نۇر-سۇلتان جانە الماتى قالالارى، الاكول، بالقاش، ششۋچينسك-بۋراباي كۋرورتتىق ايماقتارى، كاسپي تەڭىزىنىڭ اقتاۋ جاعالاۋى جانە ت. ب. تۋريستەردى قابىلداۋعا دايىن،- دەپ حابارلايدى Elorda.info.

قازاقستان رەسپۋبليكاسىنىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىندا رەسپۋبليكالىق دەڭگەيدەگى 10 تۋريستىك اۋماق بەكىتىلگەن. ولار پەرسپەكتيۆالى جانە ءتۋريزمدى دامىتۋدىڭ نەگىزگى باعىتتارى رەتىندە قاراستىرىلادى جانە تۋريستىك نارىقتىڭ ءارتۇرلى سەگمەنتتەرى ءۇشىن وزدەرىنىڭ ەرەكشەلىكتەرى، سونداي-اق دامۋدىڭ جوعارى الەۋەتى بار.

ولاردى ىرىكتەۋ كريتەريلەرىنە نىساننىڭ تۋريستىك ماگنيت رەتىندە بىرەگەيلىگى جانە تۋريستىك اعىننىڭ الەۋەتتى ءوسۋى بولدى.

ولاردىڭ قاتارىندا الماتى جانە شىعىس قازاقستان وبلىستارىنىڭ جاعالاۋلارىنداعى الاكول كولى، ششۋچە-بۋراباي، باياناۋىل، يمانتاۋ-شالقار، بالقاش، ماڭعىستاۋ كۋرورتتىق ايماقتارى، تۇركىستان تاريحي-مادەني كەشەنى، MICE-تۋريزم ورتالىعى رەتىندە نۇر-سۇلتان قالاسى، «بايقوڭىر» تۋريستىك كەشەنىن دامىتۋ، سونداي-اق الماتى قالاسىنىڭ تۋريستىك كلاستەرىن جانە وعان ىرگەلەس الماتى وبلىسىنداعى ۇلتتىق پاركتەردى كەشەندى دامىتۋدى قامتيتىن الماتى ءوڭىرىنىڭ تاۋ كلاستەرى بار.

«وسى دەستيناتسيالاردىڭ كوپشىلىگىنىڭ ينفراقۇرىلىمى، اتاپ ايتقاندا، نۇر-سۇلتان جانە الماتى قالالارى، الاكول، بالقاش، ششۋچينسك-بۋراباي كۋرورتتىق ايماقتارى، كاسپي تەڭىزىنىڭ اقتاۋ جاعالاۋى جانە ت. ب. تۋريستەردىڭ جاپپاي اعىنىن قابىلداۋعا دايىن. بۇل رەتتە، اعىمداعى ەپيدەميولوگيالىق جاعداي اياسىندا تۋريستىك وبەكتىلەردىڭ جۇمىسى سانيتارلىق-ەپيدەميولوگيالىق باقىلاۋ ورگاندارىنىڭ بارلىق تالاپتارىن ساقتاي وتىرىپ جۇزەگە اسىرىلاتىن بولادى»، دەپ كورسەتتى ۆەدومستۆونىڭ ءباسپاسوز قىزمەتى.

بيىلعى ماۋسىمدا شەتەلدەن 1 ملن جانە 5,1 ملن وتاندىق تۋريست قازاقستاننىڭ كورىكتى جەرلەرىن ارالايدى دەگەن بولجام جاسالعان. الايدا، كوروناۆيرۋستىق ينفەكتسيانىڭ پاندەمياسىنا جانە ەنگىزىلگەن كارانتيندىك شەكتەۋلەرگە بايلانىستى ەپيدەميولوگيالىق جاعدايعا وراي وسى كورسەتكىشتەردىڭ وزگەرۋى مۇمكىن.

قازاقستاندىقتار مەن شەتەلدىك تۋريستەردىڭ اراسىندا ششۋچە-بۋراباي كۋرورتتىق ايماعى، يمانتاۋ-شالقار رەكرەاتسيالىق ايماعى، الماتى جانە شىعىس قازاقستان وبلىستارىنىڭ الاكول كولى، قاراعاندى وبلىسىنىڭ بالقاش كولى، باياناۋىل، پاۆلودار وبلىسىنداعى «مويىلدى» ءساناتوريى، شىعىس قازاقستان وبلىسىنداعى كاتون-قاراعاي بۇقتىرما سۋ قويماسى، تۇركىستان وبلىسىنداعى «سارىاعاش» ءساناتوريى، ماڭعىستاۋ وبلىسىنداعى كاسپي جاعالاۋى، الماتى وبلىسىنداعى «قاپشاعاي» سۋ قويماسى، قوستاناي وبلىسىنداعى «سوسنوۆىي بور» ءساناتوريى جانە وزگە دە كۋرورتتار وتە تانىمال.

Abai.kz