بريتان جازۋشىسى جوان روۋليڭ جازعان «ءحارري پوتتەر» سەرياسىنىڭ ەكىنشى كىتابى «ءحارري پوتتەر مەن جاسىرىن بولمە» رومانى رەسمي تۇردە قازاق تىلىنە اۋدارىلىپ، ساتىلىمعا شىقتى. 

ەكىنشى كىتاپتا وقىرمانعا جاقسى تانىس كەيىپكەرلەر ءحارري، رون جانە ءحارميونا حوگۋارتس سيقىر مەكتەبىندەگى الدەبىر تىلسىم «مۇراگەردىڭ» وقۋشىلارعا جاساعان شابۋىلىن زەرتتەيدى. 

«ءحارري پوتتەر» سەرياسىن قازاق تىلىنە اۋدارىپ جاتقان «Steppe & WORLD Publishing» باسپاسىنىڭ باسشىسى رايسا سايرانقىزى قادىردىڭ ايتۋىنشا، «ءحارري پوتتەر مەن جاسىرىن بولمە»  5 000 دانامەن جارىق كورگەن. 

«وسى جىلدىڭ اقپان ايىندا شىققان سەريانىڭ ءبىرىنشى كىتابى «ءحارري پوتتەر مەن ءپالساپا تاس» ۇلكەن سۇرانىسقا يە بولدى. كەي كىتاپ دۇكەنىندە ەڭ كوپ ساتىلعان ەڭبەكتەردىڭ قاتارىنا كىردى. وقىرماندار اۋدارما دەڭگەيى، كىتاپ ساپاسى تۋرالى جاقسى پىكىر ءبىلدىردى. بۇل ءبىزدى كەرەمەت قاناتتاندىردى»، - دەيدى ول. 

رايسا سايرانقىزىنىڭ ايتۋىنشا، سەريانىڭ ءۇشىنشى كىتابى «ءحارري پوتتەر مەن ازكابان تۇتقىنى» ماۋسىم ايىنىڭ سوڭىندا جارىق كورەدى. جىل اياعىنا دەيىن ءتورتىنشى جانە بەسىنشى كىتاپتاردى شىعارۋ جوسپارلانىپ وتىر. 

«ءحارري پوتتەر مەن جاسىرىن بولمە» كىتابىنىڭ جاۋاپتى رەداكتورى نازگۇل قوجابەك ەڭبەكتى اۋدارۋ بارىسىندا بولعان كەي قىزىق جايتتى اتاپ ءوتتى. 

«ءحارري پوتتەر» سەرياسىنىڭ ەكىنشى كىتابى «ءحارري پوتتەر مەن جاسىرىن بولمە» كىتابىندا بىرنەشە جاڭا كەيىپكەر قوسىلدى. ماسەلەن، وسى كىتاپتاعى وقيعانىڭ «تۇپقازىعى» – الىپ جىلان Basilisk. ورىس تىلىندەگى نۇسقاسىندا ۆاسيليسك دەپ الىنعان. ءبىز ونى اجداھا دەدىك. ەجەلگى ەرتەگىلەردى اقتارىپ، جىلان پاتشاسىنىڭ اتاۋىن الۋدى ءجون كوردىك. تاعى ءبىر «قينالعان» تۇسىمىز - توم رەدلدىڭ اتىنان «مەن لورد ۆولدەمورت» دەگەن اناگرامما شىعارۋ بولدى. كوپشىلىك بىلەتىندەي، بۇل – ءتۇرلى تىلدەرگە اۋدارۋ بارىسىندا قاتتى قيىندىق تۋدىرعان نارسە، سونىڭ سالدارىنان تۇپنۇسقاداعى Tom Marvolo Riddle ەسىمى تۇرلىشە قۇبىلىپ كەتتى. ءبىز "مەن لورد ۆولدەمورت" دەگەن ءۇش سوزدەگى ارىپتەردىڭ ءبارىن شىعارۋ ءۇشىن ءسال وزگەرتۋىمىزگە تۋرا كەلدى. قالاي وزگەرتكەنىمىزدى وقىرمان كورە جاتار»، - دەدى نازگۇل قوجابەك. 

