كەشىرشى ءبىزدى، كارى انا،
كەشىرشى ءبىزدى، جان-اعا!
زار بولىپ، ءولدىڭ دالادا،
ءبىر جۇتىم تازا اۋاعا!

وزىمە قارسى دەنەم بۇل،
شىعارما دەيدى داۋسىڭدى.
كوروناۆيرۋس دەگەن ءبىر
كورىنبەس كوزگە جاۋ سىندى.

ءبىر جۇتىم اۋا... اڭساعان،
شىرىلداپ شىبىن جان ءتاتتى-اي.
مەرت بولدى بۇگىن قانشا ادام،
سوعىستا كەتكەن سولداتتاي؟!

مايىتكە تولدى كور ءىشى،
مارقۇم بوپ قازاق-ورىسى.
ادام مەن ۆيرۋس سوعىسى –
كورونوۆيرۋس سوعىسى!

قورشاۋدى بۇزىپ-جارىپ شىق،
سوعىستا جەڭىپ، تەز ورال!
حالقىمدى امان الىپ شىق،
دارىگەر دەيتىن گەنەرال!

بىتەدى قاشان بۇل جۇت-اي،
كەلە مە سوڭعى ءسات تاياپ؟!
الەمدى قىردى-اۋ قۋ قىتاي،
حالىققا ءبىر وق اتپاي-اق!

زيراتتا زارلاپ ءزاۋزاتتار،
جانىنا كەلە المادىق.
ارماندا كەتكەن ارۋاقتار،
ارۋلاپ كومە المادىق.

بوزدادى حالىق، بولدىردى،
شىعادى قايدان تاعى شۋ؟!
كوز جاسى ما ەكەن كوپ جىلعى،
كەۋدەنى قىسقان سارى سۋ؟!

بۇل بيلىك – سيىر ءسۇتى جوق،
مالشىسى... قوي، قوي، ايتپا، ويباي!
ءدارىسىن ساتتى-اۋ ۇكىمەت،
سوعىستا وعىن ساتقانداي!

ءتۇتىنىن ۋلى جۇتىپ ەك،
زاۋىتتار پەشىن جاققاندا.
وتشاشۋ اتتى-اۋ ۇكىمەت،
وتتەگى جەتپەي جاتقاندا؟!

اۋىسار قاشان بۇل بيلىك،
ەمەس قوي ەلىم ءتىلسىز قۇل؟!
«ۇنسىزدىك – دەيدى-اي – 1 مينۋت؟»،
30 جىل حالقىم ءۇنسىز ءجۇر!

جىلايىن دەسەم، جاس ەمەس،
قان تولى كوزدىڭ ىشىندە، ەي!
جۇرەگىم مەنىڭ... تاس ەمەس
ەلباسى ەسكەرتكىشىندەي!

بارىنە «دۇعاي سالەم» دە،
اۋىرما، امان بول، بالام!
بولايىن مەن-اق، الەمدە
بۇل دەرتتەن ولگەن سوڭعى ادام!

اۋىرعان جاندار تۇسىنەر،
اتاڭا نالەت، ءبارىڭدى!
...ءىشىپ ءول ءوزىڭ، ءىشىپ ءول،
قويماڭا تىققان ءدارىڭدى...

الماس تەمىربايدىڭ جازباسى

Abai.kz