭگى قارىزدارمىز. ولاردىڭ قايسارلىعى مەن توزىمدىلىگىنىڭ، تاباندىلىعى مەن  پاتريوتتىعىنىڭ ارقاسىندا بەيبىت زاماندا ءومىر ءسۇرىپ، جارقىن بولاشاعىمىزعا جول اشتىق.

بيىل مەرەكە كۇنى وزگەشە احۋالعا تۇسپا-تۇس كەلسە دە مايدانگەرلەردىڭ ەشبىرى ەلەۋسىز قالعان جوق.

ارداگەرلەرىمىزگە مىقتى دەنساۋلىق جانە باق-بەرەكە تىلەيمىن!

ەلىمىزدە ءاردايىم بەيبىتشىلىك پەن تىنىشتىق بولسىن!

Abai.kz