كىتاپتى قازاق تىلىنە تارجىمالاعان اۋدارماشى دينارا مازەننىڭ ايتۋىنشا، ەكىنشى كىتاپتىڭ اتاۋىن بەلگىلەۋگە ۇزاق ۋاقىت كەتكەن. 

«قۇپيا بولمە»، «جۇمباق بولمە»، «جاسىرىن جاي» سەكىلدى ءتۇرلى نۇسقا بولدى. سونىڭ اراسىنان تاقىرىپتى جاقسى اشادى دەگەن كەلىسىممەن «جاسىرىن بولمە» دەگەن اتاۋدى تاڭدادىق. جالپى العاندا، ءبىرىنشى كىتاپتا كوپتەگەن تەرميندەردى ناقتىلاپ، بەكىتىپ العاندىقتان، ەكىنشى كىتاپ تەزىرەك اۋدارىلدى»، - دەپ اتاپ ءوتتى دينارا مازەن. 

«ءحارري پوتتەر» جانە ونىڭ الەمى تۋرالى ەڭبەكتەردى قازاق تىلىندە شىعارۋ قۇقىعى «Steppe & WORLD Publishing» باسپاسىنا تيەسىلى. جوبا قانداي دا ءبىر سىرتقى قارجىلاندىرۋسىز جۇزەگە اسىرىلىپ جاتىر. 

«ءحارري پوتتەر مەن ءپالساپا تاس» كىتابىنا قازىر «Steppe & WORLD Publishing» باسپاسىنىڭ الەۋمەتتىك جەلىلەردەگى پاراقشالارى (Facebook, Instagram) ارقىلى، سونداي-اق whatsapp مەسسەندجەرىمەن +7 700 246 35 30 ءنومىرى بويىنشا تاپسىرىس بەرۋگە بولادى. ال 2020 جىلدىڭ مامىر ايىنىڭ 26 جۇلدىزىنان باستاپ «مەلومان»، Flip.kz, «ەرۋديت»، «Magic Toys»، «قازىنا»، Cocobee.kz, Kitapal.kz, Knizhka.kz كىتاپ دۇكەندەرىنەن ساتىپ الۋ مۇمكىندىگى پايدا بولادى. 

قوسىمشا اقپارات: 

رايسا سايرانقىزى قادىر – «Steppe & WORLD Publishing» باسپاسى مەن «Alghayat» ادەبي اگەنتتىگىنىڭ نەگىزىن قالاۋشىسى، باسشىسى. بالالارعا ارنالعان جۋليا دونالدسوننىڭ «اقىن قويان»، «گرۋففالو»، ەريك كارلدىڭ «قوماعاي جۇلدىزقۇرت»، سونداي-اق «اننا فرانكتىڭ كۇندەلىگى» سەكىلدى كىتاپتاردى قازاق تىلىنە اۋدارۋعا باستاماشى بولعان. 

نازگۇل قوجابەك – رەداكتور، اۋدارماشى. ءال-فارابي اتىنداعى قازۇۋ تۇلەگى، فيلولوگيا ماگيسترى. «مەنەدجمەنت» (اۆتورى – ر. گريففين), «ماركەتينگ نەگىزدەرى» (ف. كوتلەر), Oxford ەكونوميكا سوزدىگى سەكىلدى بىرنەشە كىتاپتىڭ اۋدارماشىسى ءارى رەداكتورى. 

دينارا مازەن – اۋدارماشى. كوركەم اۋدارما ماگيسترى. «الەم كەرەمەتتەرى ەنتسيكلوپەدياسى»، «روبين گۋدتىڭ باسىنان كەشكەن قىزىقتى وقيعالارى»، «الەمدى 80 كۇندە شارلاۋ»، «ۇلى ونەرتابىستار ەنتسيكلوپەدياسى»، «قازىرگى بيزنەس كوممۋنيكاتسيا»، «مەديا جانە جۋرناليستيكا» سەكىلدى ءتۇرلى كىتاپتاردىڭ اۋدارماشىسى. 

Abai.kz