سىرتقى الاڭدا مەملەكەتتىڭ ۇلتتىق مۇددەسى ءۇشىن كۇرەسۋ «شۇعىل بۇرىلىسى كوپ» ۋاقىتتا وتە ماڭىزدى.

دۇنيەجۇزىلىك ەكونوميكا رەتسەسسيادا. بۇگىندە، كوروناۆيرۋس پاندەمياسى الەمگە 9-ترلن. دوللار شىعىن اكەلەدى دەپ بولجانۋدا. بۇل وپتيميستىك تسيفر، شىعىن ودان دا كوپ بولۋى ىقتيمال. وسىنداي اۋىر كەزەڭدە ۇلتتىق ەكونوميكانى قورعايتىن، مەملەكەتتىك پروتەكتسيا تاسىلدەرى وتە ماڭىزدى.

ەل پرەزيدەنتى ق.توقاەۆتىڭ ەۆرازيا وداعى سامميتىندە سويلەگەن ءسوزى، ەكونوميكا سالاسىنداعى مەملەكەت مۇددەسىن قورعاۋدىڭ ۇلگىسى.

شىنى كەرەك، ەۆرازيا وداعى اياسىندا قازاقستاننىڭ ساۋدا سالدوسى مينۋس دارەجەدە. باسقا ەلدەر بىزگە تاۋاردى كوپ ساتادى. ءبىزدىڭ تاۋارلارعا رەسەيدە، بەلورۋسسيادا كوپتەگەن نورماتيۆتىك كەدەرگىلەر قويىلعان.

وسى ماسەلەنى ءجىتى قاداعالاپ وتىرۋ وتە ماڭىزدى.

كوپتەگەن ءنورماتيۆتى قۇجاتتار ەەو اپپاراتى دايىندايدى. سول اپپاراتتا قازاقستاننىڭ دا وكىلدەرى جۇمىس ىستەيدى.

ولار جالاقىنى ەلىمىزدى «ۆزنوسى» ەسەبىنەن الادى جانە جالاقىلارى مينيستردىكىنەن از ەمەس. ول جىگىتتەر «نەگە قازاقستان مەملەكەتىنىڭ مۇددەلەرىن قورعامايدى» دەگەن سۇراق تۋادى. ەگەر الجۋازدىق تانىتسا، ولاردى ەلگە قايتارۋدىڭ امالىن قاراستىرۋ شارت.

مۇمكىن كورشى مەملەكەتتەر ولاردىڭ اۋزىن «ۇلدەمەن- بۇلدەمەن» تىعىنداپ قويعان شىعار؟ وسى ماسەلەنى ساراپتاۋ كەرەك.

مەملەكەت باسشىسىنىڭ مادەنيەتتى، پاراساتتى، ديپلوماتيالىق تۇردە ەل مۇددەسىن اشىق ايتقانى وتە دۇرىس تەندەنتسيا.

ەندى، وسى وداقتىڭ ىشىندەگى قازاقستاننىڭ الىسى مەن بەرىسى، شىعىسى مەن كىرىسى قانداي دەگەن سۇراققا جاۋاپ بەرەتىن ۋاقىت جەتتى.

ءبىر وداقتىڭ ىشىندە وتىرىپ، ءوزىڭنىڭ وداقتاسىڭا ( بەلورۋسسيا) مۇنايىڭدى ساتا الماساڭ، «ونداي وداقتىڭ قاجەتى بار ما» دەگەن زاڭدى سۇراق تۋادى.
قازىر مەملەكەتتەردىڭ بارشاسى ءوزىنىڭ ەكونوميكاسىن قورعاۋعا امال جاساپ، (اقش، ەو) باسقالارعا ەسىكتەرىن جاۋىپ جاتىر. ارينە، بۇل قادامنىڭ ءوزىن سابىرلى، جان- جاقتى ويلانىپ، ەسەپ- قيسابىن جاساپ ەنگىزۋ قاجەت.

دەگەنمەن، مىنا قيلى زاماننىڭ ۇرانى «ورتاق وگىزدەن، وڭاشا بۇزاۋ» بولىپ تۇر. «زامانىڭ قاسقىر بولسا، ءبورى بولىپ شال» دەيدى.

اڭدىسىن اڭدىپ، قىراعى كوزبەن شالىپ، ەسەپ- قيساپتى ەكشەلەپ، ءوزىمىزدىڭ تەرىنى يلەيتىن كەزەڭگە كەلدىك. ءبىزدىڭ تەرىنى وزىمىزدەن باسقا ەشكىم يلەپ بەرمەيدى...

ەرلان سايروۆتىڭ جەلىدەگى جازباسى

Abai.kz