كەشە ۇكىمەت قازاقستان ازاماتتارىنىڭ ارمەنيا رەسپۋبليكاسىندا تىركەلگەن جەكەلەگەن كولىك قۇرالدارىن قازاقستان رەسپۋبليكاسىنا اكەلۋى مەن پايدالانۋىنىڭ كەيبىر ماسەلەلەرى تۋرالى قاۋلى قابىلدادى. 

قاۋلىعا سايكەس، ارمەنيانىڭ ۋاكىلەتتى ورگاندارىندا قازاقستان ازاماتتارىنىڭ اتىنا تىركەلگەن جانە قازاقستانعا 2020 جىلدىڭ 1 اقپانىنا دەيىن اكەلىنگەن، جۇرگىزۋ ورگاندارى سول جاقتا ورنالاسقان كولىك قۇرالدارى تىركەلەدى.

سونىمەن قاتار، ازاماتتار كولىك قۇرالدارىن باستاپقى تىركەۋ نەمەسە قازاقستان اۋماعىنان تىس جەرلەرگە شىعارۋ تۋرالى شەشىم قابىلداعان جاعدايدا وعان قاتىستى تىركەۋ ءىس-ارەكەتتەرىن جاساۋدى قامتاماسىز ەتۋ بويىنشا شارالار قر سالىق كودەكسىنىڭ 615-بابىنا سايكەس مەملەكەتتىك باجدار تولەي وتىرىپ ىسكە اسىرىلادى.

اتالعان قاۋلىدا ۇكىمەت بىرنەشە مينيسترلىكتەرگە مىندەتتەر ارتقان. ول بويىنشا:

قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى كولىك قۇرالىن تىركەۋدى جۇزەگە اسىرۋ كەزىندە ارمەنيا رەسپۋبليكاسىنىڭ ۋاكىلەتتى ورگاندارى بەرگەن كولىك قۇرالدارىن تىركەۋ قۇجاتتارىنىڭ تۇپنۇسقالارىن جانە مەملەكەتتىك تىركەۋ ءنومىرى بەلگىلەرىن مەنشىك يەلەرى سۇراعانعا دەيىن ساقتاۋدى قامتاماسىز ەتەدى.

قر قارجى مينيسترلىگى مەن قر يندۋستريا جانە ينفراقۇرىلىمدىق دامۋ مينيسترلىكتەرى تىركەلگەن كولىك قۇرالدارى مەنشىك يەلەرىنىڭ سالىق مىندەتتەمەلەرىن تولەۋ جانە مىندەتتى تەحنيكالىق قاراپ-تەكسەرۋدەن ءوتۋ مۇمكىندىگىن قامتاماسىز ەتەدى.

قر اقپارات جانە قوعامدىق دامۋ مينيسترلىگى وسى قاۋلىدا كورسەتىلگەن تىركەلگەن كولىك قۇرالدارىن پايدالانۋعا شەكتەۋلەردىڭ جوق ەكەنى جونىندە ءتۇسىندىرۋ جۇمىسىن جۇرگىزۋدى قامتاماسىز ەتەدى.

قر قارجى مينيسترلىگى مەن قر ەكولوگيا، گەولوگيا جانە تابيعي رەسۋرستار مينيسترلىكتەرى تىركەلگەن كولىك قۇرالىنىڭ مەنشىك يەسى ونى باستاپقى تىركەۋ تۋرالى شەشىم قابىلداعانعا دەيىن كەدەندىك باجداردى، باستاپقى تىركەۋ ءۇشىن الىمداردى جانە وندىرۋشىلەردىڭ (يمپورتتاۋشىلاردىڭ) كەڭەيتىلگەن مىندەتتەمەلەرى شەڭبەرىندە قالدىقتاردى جيناۋدى، تاسىمالداۋدى، قايتا وڭدەۋدى، زالالسىزداندىرۋدى، پايدالانۋدى جانە (نەمەسە) كادەگە جاراتۋدى ۇيىمداستىرۋ ءۇشىن تولەمدى تولەۋ قاجەتتىگىنىڭ جوق ەكەنى جونىندە ءتۇسىندىرۋ جۇمىسىن جۇرگىزۋدى قامتاماسىز ەتەدى.

قر قارجى جانە ىشكى ىستەر مينيسترلىكتەرى ەاەو قۇقىقتارى مەن قر زاڭناماسىن بۇزا وتىرىپ، قازاقستانعا 2020 جىلعى 1 اقپاننان كەيىن كولىك قۇرالدارىن اكەلۋدى جۇزەگە اسىرعان ادامدارعا قاتىستى زاڭنامادا بەلگىلەنگەن شارالاردى قابىلدايدى.

قر باس پروكۋراتۋراسى جانە ۇلتتىق قاۋىپسىزدىك كوميتەتى 2021 جىلعى 1 جەلتوقسانعا دەيىن ىشكى ىستەر ورگاندارىنىڭ باسقا ەلدەردىڭ ۋاكىلەتتى ورگاندارىندا تىركەلگەن كولىك قۇرالدارىمەن قر مەملەكەتتىك شەكاراسىن كەسىپ ءوتۋ تۋرالى مالىمەتتەرگە، ولاردىڭ يەلەرى جانە ولاردى جۇرگىزەتىن ادامدار تۋرالى دەرەكتەرگە قولجەتىمدىلىگىن ۇيىمداستىرۋ ءۇشىن «اكىمشىلىك ءىس جۇرگىزۋدىڭ بىرىڭعاي ءتىزىلىمى» جانە «بۇركىت» ۆەدومستۆولىق اقپاراتتىق جۇيەلەرىن ينتەگراتسيالاۋدى قامتاماسىز ەتەدى.

قر ىشكى ىستەر، قارجى، يندۋستريا جانە ينفراقۇرىلىمدىق دامۋ، ەكولوگيا، گەولوگيا جانە تابيعي رەسۋرستار، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرى زاڭنامادا بەلگىلەنگەن تارتىپپەن وسى قاۋلىدان تۋىندايتىن شارالاردى قابىلدايدى.

اتالعان قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

Abai.kz