كۇنى كەشە التاي كولگىنوۆ باسشىلىق جاسايتىن قالادا (نۇر-سۇلتاندا) بولعان مەرەكەلىك وتشاشۋ قوعامنىڭ قىزۋ تالقىسىن، انىعىندا نارازىلىعىن تۋدىرعانىن بىلەسىزدەر. جۇرت دەرت دەندەپ، ىندەت ورشىگەن، كوپ شاڭىراق قايعى جامىلىپ، قارا تۇتقان تۇستا باس قالا باسشىلىعىنىڭ گۇرسىلدەتىپ-دۇرسىلدەتىپ مەرەكەلىك وتشاشۋ وتكىزگەنىن سىنادى.

ءبىز جازدىق. ءبىز سەكىلدى جۇزدەگەن اقپارات قۇرالدارى جازدى. الەۋمەتتىك جەلىدە مىڭداعان ادام وتشاشۋعا قارسى پىكىر ءبىلدىردى. كولگىنوۆ اكىمدىگىنىڭ قۇلاعىنا كەشە كۇندىزدەن بەرى ايتىلىپ، جازىلىپ جاتقان مىڭ ءسوزدىڭ ءبىرى جەتپەسە، ءبىرى جەتكەنى انىق. بىراق، اكىمدىك «ءلام-ميم» دەگەن جوق. بار بولعانى «بيۋدجەتتىڭ قارجىسى جۇمسالماعانىن» ايتتى. ال  وتشاشۋ جوسپارلانعان ۋاقىتىندا ءوتتى.

ءدال قازىرگى ۋاقىتتا حالىققا كەرەگى وتشاشۋ ما؟ جوق! ول تۋرالى كەشە جازدىق. قايتالاعان بولمايىق...

بۇگىن، «بولار ءىس بولىپ، بوياۋى سىڭگەندە»، التاي اكىم اقتالىپتى. دالىرەك ايتساق، التاي كولگىنوۆ اكىمدىگىنىڭ مادەنيەت باسقارماسى. قاراڭىز:

«قالا كۇنىنە ارنالعان وتشاشۋ جىل باسىندا جوسپارلانىپ، دەمەۋشىلەر قاجەتتى ماتەريالداردى ساتىپ الىپ قويعان. ورنى دا بەلگىلەنگەن. بۇل وتشاشۋ قالا تۇرعىندارىنىڭ كوڭىلىن كوتەرۋ ءۇشىن، كوروناۆيرۋسپەن كۇرەستىڭ الدىڭعى شەبىندە جۇرگەن مەدقىزمەتكەرلەرگە قولداۋ كورسەتۋ ءۇشىن ۇيىمداستىرىلعان»، - دەپتى.

ءجا، بۇگىن ەسىم-سويى الەمنىڭ التى قۇرلىعىنا ءماشھۇر بولعان ءانشى ديماش قۇدايبەرگەن دە وسى جايتقا قاتىستى ءوزىنىڭ پىكىرىن جاريالاعان ەكەن. 3,3 ميلليون وقىرمانى بار «Instagram» جەلىسىندەگى جەكە پاراقشاسىندا پاندەميا كەزىندە وتشاشۋ وتكىزگەن كولگىنوۆ اكىمدىگىن سىناپ سويلەپتى. ديماشتىڭ ورىس تىلىندەگى جازباسىن قازاقشاعا اۋداردىق:

«وتشاشۋ نەنىڭ قۇرمەتىنە؟ كوروناۆيرۋستان الەمدە الدىڭعى ورىنعا شىققانىمىزدىڭ قۇرمەتىنە مە؟ استانادا وتشاشۋ ۇيىمداستىرىپ جاتقاندا، جۇرت وتتەگىن تاپپاي ءجۇر. وسى باعىتتارىڭىزدان تايماڭىزدار! كەلەر جىلى تويلايتىن ادام قالماي قالۋى مۇمكىن...»، - دەپتى ءوزىنىڭ ەموتسيونالدى جازباسىندا.

قازىردىڭ وزىندە ديماشتىڭ بۇل جازباسىن 90 مىڭنان اسا ادام وقىپ، 9 مىڭنان استام پىكىر جازىلىپتى. ال بۇعان ەلوردا اكىمدىگى جاۋاپ بەرە مە؟ كورە جاتارمىز...

كەشەلى-بەرى اتتارىنان ات ۇركەتىن زيالى قاۋىم وكىلدەرى، اقىندار، قوعام بەلسەندىلەرى كولگىنوۆ اكىمدىگىنىڭ كوك ءتۇتىن وتشاشۋىن سىناپ جاتىر. باسقاسىن ايتپاعاندا، Facebook جەلىسىنەن «كولگىنوۆتىكى دۇرىس» دەگەن ءبىر ادامدى كەزدەستىرمەدىك. مۇمكىن بار دا شىعار. بىراق، قوعامدا نارازىلىق پىكىر باسىم! ءدال قازىر جۇرتقا كەرەگى وتشاشۋ ەمەس ەدى. وكىنىشكە وراي، كولگىنوۆ اكىمدىگى قوعامنىڭ بۇل تالابىن ەستىگىسى كەلگەن دە جوق.

بۇگىن بەرگەن جاۋاپ سوزىندە: «جۇرتتىڭ كوڭىلىن كوتەرۋ ءۇشىن» وتكىزدىك دەپتى. سەنسەڭىز دە، سەنبەسەڭىز دە وسى! بۇل اكىمدىكتىڭ جاۋابى.

Abai.kz