قازاقستاندا قاتاڭ كارانتين رەجيمى قايتا ەنگىزىلۋى مۇمكىن. بۇل تۋرالى بۇگىن پرەزيدەنت قاسىم-جومارت توقاەۆ كوروناۆيرۋس ىندەتىنىڭ تارالۋىنا قارسى كۇرەس شارالارى جونىندەگى كەڭەستە ايتتى.

"ەلدەگى ەپيدەميولوگيالىق احۋالدى رەتتەۋ ءۇشىن شۇعىل شارالار قابىلداۋ ماقساتىندا مەملەكەتتىك كوميسسياعا ەكى كۇننىڭ ىشىندە ناۋرىز، مامىرداعى سەكىلدى قاتاڭ كارانتين شارالارى تۋرالى جوسپاردى ازىرلەپ، ەنگىزۋدى تاپسىرامىن", - دەدى پرەزيدەنت توقاەۆ.

سونداي-اق، قاسىم-جومارت توقاەۆ ۆەدومستۆوارالىق كوميسسيانىڭ جۇمىسىنا كوڭىلى تولمايتىنىن ايتىپ، سوكتى.

ەستەرىڭىزگە سالا كەتەيىك، وسىعان دەيىن پرەزيدەنت توقاەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە وزدەرىنە جۇكتەلگەن مىندەتتەردى شالا ورىنداعان بىرقاتار شەنەۋنىكتىڭ جۇمىسىن سىنعا الىپ، سوگىس جاريالاعان. ولاردىڭ قاتارىندا: ۆەدومستۆوارالىق كوميسسيانىڭ توراعاسى ە.توعجانوۆ، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ا.جۇماعاليەۆ، نۇر-سۇلتان قالاسىنىڭ اكىمى ا.كولگىنوۆ، الماتى قالاسىنىڭ اكىمى ب.ساعىنتاەۆ, شىمكەنت قالاسىنىڭ اكىمى م.ايتەنوۆ، اقتوبە وبلىسىنىڭ اكىمى و.ورازالين, پاۆلودار وبلىسىنىڭ اكىمى ءا.سقاقوۆ بار.

Abai.kz