بەلگىلى فۋتبولشى، تانىمال كوممەنتاتور دياس ءىلياسۇلى وماروۆ قايتىس بولدى.

قايعىلى حاباردى اقپارات جانە قوعامدىق دامۋ ءمينيسترى ايدا بالاەۆا Facebook پاراقشاسىندا حابارلادى.

«بۇگىن قازاق جۋرناليستيكاسى تاعى ءبىر جارىق جۇلدىزىنان ايىرىلدى. سەكسەنگە قاراعان شاعىندا ەلگە ايگىلى سپورتشى، اتاقتى فۋتبول كوممەنتاتورى وماروۆ دياس ءىلياسۇلى دۇنيەدەن ءوتتى. بۇكىل سانالى عۇمىرىن سپورتقا ارناپ، سپورت جۋرناليستيكاسىنىڭ وركەندەۋىنە ولشەۋسىز ۇلەس قوسقان دياس ءىلياسۇلىنىڭ ونەگەلى ءومىرى بارشا جۋرناليستەر قاۋىمىنا ۇلگى بولىپ قالادى. بۇل دۇنيەدە ماڭگىلىك ەشتەڭە جوق. الايدا، دانا حالقىمىز «جاقسىنىڭ اتى ولمەيدى، عالىمنىڭ حاتى ولمەيدى» دەيدى.

دياس ءىلياسۇلىنىڭ سوناۋ كەڭەس زامانىنداعى «سوۆەتسكيي سپورت»، «ترۋد» گازەتتەرىندە جاريالانعان دۇنيەلەرىنەن باستاپ، «قازتەلەراديوداعى» كوممەنتاتورلىق جانكەشتى ەڭبەگى، ەلىمىز تاۋەلسىزدىك العاننان كەيىنگى «حابار» ارناسى سەكىلدى رەسپۋبليكالىق تەلەارنالارداعى سپورت جۋرناليستيكاسىنىڭ تاسىن ورگە سۇيرەپ، ءوز كاسىبىنە ادال قىزمەت ەتۋى بارشا جۋرناليستەر قاۋىمىنا ۇلگى-ونەگە دەر ەدىك.

ورنى تولماس اۋىر قازادا مارقۇم دياس وماروۆ اعامىزدىڭ وتباسى مەن تۋعان-تۋىستارىنىڭ قايعىسىنا ورتاقتاسىپ كوڭىل ايتامىز. مارقۇمنىڭ يمانى جولداس بولىپ، پەيىشتە نۇرى شالقىسىن»، – دەپ جازدى مينيستر.

دياس وماروۆ 1959 جىلدان 1964 جىلعا دەيىن الماتىلىق «قايرات» ساپىندا جارتىلاي قورعاۋشى رەتىندە ونەر كورسەتتى. 1966 جىلدان باستاپ قازتەلەراديودا سپورت كوممەنتاتورى بولىپ قىزمەت اتقاردى. 1998 جىلدان باستاپ قازىرگى ۋاقىتقا دەيىن ول قازتەلەراديو مەن حابار تەلەارناسىنىڭ سپورت كوممەنتاتورى بولاتىن.

20 قازاندا دياس ءىلياسۇلى 80 جاسقا تولار ەدى.