الماتى وبلىسى ۇيعىر اۋدانى شونجى اۋىلىندا تۇرعىندار اراسىندا قاقتىعىس بولىپ، بىرنەشە ازامات ەمحاناعا ءتۇستى. وسىعان بايلانىستى الماتى وبلىسىنىڭ اكىمى اماندىق باتالوۆ بۇگىن شونجى اۋىلىنا بارىپ، اۋىل تۇرعىندارىمەن شۇعىل جينالىس وتكىزدى.

اzattyq ruhy سايتىنىڭ حابارلاۋىنشا، اتالعان توبەلەستىڭ شىعۋىنا جاس جىگىتتەردىڭ جولعا تالاسۋى سەبەپ بولعان كورىنەدى. ۇيعىر اۋداندىق اۋرۋحاناسىنا جاراقاتپەن تۇسكەن جىگىتتەردىڭ ەكەۋىنە وتا جاسالعان. الماتى وبلىسىنىڭ اكىمى اماندىق باتالوۆتىڭ قاتىسۋىمەن اۋدان ورتالىعىندا وتكەن جينالىسقا جەرگىلىكتى قازاق-ۇيعىر وكىلدەرى قاتىسقان.

«16 ماۋسىمعا قاراعان ءتۇنى ەكى كولىك شونجىدان كەلە جاتىپ، بىر-بىرىنە جول بەرمەي،  تۇسىنبەۋشىلىك تۋىنداپ،  ارتى توبەلەسكە ۇلاسقان. بۇل – جاستار اراسىنداعى بۇزاقىلىق. ولاردىڭ ءبارى 1999-2000 جىلى تۋعان جىگىتتەر. وبلىس اكىمىنىڭ ورىنباسارى وقيعا ورنىنا ءبىرىنشى باردى. ىزىنشە وبلىس اكىمى اماندىق باتالوۆ تا جەتتى. ءدال قازىر اۋداندىق اكىمدىكتە جينالىس ءوتىپ جاتىر. وعان اۋىل اقساقالدارى،  ەل اعالارى جانە جاستار جينالىپ، ماسەلەنى تالقىعا سالىپ جاتىر. قوس تاراپقا مۇنداي جاعدايعا جول بەرمەۋ كەرەك ەكەنى ايتتى. جاستاردىڭ اراسىنا ىرىتكى سالىپ جۇرگەن ءۇشىنشى توپتىڭ بار ەكەنى ايتىلدى. سول بويىنشا قۇزىرلى ورگاندار ءتيىستى تەكسەرۋ جۇرگىزەدى», - دەدى وبلىس اكىمىنىڭ ءباسپاسوز حاتشىسى.

وبلىس اكىمى قاتىسقان جيىندا ۇيعىر اۋدانىنىڭ اتاۋىن اۋىستىرۋ تۋرالى ۇسىنىس تاعى دا كوتەرىلگەن. جەرگىلىكتى حالىق اۋدانعا  جاڭا اتاۋ دايىنداپ تا قويعان.

«وبلىس اكىمى  اۋىل اقساقالدارىنىڭ دا پىكىرىن تىڭدادى. جاسىراتىنى جوق، كەيبىر ادامدار اۋداننىڭ اتاۋىن اۋىستىرۋ ماسەلەسىن دە ايتتى. ايتىلعان پىكىرلەردىڭ ءبارى حاتتاماعا تولتىرىلىپ جاتىر. حاتتاما نەگىزىندە كەيىن شارالار قابىلدانادى. پىشاقتالعان جىگىتتەردىڭ بەسەۋى دە امان، ومىرلەرىنە ەشقانداي قاۋىپ جوق،  جاعدايلارى تۇراقتى. ەكى تاراپ تا، ۇيعىر اۋىلىنىڭ اقساقالدارى دا بۇل ءىستىڭ وزدەرىنە ابىروي اكەلمەيتىنىن ايتتى. سەبەبى، ولار ۇزاق جىلدان بەرى بىرگە تۇرىپ كەلە جاتىر.

ولار وزدەرى دە ءۇشىنشى تاراپتىڭ ىرىتكى سالىپ جۇرگەنىنە شاعىمداندى. وسىدان ەكى جىل بۇرىن كونفەرەنتسيا وتكەندە اۋداننىڭ اتىن قارادالا دەپ،  شونجىنىڭ اتىن المەرەك دەپ اۋىستىرۋ تۋرالى ايتىلعان. سول ماسەلە تاعى كوتەرىلدى. وبلىس اكىمى بۇل ۇسىنىستاردىڭ ءبارى حاتتاماعا تولتىرىلىپ،  سودان كەيىن شەشىم قابىلداناتىنىن ەسكەرتتى. ونوماستيكالىق زاڭ بويىنشا ونىڭ ءبارى ورتالىقتا قارالىپ، مەملەكەتتىك كوميسسيانىڭ شەشىمىمەن قارالادى.

دەگەنمەن، اكىم حالىقتى اۋىزبىرشىلىككە شاقىردى. ويتكەنى، سوڭعى ۋاقىتتا ۇيعىر اۋدانىنىڭ ەكونوميكاسى قارىشتاپ دامىپ جاتىر. «جۇمىسپەن قامتۋ»، «جول كارتاسى» سىندى باعدارلامالار بويىنشا بولىنگەن قارجىنىڭ دا ءبىراز بولىگى وسى اۋدانعا تيەسىلى. جوبالار ىسكە اسىپ جاتىر. تۇرالاپ قالعان قۇس فابريكاسى قايتا اشىلدى. وسىنىڭ بارلىعى بەيبىتشىلىك پەن تۇراقتىلىقتىڭ ارقاسى. ەگەر ەكى تاراپ ءبىر بىرىمەن جاعا جىرتىسسا، ينۆەستورلاردىڭ ءوزى وڭىرگە كەلۋدەن باس تارتۋى مۇمكىن ەكەنىن  وبلىس اكىمى ەسكە سالدى», - دەدى الماتى وبلىسى اكىمىنىڭ ءباسپاسوز حاتشىسى عالىمۇرات جۇكەل.

ايتا  كەتەيىك، الماتى وبلىسى ۇيعىر اۋدانىنىڭ اكىمى - شۋحرات نۋراحۋنوۆ. Wikipedia-داعى مالەمەتتەرگە سۇيەنسەك، شۋحرات تۋرداحۋنۇلى بۇل قىزمەتكە 2017 جىلى تاعايىندالعان.

Abai.kz