بىشكەكتىڭ پەرۆوماي اۋداندىق سوتىندا قىرعىزداعى قىلمىس الەمىنىڭ سەركەسى ازيز باتۋكاەۆتى زاڭسىز بوساتىپ جىبەرۋگە بايلانىستى اتامباەۆتىڭ سوتى اياقتالدى. بۇل تۋرالى 24.kg حابارلادى.

المازبەك اتامباەۆ ازيز باتۋكاەۆتى بوساتىپ جىبەردى، دەپ ايىپتالعان بولاتىن. قىرعىزستاننىڭ بۇرىنعى پرەزيدەنتى المازبەك اتامباەۆ سوتتا سوڭعى ءسوزىن ايتۋدان باس تارتقان.

ال بۇعان دەيىن پروكۋرورلار وعان 15 جىل باس بوستاندىعىنان ايىرۋ جانە دۇنيە-مۇلكىن تاركىلەۋ جازاسىن سۇراعان.

پەرۆوماي اۋداندىق سوتىنىڭ سۋدياسى ەميلبەك كايپوۆ، اتامباەۆقا 11 جىل، 2 اي باس بوستاندىعىنان ايىرۋ جانە دۇنيە-مۇلكىن تاركىلەۋ جازاسىن تاعايىندادى.

ەستەرىڭىزگە سالا كەتەيىك، 2006 جىلى بىشكەك ماڭىنداعى كولونيالاردىڭ بىرىندە جاپپاي تارتىپسىزدىكتەردى ۇيىمداستىرعانى ءۇشىن باتۋكاەۆ 16 جىل 8 ايعا باس بوستاندىعىنان ايىرىلعان. 2013 جىلى باتۋكاەۆ تۇرمەدەن بوساتىلادى. بىرنەشە ساعاتتان كەيىن ول جاڭا پاسپورت الىپ، ەلدەن كەتەدى.

ازيز باتۋكاەۆتى زاڭسىز بوساتىپ جىبەرۋ تۋرالى قىلمىستىق ءىس 2019 جىلدىڭ قازانىندا سوتقا تاپسىرىلعان. ول بويىنشا 19 ادام جاۋاپقا تارتىلعان.

Abai.kz