كەز-كەلگەن ۇلتتىڭ تاۋەلسىزدىگىن كەپىلدەۋشى العىشارتتاردىڭ ىشىندە قارۋلى كۇشتەر شەشۋشى ورىنعا يە. ارينە، سوعىستان اۋلاق بولايىق. بىراق ەل باسىنا كۇن تۋعاندا جاۋعا قارسى تۇرا الماعان تاۋەلسىزدىكتىڭ قۇنى دا كوك تيىن. ونىڭ ۇستىنە قولدا بار اسكەري الەۋەتتىڭ ءوزى جاۋگەر كورشىلەردى ساباسىنا سالاتىن قۇدىرەتىن دە نازاردا ۇستايىق.

قازىرگى قازاقستاننىڭ قورعانىس قابىلەتىنە قاتىستى ءتۇرلى باعالاۋلار بولۋى مۇمكىن. ءوز باسىم، وكىنىشكە وراي، ونىسى زاماناۋي تاۋەكەلدەرگە توتەپ بەرۋگە جەتكىلىكتى دەپ سانامايمىن. بۇعان دالەلدى كسرو شەكپەنىنەن شىعىپ، الىسقا كەتە قويماعان تمد-داعى كورشىلەردىڭ ايانىشتى تاجىريبەسىنەن تابۋ قيىنعا سوقپايدى.

جالپى، كەڭەس وداعى، ونىڭ ميراسقورى - بۇگىنگى رەسەي فەدەراتسياسىنىڭ اسكەري الەۋەتىنەن قورقۋ، نە ودان ۇيرەنگىسى كەلۋ ەش قيسىنعا كەلمەيدى. قاراپ كورىڭىز - ماقتاۋلى كەڭەس-رەسەي اسكەرى سوڭعى 70 جىلدا 40-تان استام سوعىس جۇرگىزدى: كۋبا، انگولا، اۋعانىستان، مولدوۆا، گرۋزيا، مىسىر، كورەي تۇبەگى، نيكاراگۋا، ۆەتنام، چەحيا، ۆەنگريا، شەشەنستان، ۋكراينا، ت.ب. بارلىعىندا دا جەڭىلىسكە ۇشىرادى. وسىدان كەپ تۋىندايتىن كەلەسى تۇيتكىل - رەسمي اسكەريلەردىڭ، اۋعان جاۋىنگەرلەرى سەكىلدى توپتاردىڭ ماسكەۋگە قاراپ قالعانى الاڭداتادى. وسىنداي سوقىر سەنىمشىلدىك كەزىندە ۋكراينا مەن گرۋزيانى جاعا ۇستاتتى - سىن ساعاتتا سەنگەن ارمياسىنىڭ، ىشكى اسكەردىڭ، ۇلتتىق گۆارديا مەن قاۋىپسىزدىك ورىندارىنىڭ 80 پايىزى رەسەيدىڭ جانسىزدارى بولىپ شىعىپ ءوز وتانىنا قارسى ارەكەت جاسادى.

ايتپاعىم - ءپۋتينشىل رەسەيدىڭ كۇشى مۇلدە ارميادا ەمەس، كورشىلەرىن ارانداتۋدا، ولاردى ىشتەي ءبىر-بىرىنە ايداپ سالۋدا جاتىر. وسىنداي كەلەڭسىزدىك پەن ساتقىندىقتان نەعۇرلىم ەرتە ساباق الساق، سوعۇرلىم باسىمىز امان بولماق. ال باستىسى - شىرىگەن رەسەي ەمەس، كەزىندە جارتى الەمدى باعىندىرعان اتا-بابانىڭ تاعىلىمىنان ءنار الساق. ناقتىلاعاندا بۇگىنگى قازاقستاندا ارمياعا قوسا كەڭ اۋقىمداعى ۇلتتىق گۆارديا قاناتىن جايسا، ونىڭ قاتارىنا تەك قازاقتىڭ ءتىلى مەن بولمىسىن بويىنا سىڭىرگەن پاتريوت ساربازدار ەنسە، ال ولاردىڭ جالاقىسى بانكيرلەردەن كەم بولماسا. قانىمىزعا جاقىن ءار سارباز جاۋاپكەرشىلىگىن انىق بىلگەن وندىق، جۇزدىك، مىڭدىق، تۇمەندىك جۇيە قالىپقا كەلسە.

مەنىڭ كەلەسى ارمانىم - قازاق قارۋلى كۇشتەرى تۇركياداعى سياقتى ءتۇبى قوعامداعى اريستوكراتياعا اينالۋى.

مەنىڭ ارمانىم - شۆەيتسارياداعى سىندى ارميا عانا ەمەس، ءار ازاماتى ەلىنە قاۋىپ تونگەندە قولىنداعى قارۋىمەن جەرىن قورعاۋعا دايىن بولۋى.

مەنىڭ ارمانىم - يزرايلدە سەكىلدى بۇكىل حالىق ءوز قارۋلى كۇشتەرىنە قۇرمەت كورسەتىپ تورگە شىعارعانى.

وسىنداي جۇيە قازاقتا قۇرىلسا ىشتەگى بەسىنشى كولوننانىڭ دا اۋىزىنا قۇم قۇيىلارى انىق. تۇسىنەمىن، بىزگە، قازاق قوعامىنا، ءبىرىنشى كەزەكتە ساياسي رەفورمالار، دەموكراتيا، نارىقتىق ەكونوميكا اۋاداي قاجەت. تەك كۇشتىك قۇرىلىمداردى قايتا قۇرماي، الگى باعىتتارداعى ىقتيمال جەتىستىگىمىز ءبىر كۇندە جوق بولۋى بەك مۇمكىن.

اينالىپ كەلگەندە ءوز اسكەرىنىڭ قامىن ويلاماعان جۇرت ءتۇبى بوگدەنىڭ جەمتىگىنە اينالادى.

راسۋل جۇمالىنىڭ الەۋمەتتىك جەلىدەگى جازباسى

Abai.kz